“Ga go yo a Nago le Lerato le le Fetago le”

1-4. (a) Go direga’ng ge Pilato a ntšhetša Jesu lešabeng leo le galefilego leo le kgobokanego ka ntle ga ntlo ya mmuši? (b) Jesu o arabela bjang ge a gobošwa le go tlaišwa, gona ke dipotšišo dife tše bohlokwa tšeo di rotogago?

“BONANG motho yo!” Ka mantšu ao, Mmuši wa Moroma Pontio Pilato o ntšhetša Jesu Kriste go sehlopha seo se galefilego seo se lego ka ntle ga ngwako wa mmuši mesong ya letšatši la Paseka ya 33 C.E. (Johane 19:5) Matšatši a mmalwa pejana, Jesu o be a retwa ke mašaba a batho ge a be a tsena Jerusalema ka phenyo e le Kgoši e kgethilwego ke Modimo. Lega go le bjalo, bošegong bjo lešaba leo le galefilego le na le pono e fapanego ka yena.

² Jesu o apešitšwe seaparo se se phepolo sa go swana le seo se aparwago ke batho ba ka bogošing, gomme o rwešitšwe mphapahlogo. Eupša seaparo se seo se pharilwego godimo ga megogoma yeo e nago le madi mokokotlong wa gagwe, le mphapahlogo woo o dirilwego ka meetlwa e logagantšwego gomme wa gatelelwa hlogong ya gagwe yeo ga bjale e tšwago madi, ke pontšho ya gore go kwerwa boemo bja gagwe bja bogoši. Lešaba leo le tutuetšwago ke baperisita ba bagolo, le gana monna yo yo a se nago bobono yo a emego pele ga lona. Baperisita ba a goeletša, ba re: “Mo kokotele koteng! Mo kokotele koteng!” Ba dumile go bolaya ka dipelong tša bona, ba goeletša ba re: “O swanetše go hwa.”—Johane 19: 1-7.

³ Ka ntle le go ngongorega Jesu ka seriti le sebete o kgotlelela go gobošwa le go tlaišwa.a O ikemišeditše ka mo go feletšego go hwa. Ka moragonyana Letšatšing leo la Paseka, o ineela lehung leo le kwešago bohloko koteng ya tlhokofatšo.—Johane 19:17, 18, 30.

⁴ Jesu ka go gafa bophelo bja gagwe o itlhatsetše e le mogwera wa kgonthe go balatedi ba gagwe. O itše: “Ga go yo a nago le lerato le le fetago le, gore motho a gafe moya wa gagwe ka baka la bagwera ba gagwe.” (Johane 15:13) Taba yeo e rotoša dipotšišo tše bohlokwa. Na go be go tloga go nyakega gore Jesu a tlaišwe ka tsela yeo gomme mafelelong a hwe? Ke ka baka la’ng a be a ikemišeditše go dira bjalo? Ka ge re le “bagwera ba gagwe” le balatedi ba gagwe, re ka ekiša mohlala wa gagwe bjang?

Ke ka Baka La’ng go be go Nyakega Gore Jesu a Tlaišwe le go hwa?

5. Jesu o tsebile bjang diteko tšeo ka go lebanya di bego di tla mo wela?

⁵ Ka ge Jesu e le Mesia yo a holofeditšwego, o be a tseba seo se tlago go mo diragalela. O be a tseba ka diporofeto tše dintši ka Mangwalong a Seheberu tšeo di boletšego e sa le pele le ka mo go kwagalago ka tlaišo le lehu tšeo Mesia a bego a tlo lebana le tšona. (Jesaya 53:3-7, 12; Daniele 9:26) Ka makga a go feta letee, o ile a tsebiša barutiwa ba gagwe e sa le pele ka diteko tšeo di bego di mo letetše. (Mareka 8:31; 9:31) Tseleng ya go ya Jerusalema go yo swara Paseka la mafelelo, o ile a botša baapostola ba gagwe ka go lebanya gore: “Morwa wa motho o tla gafelwa baperisita ba bagolo le bamangwalo. Ba tla mo ahlolela lehu ba mo gafela batho ba ditšhaba, gomme bona bao ba tla dira metlae ka yena, ba mo tshwela ka mare ba mo otla le go mmolaya.” (Mareka 10:33, 34) Ye e be e se feela polelo ya go hlabiša legano phefo. Ka ge re bone, Jesu o ile a kwerwa e le ka kgonthe, a tshwelwa ka mare, a otlwa gomme a bolawa.

6. Ke ka baka la’ng go be go nyakega gore Jesu a tlaišege le go hwa?

⁶ Lega go le bjalo, ke ka baka la’ng go be go le bohlokwa gore Jesu a tlaišwe le go hwa? Ka baka la mabaka a mmalwa a bohlokwa. Lebaka la pele ke gore ka go dula a botega, Jesu o be a tla hlatsela gore o a botega le go godiša bogoši bja Jehofa. Gopola gore Sathane o ile a bolela maaka a gore batho ba hlankela Modimo e le feela ka baka la boithati. (Jobo 2:1-5) Jesu ka go dula a botega “go fihla lehung . . . koteng ya tlhokofatšo,” o arabile ka mo go feletšego tatofatšo ya Sathane yeo e se nago motheo. (Bafilipi 2:8; Diema 27:11) Lebaka la bobedi ke gore go tlaišwa ga Mesia le go hwa ga gagwe go be go tla boelanya batho le Modimo. (Jesaya 53:5, 10; Daniele 9:24) Jesu o neile “moya wa gagwe gore e be topollo bakeng sa ba bantši,” a re bulela tsela ya go ba le tswalano yeo e amogelegago le Modimo. (Mateo 20:28) Lebaka la boraro ke gore ka go kgotlelela mehuta ka moka ya tlaišo, Jesu “ke yo a lekilwego ka ditsela tšohle go swana le rena.” Ka baka leo ke Moperisita yo a Phagamego yo a nago le lešoko, yo a kgonago go re “kwela bohloko bofokoding bja rena.”—Baheberu 2:17, 18; 4:15.

Ke ka Baka La’ng Jesu a be a Ikemišeditše go Gafa Bophelo bja Gagwe?

7. Jesu o gafile eng ge a etla lefaseng?

⁷ Go kwešiša gabotse seo Jesu a bego a ikemišeditše go se dira, nagana ka taba ye: Ke motho ofe yo a bego a ka tlogela lapa la gagwe le legae la gagwe gomme a ya nageng e šele ge e ba a tseba gore batho ba bantši ba naga yeo ba be ba tla mo latola, le gore o be a tla gobošwa le go tlaišwa, ke moka mafelelong a bolawa? Ga bjale hlokomela seo Jesu a se dirilego. Pele a etla lefaseng, o be a na le maemo a kgethegilego kua legodimong ka lehlakoreng la Tatagwe. Lega go le bjalo, Jesu ka go rata o ile a tlogela legae la gagwe la legodimong gomme a tla lefaseng gore e be motho. O tlogile a tseba gore o tlo latolwa ke batho ba bantši le gore o tlo gobošwa o šoro, a tlaišwa ka sehlogo le go hwa gabohloko. (Bafilipi 2:5-7) Ke’ng seo se ilego sa tutuetša Jesu gore a ikgafe ka tsela ye?

8, 9. Ke’ng seo se tutueleditšego Jesu go gafa bophelo bja gagwe?

⁸ Go feta tšohle, Jesu o be a tutuetšwa ke lerato le legolo leo a ratago tatagwe ka lona. Kgotlelelo ya Jesu e bile bohlatse bja gore o rata Jehofa. Lerato leo le ile la dira gore Jesu a tshwenyege ka leina la Tatagwe le botumo bja lona. (Mateo 6:9; Johane 17:1-6, 26) Sa bohlokwa kudu, Jesu o be a nyaka go bona leina la Tatagwe le tlošwa kgobošo ka moka yeo e pharilwego go lona. Ka gona Jesu o ile a bona e le kgodišo le tokelo go tlaišega ka baka la toko, ka ge a be a tseba gore potego ya gagwe e tla phetha karolo e kgolo go kgethagatšeng leina la Tatagwe le lebotse le la go hlomphega.—1 Dikoronika 29:13.

⁹ Jesu o be a tutueditšwe ke lebaka le lengwe gape gore a gafe bophelo bja gagwe—go rata batho. Le ke lerato leo le thomilego mathomong a histori ya batho. Nako e telele pele Jesu a etla lefaseng, Beibele e utolla gore o be a ikwa ka tsela ye: “Dilo tšeo di bego di nkgahla e be e le bana ba batho.” (Diema 8:30, 31) Lerato la gagwe le bonagetše gabotse ge a be a le mo lefaseng. Ka ge re bone dikgaolong tše tharo tše di fetilego tša puku ye, Jesu o bontšhitše ka ditsela tše dintši lerato la gagwe la go rata batho ka kakaretšo le go rata balatedi ba gagwe ka mo go kgethegilego. Eupša ka Nisani 14, 33 C.E., o ile a gafa bophelo bja gagwe ka go rata ka baka la rena. (Johane 10:11) Ruri go be go se na tsela e kaone ya go bontšha lerato leo a re ratago ka lona go feta yeo. Na le rena re swanetše go mo ekiša tabeng ye? Ee. Ge e le gabotse, re laelwa go dira bjalo.

‘Le Ratane go Etša ge ke le Ratile’

10, 11. Ke taelo efe e mpsha yeo Jesu a e neilego balatedi ba gagwe, e akaretša’ng, gona ke ka baka la’ng go le bohlokwa gore re e latele?

¹⁰ Bošegong bja pele Jesu a ehwa, o boditše barutiwa ba gagwe ba kgauswi gore: “Ke le nea taelo e mpsha ya gore le ratane; go etša ge ke le ratile, gore le lena le ratane. Bohle ba tla tseba ka se gore le barutiwa ba ka, ge e ba le ratana.” (Johane 13:34, 35) “Le ratane”—ke ka baka la’ng seo e le “taelo e mpsha”? Molao wa Moshe o be o šetše o laetše gore: “O rate wa geno ka mokgwa wo o ithatago ka wona.” (Lefitiko 19:18) Eupša taelo e mpsha e be e nyaka gore ba bontšhe lerato le legolo, lerato leo le bego le tla re tutueletša go gafa maphelo a rena bakeng sa ba bangwe. Jesu ka boyena o hlalositše se gabotse ge a be a re: “Ye ke taelo ya ka, gore le ratane go etša ge ke le ratile. Ga go yo a nago le lerato le le fetago le, gore motho a gafe moya wa gagwe ka baka la bagwera ba gagwe.” (Johane 15:12, 13) Taelo ye e mpsha ge e le gabotse e re: “O se rate batho ba bangwe kamoo o ithatago ka gona, eupša o ba rate go feta kamoo o ithatago ka gona.” Tsela yeo Jesu a bego a phela ka yona le yeo a hwilego ka yona ka kgonthe e beile mohlala wa lerato le bjalo.

¹¹ Ke ka baka la’ng go le bohlokwa gore re latele taelo yeo e mpsha? Gopola gore Jesu o itše: “Bohle ba tla tseba ka se [lerato la boikgafo] gore le barutiwa ba ka.” Ee, lerato la boikgafo le re hlaola re le Bakriste ba therešo. Re ka bapiša lerato le le petšhe yeo e hlaolago motho. Bao ba bago gona dikopanong tša ngwaga le ngwaga tša Dihlatse tša Jehofa ba rwala dipetšhe. Petšhe e hlaola motho yo a e rwelego, e bontšha leina la gagwe le la phuthego. Lerato la boikgafo la go rata motho yo mongwe le swana le “petšhe” yeo e hlaolago Bakriste ba therešo. Ka mantšu a mangwe, lerato leo re le bontšhago batho ba bangwe le swanetše go bonagala gabotse go swana le leswao, goba petšhe, le botše babogedi gore re tloga re le balatedi ba kgonthe ba Kriste. Yo mongwe le yo mongwe wa rena o dira gabotse go ipotšiša gore: ‘Na “petšhe” yeo e hlaolago lerato la boikgafo e a bonagala bophelong bja ka?’

Lerato la Boikgafo—le Akaretša Eng?

12, 13. (a) Re swanetše go ikgafa go fihla bokgoleng bofe go bontšha gore re a ratana? (b) Go ikgafa go bolela’ng?

¹² Ka ge re le balatedi ba Jesu, re swanetše go ratana bjalo ka ge a re ratile. Se se bolela gore re swanetše go ikemišetša go ikgafa bakeng sa bana babo rena. Re swanetše go ikgafa go fihla bokgoleng bofe? Beibele e re botša gore: “Re tsebile lerato ka se, gobane o gafile moya wa gagwe bakeng sa rena; e bile re tlamegile go gafa meoya ya rena bakeng sa bana babo rena.” (1 Johane 3:16) Ka go swana le Jesu, re swanetše go ikemišetša go hwela bana babo rena ge go kgonega. Dinakong tša tlaišo, re ka upša ra gafa maphelo a rena go e na le go rekiša bana babo rena ba moya gomme ra feleletša re beile maphelo a bona kotsing. Ge re phela dinageng tšeo batho ba arogantšwego ke go se kwane ga merafo goba ditšo, re tla bea maphelo a rena kotsing e le gore re šireletše bana babo rena, go sa šetšwe morafo goba setšo sa bona. Ge ditšhaba di eya ntweng, re tla ikemišetša go golegwa goba go hwa go e na le go lwantšha badumedigotee le rena—goba gaešita le motho le ge e le ofe.—Johane 17:14, 16; 1 Johane 3:10-12.

¹³ Go ikemišetša go gafa maphelo a rena bakeng sa bana babo rena ga se feela tsela ya go bontšha lerato la boikgafo. Ge e le gabotse, ga se ba bantši ba rena bao ba ilego ba gapeletšega go ikgafa ka tsela e bjalo e kgolo. Lega go le bjalo, ge e ba re rata bana babo rena ka mo go lekanego go ka ba hwela, na ga se ra swanela go ikemišetša go ikgafa dilong tše dinyenyane bakeng sa bona, ra ba direla dilo tšeo re bego re ka se di dire e le go ba thuša gona bjale? Go ikgafa go bolela go gafa dibaka tše di re holago goba boiketlo bja rena bakeng sa go hola ba bangwe. Re bea dinyakwa tša bona le dikgahlego tša bona pele ga tša rena gaešita le ge seo se re šitela. (1 Bakorinthe 10:24) Re ka bontšha lerato la boikgafo ka ditsela dife tše di holago?

Ka Phuthegong le ka Lapeng

14. (a) Go letetšwe gore bagolo ba ikgafe bjang? (b) O ikwa bjang ka bagolo bao ba šomago ka thata phuthegong ya geno?

¹⁴ Bagolo ba phuthego ba ikgafa dilong tše dintši gore ba ‘diše mohlape.’ (1 Petro 5:2, 3) Go tlaleletša boikarabelong bja go hlokomela malapa a bona, ba ka swanelwa ke go diriša nako ya bona bošego goba mafelobekeng go hlokomela dinyakwa tša phuthego, go akaretša go lokišetša dikabelo tša bona tša diboka, go dira maeto a bodiši, le go swaragana le melato ya boahlodi. Bagolo ba bantši ba ikgafa ka mo go oketšegilego, ba šoma ka thata dikopanong tše dinyenyane le tše dikgolo le go hlankela e le ditho tša Dikomiti tša go Hloma Kwano le Dipetlele, Dihlopha tša go Etela Balwetši le Dikomiti tša Meago tša Tikologo. Lena bagolo, le se ke la lebala gore ge le hlankela ka moya wa go rata—le diriša nako ya lena, matla le dilo tša lena tše di bonagalago go diša mohlape—le bontšha lerato la boikgafo. (2 Bakorinthe 12:15) Maiteko a lena ao e sego a boithati ga a lebogwe feela ke Jehofa eupša a lebogwa le ke phuthego yeo le e dišago.—Bafilipi 2:29; Baheberu 6:10.

15. (a) Basadi ba bagolo ba ikgafa ka ditsela dife tše dingwe? (b) O ikwa bjang ka basadi ba thekgago banna ba bona ge ba gafa nako ya bona go thuša phuthego ya geno?

¹⁵ Lega go le bjalo, go thwe’ng ka basadi ba bagolo—na basadi ba bao ba thekgago banna ba bona ga ba ikgafe e le gore banna ba bona ba ka hlokomela mohlape? Ka kgonthe mosadi wa mogolo o a ikgafa ge monna wa gagwe a diriša nako yeo a ka bego a e diriša le lapa bakeng sa dinyakwa tša phuthego. Nagana gape le ka basadi ba balebeledi ba basepedi le ka boikgafo bjoo ba bo dirago ge ba sepela le banna ba bona go tloga phuthegong e nngwe go ya go e nngwe le go tloga tikologong e nngwe go ya go e nngwe. Ba gafa go ba le magae a bona e bile mohlomongwe ba swanelwa ke go robala mepeteng e fapafapanego beke e nngwe le e nngwe. Basadi bao ka go rata ba etišago dikgahlego tša phuthego pele ga tša bona ba swanetše go retwa bakeng sa go bontšha ga bona lerato la boikgafo.—Bafilipi 2:3, 4.

16. Batswadi ba Bakriste ba ikgafa bjang bakeng sa bana ba bona?

¹⁶ Re ka bontšha bjang lerato la boikgafo ka lapeng? Lena batswadi, le ikgafa gantši bakeng sa go fepa bana ba lena le go ba godiša “ka tayo le temošo ya Jehofa.” (Baefeso 6:4) Le ka swanelwa ke go šoma diiri tše ditelele mešomong e lapišago e le feela gore bana ba lena ba hwetše dijo le go kgonthiša gore ba ba le diaparo tše di lekanego le moo ba ka fihlago hlogo. Le bona go le kaone gore le hloke dilo tše itšego go e na le gore bana ba lena ba hloke dinyakwa tša bophelo. Le gona le ikgafa ka mo go oketšegilego ka go ithuta le bana ba lena, go ya le bona dibokeng tša Bokriste le go šoma le bona bodireding bja tšhemo. (Doiteronomio 6:6, 7) Lerato la lena la boikgafo le kgahla Mothomi wa malapa gomme le ka dira gore bana ba lena ba hwetše bophelo bjo bo sa felego.—Diema 22:6; Baefeso 3:14, 15.

17. Banna ba Bakriste ba ka ekiša bjang boemo bja kgopolo bja Jesu bja go ikgafa?

¹⁷ Lena banna, le ka ekiša bjang Jesu go bontšha lerato la boikgafo? Beibele e araba ka gore: “Banna, tšwelang pele le rata basadi ba lena go etša ge Kriste le yena a ratile phuthego gomme a ikgafa ka baka la yona.” (Baefeso 5:25) Ka ge re bone, Jesu o ile a rata balatedi ba gagwe kudu moo a ilego a ba hwela. Monna yo a nyetšego o ekiša boemo bja kgopolo bja boikgafo bja Jesu, e lego yo a ‘sa kago a ikgahliša.’ (Baroma 15:3) Monna yo bjalo ka go rata o etiša dinyakwa le dikgahlego tša mosadi wa gagwe pele ga tša gagwe. Ga a gapeletše gore dilo di dirwe ka tsela ya gagwe, eupša o bontšha tekatekano ge go se na molao wa motheo wa Mangwalo o tlago go tshelwa. Monna yo a bontšhago lerato la boikgafo o amogelwa ke Jehofa gomme o dira gore mosadi wa gagwe le bana ba mo rate le go mo hlompha.

O tla Dira’ng?

18. Ke’ng seo se re tutuetšago go latela taelo e mpsha ya gore re ratane?

¹⁸ Go latela taelo e mpsha ya gore re ratane ga go bonolo, eupša re na le lebaka le le kwagalago kudu la go dira bjalo. Paulo o ngwadile gore: “Lerato leo Kriste a nago le lona le a re tutuetša, gobane re phethile ka gore motho o tee o hwetše bohle . . . , o hwetše bohle gore bao ba phelago ba se sa hlwa ba iphelela, eupša ba phelele yena yo a ba hwetšego gomme a tsošwa.” (2 Bakorinthe 5:14, 15) Ka ge Jesu a re hwetše, na ga se ra swanela go ikwa re gapeletšega go mo phelela? Re ka dira seo ka go latela mohlala wa gagwe wa go bontšha lerato la boikgafo.

19, 20. Ke mpho efe e bohlokwa yeo Jehofa a re neilego yona, gona re ka bontšha bjang gore re a e amogela?

¹⁹ Jesu o be a sa feteletše dilo ge a re: “Ga go yo a nago le lerato le le fetago le, gore motho a gafe moya wa gagwe ka baka la bagwera ba gagwe.” (Johane 15:13) Go ikemišetša ga gagwe go gafa bophelo bja gagwe bakeng sa rena e bile pontšho e kgolo ya lerato leo a re ratago ka lona. Lega go le bjalo, go na le yo a re bontšhitšego lerato la go feta leo. Jesu o hlalositše gore: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Modimo o re rata kudu moo a ilego a gafa Morwa wa gagwe gore e be topollo, a dira gore re kgone go lopollwa sebeng le lehung. (Baefeso 1:7) Topollo ke mpho e bohlokwa e tšwago go Jehofa, eupša ga a re gapeletše go e amogela.

²⁰ Go tšwa go rena gore re amogela mpho yeo e tšwago go Jehofa goba ga re e amogele. Bjang? Ka go ‘dumela’ go Morwa wa gagwe. Lega go le bjalo, ga se gwa lekana go fo bolela gore re na le tumelo. E hlatselwa ka mediro, ka tsela yeo re phelago ka yona. (Jakobo 2:26) Re hlatsela go dumela ga rena go Jesu Kriste ka go mo latela letšatši le lengwe le le lengwe. Go dira bjalo go tla tliša ditšhegofatšo tše dintši gona bjale le nakong e tlago, ka ge kgaolo ya mafelelo ya puku ye e tla hlalosa.