Dira Botse Gomme o Abelane le ba Bangwe
1 Doroka “medirô e mebotse ya xaxwe e be e le e mentši; le xo hlallêla badiidi ka kxauxêlô è le [mo] xontši.” (Dit. 9:36, 39) Moya wa gagwe wa go nea ka seatla se se bulegilego o ile wa dira gore a ratwe ke batho bao ba bego ba mo tseba le ke Jehofa Modimo. Ba-Hebere 13:16 e re: “Le se kê le lebala xo dira batho xa-botse le xo ba nea; xobane Modimo ó kxahlwa ke didimo tše byalo.” Re ka dira botse bjang le go abelana le ba bangwe lehono?
2 Tsela e nngwe yeo re ka holago ba bangwe ka yona ke ka go abelana ka “khumô” ya rena. (Die. 3:9) Meneelo ya rena modirong wa lefase ka bophara e dira gore go kgonege go aga Diholo tša Mmušo, Diholo tša Kopano le meago ya lekala lefaseng ka bophara. Go nea ga rena ka seatla se se bulegilego go thušitše ba dimilione gore ba holwe ke thuto ya pušo ya Modimo le segwera se se agago sa moya.
3 Go Homotšana: Ge go hlaga kotsi, batho ba Jehofa ba ikemišeditše go ‘dira botse’ go badumedi-gotee le bona gotee le go bao e sego badumedi-gotee le bona. (Ba-Gal. 6:10) Ka morago ga go thuthupa ga intaseteri ya dikhemikhale kua Fora, banyalani ba bangwe bao ba bego ba dula kgaufsi le intaseteri yeo ba boletše gore: “Bana babo rena ba Bakriste ba ile ba tla ka yona nako yeo go tla go thuša go hlwekiša lefelo la rena la bodulo gotee le a ba bangwe moagong. Baagišani ba rena ba be ba makaditšwe ke go bona gore batho ba bantši gakaakaa ba tlile go thuša.” Kgaetšedi yo mongwe o okeditše ka gore: “Bagolo ba ile ba re thuša. Ba ile ba tla go tlo re kgothatša. Ge e le gabotse, se ke seo re bego re se nyaka go feta thušo ya dilo tše di bonagalago.”
4 Gaešita le ge go e-na le ditsela tše dintši tše re ka dirago botse ka tšona go baagišani ba rena, tsela e holago kudu ye re ka ba thušago ka yona ke ka go boledišana le bona ka tsebo e bohlokwa ya therešo, yeo e akaretšago “xo holofêla bophelô byo bo sa felexo” bjo bo holofeditšwego ke Jehofa ka boyena. (Tito 1:1, 2) Molaetša wa Beibele o tliša khomotšo ya kgonthe go bao ba nyamišitšwego ke maemo a lefase le boemo bja bona ka noši bja sebe. (Mat. 5:4) Anke re direng botse gomme re abelane le ba bangwe ge re kgona go dira bjalo.—Die. 3:27.