Phegelelang go Direng Boboledi
1 Re dinakong tše di hlobaetšago. Dintwa tša selegae, dintwa tša merafo, dikotsi tša tlhago le ditiragalo tše dingwe tše di boifišago di tlwaelegile. Gona bjale, go feta le ge e le neng pele, moloko wa batho o nyaka ditaba tše dibotse. Lega go le bjalo, go hlokomologa dilo tša moya go apareditše. Mafelong a mangwe, go ka ba thata go hwetša batho ka gae e bile go ka ba thata kudu go hwetša batho bao ba tla re theetšago goba bao ba nyakago go ithuta Beibele. Gaešita le ge go le bjalo, go bohlokwa gore re phegelele go bolela ditaba tše dibotse tša Mmušo wa Modimo o hlomilwego.—Mat. 24:14.
2 Go Rata Batho: Go dira ga rena boboledi go gatelela lerato la Jehofa bathong. “Xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (2 Pet. 3:9; Hesek. 33:11) Ka baka leo, go etša ge Jesu a boletše, o laetše gore, “ebangedi e swanetše xo kwatšwa pele dithšabeng ka moka.” (Mar. 13:10, mongwalo o sekamego ke wa rena.) Modimo o ipiletša go batho gore ba retologele go yena gomme ba pheme kahlolo e tlelago lefase la Sathane. (Joele 2:28, 29, 32; Tsef. 2:2, 3) Na ga re leboge gore Jehofa o re neile sebaka seo?—1 Tim. 1:12, 13.
3 Pego ya lefase ka bophara e bontšha gore ngwageng wa tirelo wa 2004, go ile gwa swarwa palo-gare ya dithuto tša Beibele tše 6 085 387 kgweding e nngwe le e nngwe, gomme gwa kolobetšwa palo-gare ya barutiwa ba bafsa ba ka bago 5 000 bekeng e nngwe le e nngwe! Ba bangwe ba batho ba bao ba sa tšwago go ineela ba ile ba hwetšwa ka baka la tšhegofatšo ya Jehofa maitekong a go phegelela ga bagoeledi bao ba ilego ba katanela go bolela le motho yo mongwe le yo mongwe tšhemong yeo ba e abetšwego. Seo se ile sa tliša lethabo le legolo gakaakang ka diphuthegong, le gona ke tokelo e kgolo gakaakang go ba badirišani-gotee le Modimo modirong wo o phološago bophelo!—1 Ba-Kor. 3:5, 6, 9.
4 Go Reta Leina la Modimo: Re phegelela go direng boboledi e le gore re rete Jehofa phatlalatša le gore re kgethagatše leina la gagwe bathong ka moka. (Ba-Heb. 13:15) Sathane o timeditše “lefase ka moka la batho” gore le dumele gore Modimo ga a na matla a go rarolla mathata a batho, gore ga a na taba le go tlaišega ga batho goba gore o fo ba a se gona. (Kut. 12:9) Ka go dira ga rena boboledi, re emela therešo mabapi le Tatago rena yo a kgahlišago wa legodimong. Anke re tšweleng pele re reta leina la gagwe—gona bjale le ka mo go sa felego.—Ps. 145:1, 2.