Batho ba Mehuta Yohle ba tla Phološwa
1. Boemo bja rena le Modimo bo ithekgile ka’ng?
1 Botho bja Modimo bjo bo sa swanelago bo butše tsela e išago phološong. Ke thato ya Jehofa gore “batho bohle ba phološwê ba fihlêlê tsebô ya therešô.” (1 Tim. 2:3, 4) Boemo bja rena le Modimo ga se bja ithekga ka morafo wa rena, boemo bja rena setšhabeng, bokgoni bja rena goba ponagalo ya rena ya ka ntle, eupša bo ithekgile ka go ba ga rena le tumelo sehlabelong sa Jesu sa topollo. (Joh. 3:16, 36) Re le badirišani-gotee le Modimo, re swanetše go tumola mokgwa le ge e le ofe wa go beba sefahlego wo re ka bago re e-na le wona woo o ka tutuetšago dipelo tša rena gore di gane batho bao Jehofa a ikemišeditšego go ba amogela.
2, 3. Ke’ng seo se ka re thušago gore re se ke ra ahlola batho go ya ka ponagalo ya bona ya ka ntle?
2 Phema go Ahlola: Jehofa o lebelela seo batho ba lego sona ka gare, ka ntle le go bontšha lehloyo goba go beba sefahlego. (1 Sam. 16:7) Le gona o bona seo ba ka kgonago go ba sona. Ka gona, o lebelela bao ba nyakago go mo thabiša e le ba ba rategago. (Hag. 2:7) Na re lebelela ba bangwe ka tsela yeo Modimo a ba lebelelago ka yona?
3 Batho ba bangwe bao re gahlanago le bona bodireding ba ka re makatša ka ponagalo ya bona. Ba ka apara mankgeretla goba ba apara ka tsela e sa swanelago, ba ba le ditedu tša mahlafarara goba ba rwala mangina nkong goba molomong. Ba bangwe ba ka ba ba se na magae. Ba bangwe ba ka re swara ka tsela e sehlogo. Go e na le go ahlola batho ba bjalo e le bao le ka mohla ba ka se kego ba ba barapedi ba Jehofa, re swanetše go ba le boemo bjo bobotse bja kgopolo, “xobane le rena kxalê re be re le mašilo, rè le batho ba ba sa kwexo, [e bile] rè timetše.” (Tito 3:3) Ge re lemoga se, re tla fišegela go dira boboledi go motho yo mongwe le yo mongwe, gaešita le go bao go ya ka ponagalo ya bona ya ka ntle, ba ka bonagalago ba sa swanelege.
4, 5. Re ithuta’ng mohlaleng wa Jesu le wa Paulo?
4 Mehlala ya Lekgolong la Pele la Nywaga: Jesu Kriste o ile a ipha nako ya go thuša ba ba bego ba lebelelwa e le bao ba se nago kholofelo. (Luka 8:26-39) Le ge le ka mohla a sa ka a hlokomologa ditiro tše di fošagetšego, o be a tseba gore batho ba be ba ka tsena tseleng e fošagetšego ya bophelo. (Luka 7:37, 38, 44-48) Ka gona, o ile a ipontšha a kwešiša, “a ba šôkêlwa xobane ba be ba le byalo ka dinku tše di se naxo modiši.” (Mar. 6:34) Na re ka ekiša mohlala wa gagwe ka mo go feletšego?
5 Moapostola Paulo o ile a kgatlwa ka mafsika, a bethwa a ba a golegwa. (Dit. 14:19; 16:22, 23) Na diphihlelo tše bjalo tše šoro di ile tša mo dira gore a tlale lehloyo gomme a phethe ka gore o be a senya nako ya gagwe bathong ba ditšhaba tše itšego le ba merafo e itšego? Le gatee. O be a tseba gore batho ba dipelo tše di botegago ba be ba ka hwetšwa merafong ka moka, gomme o be a ikemišeditše go ba hwetša. Na yeo ke tsela ye re lebelelago batho bao ba lego tikologong ya gabo rena bao ba tšwago ditlogong le ditšong tše di sa swanego?
6. Boemo bja rena bja kgopolo bo ka kgoma bjang bao ba sa tšwago go thoma go kopanela dibokeng tša phuthego?
6 Go Amogela ba Bangwe Lehono: Batho ba Modimo ba bantši ba thabela gore ba ile ba amogelwa ka phuthegong ke bana babo rena le dikgaetšedi bao ba ilego ba hlokomologa ponagalo ya ka ntle. Monna yo a nago le ditedu tša mahlafarara le meriri yeo e fihlago magetleng, yo a aperego diaparo tša ditšhila, o ile a fihla Holong ya Mmušo ya kua Jeremane. O be a tumile gampe. Lega go le bjalo, o ile a amogelwa ka borutho dibokeng. O be a kgahlegile kudu moo a ilego a boa gape bekeng e latelago. Ka nako e sa fetšego pelo, o ile a hlwekiša ponagalo ya gagwe, a tlogela go kgoga gomme a nyalana le kgarebe ya gagwe ka molao. Go se go ye kae, bona le bana ba bona ba be ba hlankela Jehofa e le lapa le le kopanego.
7. Re ka ekiša bjang Modimo wa rena yo a sa bebego sefahlego?
7 E le go ekiša Modimo wa rena yo a sa bebego sefahlego, eka re ka laletša motho yo mongwe le yo mongwe gore a tlo holwa ke botho bja Modimo bjo bo sa swanelago.
[Seswantšho go letlakala 3]
“Modimo xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.”—Dit. 10:34, 35.