Tumelo ya Rena e re Tutueletša Medirong e Mebotse
1 Tumelo e tutueleditše Noage, Moše le Rahaba go gata mogato. Noage o ile a aga areka. Moše o ile a tlogela mehola ya bophelo ya nakwana lapeng la Farao. Rahaba o ile a uta dihlodi gomme a kwa ditaelo tša tšona, a phološa lapa labo. (Ba-Heb. 11:7, 24-26, 31) Tumelo ya rena e re tutueletša go dira mediro efe e mebotse lehono?
2 Go Nea Bohlatse: Tumelo e re tutuetša go bolela ka Modimo wa rena yo a kgahlišago le ditokišetšo tša gagwe tša lethabo la ka mo go sa felego. (2 Ba-Kor. 4:13) Ka dinako tše dingwe re ka ikwa re dika-dika go nea bohlatse. Eupša ge re ‘bea Jehofa ka pele ga rena ka mehla,’ re a matlafatšwa gomme letšhogo le a kokobela. (Ps. 16:8, PK) Ke moka tumelo ya rena e re tutueletša go abelana ditaba tše dibotse le ba leloko, baagišani, bašomi-gotee le rena, bao re tsenago sekolo le bona le ba bangwe ka sebaka se sengwe le se sengwe se se swanetšego.—Ba-Roma 1:14-16.
3 Go Bokana Gotee: Go ba gona dibokeng ka mehla ke modiro o mongwe o mobotse o tšwago tumelong. Bjang? Go bontšha kgodišego ya rena ya gore Jesu o na le rena ka moya o mokgethwa wa Modimo ge re bokana dibokeng tša Bokriste. (Mat. 18:20) Go bonagatša kganyogo ya rena ya go ‘kwa se moya o se botšago diphuthego.’ (Kut. 3:6) Re tšeela godimo tlhahlo yeo re e hwetšago ka gobane mahlo a rena a tumelo a bona gore yo a re rutago ke Mohlahli wa rena yo Mogolo, Jehofa.—Jes. 30:20.
4 Diphetho tše re di Dirago: Go kgodišega ka mo go tseneletšego ka dilo tša kgonthe tše di sa bonwego go re tutueletša go etiša dilo tša moya pele maphelong a rena. (Ba-Heb. 11:1) Gantši se se akaretša go gafa dilo tše di bonagalago. Ka mohlala, mogolo o ile a gana go amogela sebaka sa modiro wa boiphedišo wo o lefago gabotse ka baka la ge se se be se tla bolela gore o swanetše go lahlegelwa ke diboka, go ba kgole le lapa la gagwe le go tlogela bodiredi bja gagwe bja bobulamadibogo. Eka le rena re ka bea kholofelo ya rena ka botlalo kgonthišetšong ya Beibele ya gore Jehofa o tla thekga bao ‘ba tšwelago pele go tsoma Mmušo wa Modimo pele le go loka ga gagwe.’—Mat. 6:33, NW.
5 Tutuetšo e matla yeo tumelo e nago le yona maphelong a rena e lemogwa ke ba bangwe. Ka kgonthe, tumelo ya rena e tsebja lefaseng ka bophara. (Ba-Roma 1:8) Ka gona, eka ka moka ga rena re ka bontšha ka mediro ya rena e mebotse gore tumelo ya rena e a phela.—Jak. 2:26.