Tsebatšang Therešo ka Jesu
1 Ba thušwa ke dinku tše dingwe, Bakriste ba tloditšwego “ba na le modiro wa go nea bohlatse ka Jesu.” (Kut. 12:17, NW) Ye ke kabelo ya bohlokwa ka ge phološo e kgonega feela ka yena.—Joh. 17:3; Dit. 4:12.
2 ‘Tsela, Therešo le Bophelo’: Jesu o itše: “Tsela ké Nna, le therešô, le bophelô. Xa xo e a tlaxo xo Tate xe e se ka Nna.” (Joh. 14:6) Ke ka Jesu feela, “tsela,” re ka batamelago Modimo ka thapelo gomme ra ba le tswalano e amogelegago le Yena. (Joh. 15:16) Jesu ke “therešô” ka baka la gore diporofeto le meriti tšeo di lego ka Mangwalong a Sehebere di ile tša phethagala ka yena. (Joh. 1:17; Ba-Kol. 2:16, 17) Ka kgonthe, morero o mogolo wa boporofeta bja therešo ke go hlabišetša seetša temeng ya gagwe e kgolo yeo a e kgathago go phethagatšweng ga morero wa Modimo. (Kut. 19:10) Go feta moo, Jesu ke “bophelô.” Bakeng sa go hwetša tšhegofatšo ya bophelo bjo bo sa felego, batho ka moka ba swanetše go bontšha tumelo sehlabelong sa gagwe sa topollo.—Joh. 3:16, 36; Ba-Heb. 2:9.
3 Hlogo le Kgoši e Bušago: Batho ba swanetše go lemoga gape le matla a magolo a taolo ao Jehofa a a neilego Morwa wa gagwe. Jesu o beilwe e le Kgoši ya Mmušo wa Modimo—‘gomme yena eo ditšhaba di a mo kwa.’ (Gen. 49:10) Ka godimo ga moo, Jehofa o mmeile e le Hlogo ya phuthego. (Ba-Ef. 1:22, 23) Re swanetše go thuša barutwana ba rena ba Beibele go kwešiša kamoo Jesu a hlahlago phuthego ka gona le kamoo a dirišago “molaki e a bôtêxaxo yo bohlale” go aba ‘dijo tša moya ka lebaka la gona.’—Mat. 24:45-47.
4 Moperisita yo Mogolo yo a Nago le Kgaugelo: Ka ge a ile a lebeletšana le diteko le go tlaišwa ge e be e le motho, Jesu ‘o kgona go lwela bao ba lekwago.’ (Ba-Heb. 2:17, 18) Ke mo go ruthetšago pelo gakaakang go batho ba sa phethagalago go tseba gore Jesu o ba kwela bohloko ka mafokodi a bona gomme ka botho o a ba thekga ge ba rapela! (Ba-Roma 8:34) Motheong wa sehlabelo sa Jesu le ka tirelo ya gagwe e le Moperisita yo Mogolo, re ka batamela Jehofa “ka tokologo ya polelo” bakeng sa go hwetša “thušo ka nako e swanetšego.”—Ba-Heb. 4:15, 16, NW.
5 Eka maiteko a rena a go tlwaelanya ba bangwe le therešo ka Jesu a ka ba tutuetša go mo kwa le go mo hlankela gotee le rena.—Joh. 14:15, 21.