Go kwa Modimo Lapeng le le Aroganego ka Bodumedi

“GO KWEŠA bohloko kudu go feta go otlwa mmeleng le ge e le gofe. . . . Ke ikwa bjalo ka ge eka ke gobaditšwe mmele ka moka, gomme lega go le bjalo go se yo a ka kgonago go bona.” “Ka dinako tše dingwe ke ikwa eka nka ngala bophelo bja-ka . . . goba go tloga gae gomme ka se sa hlwa ke boa gape.” “Ka dinako tše dingwe go thata go nagana ka tsela e nepagetšego.”

Mantšu ao a tletšego maikwelo a utolla maikwelo a tlalelo le bodutu. A tšwa go bahlaselwa bao ba gobošwago ka mantšu—ka ditatofatšo, ditšhošetšo, go bitšwa ka maina a nyenyefatšago, go se boledišwe—gaešita le go gobošwa mmeleng ke balekane le ditho tša lapa. Ke ka baka la’ng batho ba ba swarwa gampe ka tsela ye? Ke feela ka baka la ditumelo tše di fapanego tša bodumedi. Ka tlase ga maemo a, go phela lapeng le le aroganego ka bodumedi go dira gore go rapela Jehofa e be tlhohlo ya kgonthe. Lega go le bjalo, bontši bja bahlaselwa ba bjalo ba Bakriste ba bontšha go kwa Modimo ka katlego.

Se se thabišago ke gore, bohloko bjo bjalo le kgateletšo ga di hwetšwe magaeng ka moka ao a aroganego ka bodumedi. Lega go le bjalo, di gona. Na legae la gago le swanela tlhaloso ye? Ka gona, o ka hwetša go le thata go tšwela pele o hlompha molekane wa gago goba batswadi ba gago. Ge e-ba o le mosadi yo a lego boemong bjo bjalo goba bana ba lego tikologong e bjalo, le ka atlega bjang go bontšheng go kwa Modimo legaeng le le aroganego ka bodumedi? Ke thekgo efe yeo ba bangwe ba ka e neago? Le gona, Modimo o lebelela taba bjang?

Ke ka Baka La’ng go kwa go le Thata Gakaakaa?

Boithati bja lefase le go hloka tebogo di šoma gotee le ditshekamelo tša gago tša go se phethege gomme di dira gore go kwa Modimo e be ntwa e sa kgaotšego. Sathane o tseba se, gomme o lesolong la go go nyamiša. Gantši o diriša ditho tša lapa tšeo di nago le tebogo le tlhompho e nyenyane goba di se nago yona ditekanyetšong tša Modimo. Ditekanyetšo tša gago tše di phagamego tša moya le tša boitshwaro gantši di fapana kudu le tša ba lapa leno bao ba sa dumelego. Se se bolela dipono tše di thulanago boitshwarong le tirong. (1 Petro 4:4) Kgatelelo ya go go fapoša tekanyetšong ya Bokriste e ka ba matla, ka ge o kwele taelo ye e rego: “Le se kê la xwêrana le ba medirô ya lefsifsi ye e sa tšweletšexo dienywa tša selô; sa lena a e bê xo e sôla.” (Ba-Efeso 5:11) Mahlong a bona ga go sa na se sebotse se o se dirago. Tše ka moka ke ka baka la bodumedi bja gago. Mma yo mongwe ge a be a šitwa ke bana bao ba babjago, o ile a kgopela thušo go monna wa gagwe gomme a hwetša karabo e hlabago, “O na le nako ya bodumedi bja gago; ga o nyake thušo.” Dipolelo tše bjalo di okeletša tlhohlong ya go ba yo a kwago.

Gape, go na le dinako tšeo ka tšona le ka se dumelelanego mabapi le ditaba tšeo di sa robego Mangwalo ka go lebanya. Lega go le bjalo, o lemoga gore o karolo ya lapa gomme ka baka leo, o na le boikarabelo bjo itšego. Connie o re: “Ke ferekana kudu ge ke gopola kamoo tate a re swarago ka gona ka gobane ke lemoga gore o ikwa a le noši. Ke swanelwa ke go ikgopotša gantši gore ke se ke ka kgopišwa ke go ganetša ga tate. Ke swanelwa ke go ipotša gore go na le lebaka le matla leo ka lona a ganetšago goba a ganago boemo bja rena. Sathane ke mmuši wa tshepedišo ye ya dilo.” Susan yo a nyetšwego ke monna yo e sego modumedi, o utolla gore: “Mathomong ke be ke ikwa gore ke nyaka go arogana le yena—eupša ga go sa le bjalo. Ke tsebile gore Sathane o be a mo dirišetša go nteka.”

Maiteko a Sathane a go go dira gore o ikwe o se bohlokwa a ka bonala ekare ga a kgaotše. Matšatši a ka feta o sa boledišane le molekane wa gago. Bophelo bo ka fetoga bjo bo lešago bodutu kudu. Se se senya kholofelo le boitlhompho gomme se leka go kwa ga gago Modimo. Bana le bona ba ikwa ba lapile maikwelong le mmeleng. Tiragalong e nngwe, bahlanka ba Modimo ba bararo ba bafsa ba ile ba ba gona dibokeng tša Bokriste ka potego gaešita le ge batswadi ba bona ba be ba ganetša. Yo mongwe wa bona yoo gabjale e lego modiredi wa nako e tletšego, o dumela gore: “Re be re ikwa re šegame gomme re fedile matla; re be re sa kgone go robala; re ile ra nyama kudu.”

Ke’ng Seo Modimo a se Lebeletšego go Wena?

Ka mehla go kwa Modimo go tla pele, gomme go kwa monna mo go lekanyeditšwego bjalo ka hlogo ka mehla go swanetše go ba kamoo Jehofa a laelago ka gona. (Ditiro 5:29) Seo se ka ba thata, fela se a kgonega. Tšwela pele o nyaka thušo go Modimo. O rata gore o ‘mo rapele ka moya le ka go rereša’ le go mo theetša gotee le go ikokobeletša tlhahlo ya gagwe. (Johane 4:24) Tsebo e tšwago Lentšung la Modimo ge e dutše e tlatša mohuta o lokilego wa pelo, e hlohleletša go kwa ka go rata. Gaešita le ge maemo a gago ka noši a ka fetoga, Jehofa goba Lentšu la gagwe ga a fetoge. (Maleaki 3:6; Jakobo 1:17) Jehofa o abetše monna bohlogo. Se se dula e le therešo go sa šetšwe ge e ba a amogela bohlogo bja Kriste goba go se bjalo. (1 Ba-Korinthe 11:3) Gaešita le ge go ka ba thata go amogela se ge e ba o lebeletšane le kgobošo ya ka mehla le go hlomphollwa, morutiwa Jakobo o re: “Bohlale byo bo tšwaxo xodimo . . . bo na le xo kwa.” (Jakobo 3:17) Go hlompha bohlogo bjo ka ntle le go ngongorega le go bo amogela go nyaka moya wa Modimo, kudu-kudu seenywa sa wona sa lerato.—Ba-Galatia 5:22, 23.

Ge o rata motho yo mongwe, go bonolo go bontšha go kwa Modimo mabapi le matla a a taolo a hlomilwego ke Modimo. Ba-Efeso 5:33 e eletša ka gore: “Mang le mang a ratê mosadi wa xaxwe ka mokxwa wo a ithataxo ka wôna; xore mosadi yêna a boifê monna.”

Nagana ka Jesu. O ile a gobošwa ka mantšu le mmeleng, fela le ka mohla ga se a ka a roga motho le ge e le ofe. O bolokile pego e se nago phošo. (1 Petro 2:22, 23) Gore Jesu a kgotlelele go nyatšwa mo gogolo ka tsela yeo, o be a nyaka sebete se segolo le lerato le le tiilego la go rata tatagwe, Jehofa. Eupša, lerato “le kxôtlêlêla tšohle.”—1 Ba-Korinthe 13:4-8.

Paulo o ile a gopotša modirišani wa gagwe Timotheo, gomme o a re gopotša lehono gore: “Modimo xa a ka a re nea Môya wa boi; ó re file Môya wa matla, le wa leratô, le wa thlaoloxanyô.” (2 Timotheo 1:7) Lerato le le tseneletšego la go rata Jehofa le Jesu Kriste le ka go hlohleletša go kwa Modimo ge boemo bo bonala bo sa kgonege go kgotlelelwa. Go hlaphogelwa monaganong go tla go thuša go boloka pono e leka-lekanego le go tšwela pele o tsepeletše tswalanong ya gago le Jehofa le Jesu Kriste.—Bapiša le Ba-Filipi 3:8-11.

Balekane Bao ba Atlegago go Bontšheng go kwa Modimo

Ka dinako tše dingwe o swanelwa ke go leta ka nako e telele bakeng sa go bona kamoo Jehofa a tla hlokomelago mathata a gago ka gona. Lega go le bjalo, letsogo la gagwe le ka mohla ga le palelwe. Yo mongwe yo a atlegago go bontšheng go kwa Modimo o eletša ka gore: “Ka mehla dira dilo tšeo Jehofa a go neago tshwanelo le tokelo ya go di dira—go mo rapela dibokeng le dikopanong, go ithuta, go ya tirelong le go rapela.” Ke maiteko a gago ao Jehofa a a šegofatšago, e sego feela tšeo o di fihleletšego. Go 2 Ba-Korinthe 4:17, moapostola Paulo o boletše gore ‘tlaišego ke ya lebakanyana, eupša e re ruiša letago le le fetišago tšohle.’ Naganišiša ka se. E tla ba lebaka le le matlafatšago go wena. Mosadi yo mongwe o bolela gore: “Bophelo bja lapa la-ka ga bo kaonefale, gomme ka dinako tše dingwe ke ipotšiša ge e ba Jehofa a kgahlišwa ke nna. Eupša selo se tee seo ke se lebelelago e le tšhegofatšo ke taba ya gore ke tšwa ka gare ga maemo a thata ke le kaone go feta monna wa-ka. Go tseba gore ditiro tša rena di kgahliša Jehofa go dira gore bothata bjohle e be bjo bo swanelwago ke boiteko.”

Jehofa o holofetša gore a ka se go tlogele o welwa ke maemo ao o ka se kgonego go a kgotlelela. Mmote. O tseba gakaone go go feta, le gona o go tseba gakaone go feta kamoo o itsebago ka gona. (Ba-Roma 8:35-39; 11:33; 1 Ba-Korinthe 10:13) Go rapela Jehofa maemong a thata go a thuša. Rapelela moya wa gagwe gore o go hlahle, kudu-kudu ge e ba o sa tsebe tsela ye o swanetšego go e tšea goba kamoo o ka lebanago le boemo ka gona. (Diema 3:5; 1 Petro 3:12) Mo rapele o sa kgaotše gore a go nee go se fele pelo, boitshwaro le boikokobetšo gore o ikokobeletše matla a taolo bophelong bja gago. Mopsalme o itše: “Morêna, O lentswê la-ka, le sebô saka, O monamoledi wa-ka.” (Psalme 18:2) Go gopola se ke thušo e matlafatšago go bao ba lego malapeng ao a aroganego ka bodumedi.

Ka godimo ga tšohle, dira boiteko bjohle go dira gore lenyalo la gago e be le thabišago. Ee, Jesu o ile a bona e sa le pele gore ditaba tše di lokilego di be di tla baka dikarogano. Lega go le bjalo, rapela gore karogano le ge e le efe e se ke ya ba yeo e bakwago ke boemo bja gago bja kgopolo goba boitshwaro. (Mateo 10:35, 36) Gore o fihlelele se, tirišano e fokotša mathata a lenyalo. Gaešita le ge e le wena feela yo a bontšhago boemo bjo bjo bo swanetšego bja kgopolo, se se ka thuša kudu go thibela mathata go fihla boemong bja dikgohlano le diphapano tše di feteletšego. Go se fele pelo le lerato di bohlokwa kudu. “E-ba bonolo” gomme “o ganele bobe.”—2 Timotheo 2:24.

Moapostola Paulo o bile “tšohle go bohle.” (1 Ba-Korinthe 9:22, PK) Ka mo go swanago, gaešita le ge o sa kwanantšhe mediro ya Bokriste, ka dinako tše dingwe o ka swanela go beakanya lenaneo la gago gore o fetše nako e oketšegilego o e-na le molekane wa gago le lapa la gago. Diriša nako e ntši ka mo go ka kgonegago le motho yo o kgethilego go abelana le yena bophelo bja gago. Bontšha go naganela ga Bokriste. Se ke pontšho ya go kwa Modimo.

Mosadi yo a boifago Modimo le yo a ikokobeditšego yo a feto-fetogago le maemo yo a nago le kwelobohloko, o hwetša go le bonolo go bontšha go kwa Modimo. (Ba-Efeso 5:22, 23) Mantšu ao e lego a botho, “a nokilwexo letswai,” a thuša go fokotša diphapano tšeo di ka bago gona.—Ba-Kolose 4:6; Diema 15:1.

Bohlale bja Modimo bo go lemoša gore o lokiše diphapano kapejana le go tsošološa khutšo ka mantšu a mabotse ao a agago, go e na le gore o ye go robala “o sa xalefile.” (Ba-Efeso 4:26, 29, 31) Se se nyaka boikokobetšo. Ithekge kudu ka Jehofa bakeng sa matla. Mosadi yo mongwe wa Mokriste o dumetše ka boikokobetšo gore: “Ka morago ga thapelo e tšwago pelong, ke ile ka kwa moya wa Jehofa o kuka letsogo la-ka gore le gokarele molekane wa-ka.” Lentšu la Modimo le eletša ka gore: “Le se kê la lefetša motho bobe ka bobe. . . . Bobe bo fenyê ka boló.” (Ba-Roma 12:17-21) Ye ke keletšo e bohlale e bile ke tsela ya go kwa Modimo.

Bana Bao ba Bontšhago go kwa Modimo

Keletšo ya Jehofa go lena bana bao ba lego malapeng ao a aroganego ka bodumedi ke gore: “Kwang batswadi ba lena dilong tšohle; xobane ké sôna se se kxahlaxo Morêna.” (Ba-Kolose 3:20) Hlokomela gore Morena Jesu Kriste o a akaretšwa tabeng. Ka gona, go kwa batswadi ga se mo go feteletšego. Gabotse-botse, keletšo ya Ditiro 5:29, (NW) ya gore go “kwa Modimo e le mmuši go e na le batho,” e bile e swanela bafsa ba Bakriste. Go tla tšwelela maemo ao go ona o tlago go swanela go dira phetho ya seo o tlago go se dira motheong wa seo o se tsebago gore se lokile go ya ka Mangwalo. A ka feleletša ka sebopego se itšego sa kotlo bakeng sa go gana go tšea karolo tirong ya maaka ya bodumedi. Gaešita le ge se e le tebelelo e sa kgahlišego, o ka kgona go hwetša khomotšo gaešita le go thabela therešo ya gore o tlaišega bakeng sa go dira se se lokilego mahlong a Modimo.—1 Petro 2:19, 20.

Bjale ka ge dikgopolo tša gago di hlahlwa ke melao ya motheo ya Beibele, o ka no se kwane le batswadi ba gago ditabeng tše itšego. Se ga se ba dire manaba a gago. Gaešita le ge e se bahlanka ba ineetšego ba Jehofa, ba swanelwa ke tlhompho e swanetšego. (Ba-Efeso 6:2) Salomo o itše: “Kwaa tat’axo, yêna motswadi wa xaxo; ’me mm’axo xe a kxekotše, O se kê wa mo nyatša.” (Diema 23:22) Leka go kwešiša bohloko bjo ba bo kwago ka baka la go kgomarela ga gago tumelo yeo go bonalago e le e sa tlwaelegago go bona. Boledišana le bona, gomme “bolêta bya [gago] bo tsebyê bathong bohle.” (Ba-Filipi 4:5) Abelana le bona maikwelo le mathata a gago. Lega go le bjalo, kgomarela ka go tia melaong ya motheo ya go boifa Modimo, “xe xo kxônêxa ka thokô ya lena, Le phedišanê xa-botse le batho ka moka.” (Ba-Roma 12:18) Therešo ya gore gabjale o ikokobeletša taolo ya batswadi e bontšha Jehofa gore o kganyoga go tšwela pele o le yo a kwago bjalo ka molata wa Mmušo.

Seo ba Bangwe ba ka se Dirago

Bakriste bao ba dulago malapeng ao a aroganego ka bodumedi ba nyaka thekgo le kwešišo go tšwa go barapedi-gotee le bona. Se se bonagala mantšung a yo mongwe yo a itšego: “Ke ikwa ke se na kholofelo gomme ke hloka thušo ka mo go feletšego bjale ka ge go se na seo motho le ge e le ofe a ka se dirago, le gona go se na seo nka se dirago go fetola boemo. Ke holofela Jehofa gore o tla phetha thato ya gagwe lapeng la rena, le ge e ka ba efe.”

Go gwerana le banabešo le dikgaetšedi tša moya dibokeng tša Bokriste ke setšhabelo. Mosadi yena yo o hlalositše bophelo bja gagwe e le bjo bo “swanago le mafase a mabedi a sa swanego. Le lengwe ke swanelwa ke go ba go lona gomme le lengwe ke rata go ba go lona.” Lerato la borwarre ke lona le dirago gore go kgonege go batho ba ba tlaišegago gore ba kgotlelele le go hlankela maemong ka moka. Ba akaretše dithapelong tša gago. (Ba-Efeso 1:16) Ka mehla ka dinako tšohle, bolela mantšu a kgothatšago, a agago le a homotšago go bona. (1 Ba-Thesalonika 5:14) Ge go kgonega gomme e le mo go swanetšego, ba akaretše medirong ya gago ya pušo ya Modimo le ya bogwera.

Ditšhegofatšo le Mehola ya go kwa Modimo

Letšatši le letšatši naganišiša ka ditšhegofatšo le mehola ya go bontšha go kwa Modimo legaeng leo le aroganego ka bodumedi. Šomela go ba yo a kwago. “O se ke wa lapa.” (Ba-Galatia 6:9) Go kgotlelela maemo a sa rategego le go hloka toka ‘e le ge o itsebela Modimo, gona e ba mahlatse’ pele ga Modimo. (1 Petro 2:19, 20) E-ba yo a kwago go fihla bokgoleng bjoo melao ya motheo le melao ya Jehofa ya go loka di sa kwanantšhwego. Se se bontšha go botegela thulaganyo ya Jehofa. Boitshwaro bja gago bja go kwa Modimo bo ka boloka gaešita le bophelo bja molekane wa gago, bana goba batswadi.—1 Ba-Korinthe 7:16; 1 Petro 3:1.

Ge o dutše o lebeletšane le dinyakwa le dilo tšeo di letetšwego lapeng leo le aroganego ka bodumedi, gopola bohlokwa bja go kgomarela potego ya go botegela Jehofa Modimo le Jesu Kriste. O ka ineela dintlheng tše dintši, eupša go lahla potego ke go lahla selo se sengwe le se sengwe go akaretša le bophelo ka bobjona. Moapostola Paulo o itše: “Modimo . . . mehleng yeno ya bofêlô a tla a bolêla le rena ka Morwa yo a mmeilexo mo-ja-bohwa wa tšohle, è le yo a dirilexo lexohle ka Yêna.” Go lemoga “phološô e kxolo yé” go tla go matlafaletša go ba yo a kwago.—Ba-Hebere 1:1, 2; 2:3.

Go kwa le go tia ga gago mo go sa kwanantšhego bakeng sa boitshwaro le ditekanyetšo tše di lokilego ke tšhireletšo e matla go wena le go molekane wa gago yo a sa dumelego. Potego e aga ditlemo tše matla tša lapa. Diema 31:11 e bolela ka mosadi wa sethakga le yo a botegago ka gore: “Pelo ya mong wa xaxwe e dula è mmotile.” Boitshwaro bja gago bjo bo hlwekilego le tlhompho e tseneletšego di ka bula mahlo a monna wa gago yo a sa dumelego. Bo ka mo lebiša go amogeleng therešo ya Modimo.

Go kwa Modimo ruri go bohlokwa e bile go phološa bophelo. Go rapelele bophelong bja lapa la gago. Go tla feleletša ka khutšo ya monagano gomme gwa tliša theto go Jehofa.