BOITSHWARO Ke Seka Seo se re Thušago Gore re be le Segwera se Sebotse le Modimo

Paul o itše: “Ge nna le motswala wa ka re be re ngangišana ka selo se itšego, ke ile ka mo swara ka megolo gomme ka mo kgamelela. Ke be ke nyaka go mmolaya.”

Marco o itše: “Ge ke be ke le ka gae, ke be ke le motho wa go felafela pelo. Ke be ke pšhatlaganya fenitšhara, dithoye goba selo le ge e le sefe seo ke se bonago.”

Rena re ka no se galefe go swana le batho ba ba babedi. Eupša ka moka ga rena re fela re palelwa ke go itshwara. Se se dirwa ke gore re belegwe re na le sebe ka baka la Adama. (Baroma 5:12) Go swana le Paul le Marco, batho ba bangwe ba palelwa ke go itshwara ge ba galefile. Ba bangwe ga ba kgone go laola dilo tšeo ba di naganago. Ba dula ba nagana ka dilo tšeo ba di boifago le dilo tšeo di ka ba nyamišago. E bile ba bangwe ga ba kgone go itshwara ge go tliwa go tša thobalano, ba nwa bjala kudu e bile ba diriša dihlaretagi gampe.

Batho bao ba sa kgonego go laola tsela yeo ba naganago ka yona, dikganyogo tša bona le ditiro tša bona, ba ka itshenyetša bophelo. Eupša go ka kgonega gore re se ke ra itshenyetša bophelo. Bjang? Ka go ithuta go ba le boitshwaro. E le go re thuša gore re be le boitshwaro, re tlo boledišana ka dipotšišo tše tše tharo: (1) Boitshwaro ke eng? (2) Ke ka baka la’ng re swanetše go ba le boitshwaro? (3) Re ka dira’ng gore re be le seka se seo se “enywago ke moya” wa Modimo? (Bagal. 5:22, 23) E bile re tlo bolela ka seo yo mongwe le yo mongwe wa rena a ka se dirago ge e ba ka dinako tše dingwe re sa kgone go itshwara.

BOITSHWARO KE ENG?

Motho yo a nago le boitshwaro ga a laolwe ke maikwelo. Go e na le moo, o a itshwara e le gore a se ke a bolela goba a dira dilo tšeo di ka se kgahlišego Modimo.

Jesu o re beetše mohlala wa go ba le boitshwaro. Beibele e re: “Ge a be a rogwa gabohloko, ga se a ka a ithogela. Ge a be a tlaišega, ga se a ka a tšhošetša motho, eupša o ile a ikgafela yo a ahlolago ka go loka.” (1 Pet. 2:23) Jesu o ile a bontšha boitshwaro ge manaba a gagwe a be a mo kwera ge a be a fegilwe koteng. (Mat. 27:39-44) Le gona o ile a bontšha go ba le boitshwaro ka tsela e makatšago ge baganetši ba gagwe ba be ba nyaka go mo tanya ka dilo tšeo a bego a di bolela. (Mat. 22:15-22) Le gona, o ile a bea mohlala o mobotse kudu ge Bajuda ba bangwe ba be ba topa maswika gore ba mo foše ka ona. Go e na le gore a itefeletše, “Jesu [o ile] a khuta gomme a tšwa tempeleng.”—Joh. 8:57-59.

Na re ka kgona go ekiša mohlala wa Jesu? Ee re ka kgona. Eupša re ka se kgone go ba le boitshwaro go swana le yena ka ge yena a be a phethagetše. Moapostola Petro o ngwadile gore: “Kriste o ile a tlaišega bakeng sa lena, a le tlogelela mohlala gore le latele dikgato tša gagwe kgauswi.” (1 Pet. 2:21) Le ge rena re belegwe re na le sebe, re ka kgona go latela dikgato tša Jesu kgauswi ge go tliwa tabeng ya boitshwaro. Ke ka baka la’ng go le bohlokwa gore re dire seo?

KE KA BAKA LA ENG GO LE BOHLOKWA GORE RE BE LE BOITSHWARO?

Re swanetše go ba le boitshwaro e le gore Jehofa a tle a re amogele. Le ge re ka ba re na le nako e telele re hlankela Jehofa ka go botega, segwera sa rena le yena se ka senyega ge e ba re sa laole seo re se bolelago le seo re se dirago.

Nagana ka Moshe yoo e bego e le “motho yo boletaleta go feta batho bohle bao ba bego ba phela lefaseng” ka nako yeo. (Num. 12:3) Ka morago ga go fetša mengwaga e mentši a kgotleletše ge Baisiraele ba be ba ngongorega, ka letšatši le lengwe o ile a palelwa ke go itshwara. O ile a galefa kudu ge ba be ba ngongorega gape gore ga ba na meetse. O ile a bolela le Baisiraele ka bogale a re: “Bjale ekwang, marabele ke lena! Na le nyaka gore re le ntšhetše meetse leswikeng le?”—Num. 20:2-11.

Moshe o ile a palelwa ke go itshwara. Ga se a ka a reta Jehofa gore ke yena a bego a ntšheditše Baisiraele meetse leswikeng leo. (Ps. 106:32, 33) Ka baka leo, Jehofa ga se a ka a mo dumelela gore a tsene Nageng ya Kholofetšo. (Num. 20:12) Go ka direga gore Moshe o ile a itshola go ba go fihla letšatšing leo a hwilego ka lona gore o ile a palelwa ke go itshwara.—Doit. 3:23-27.

Re ithuta’ng go se? Re ithuta gore le ge re ka ba re na le nako e telele re hlankela Jehofa, ga se ra swanela go nyatša batho bao ba re galefišago goba bao re swanetšego go ba nea tayo. (Baef. 4:32; Bakol. 3:12) Ge re dutše re tšofala, ka dinako tše dingwe re ka no felafela pelo. Eupša re swanetše go dula re gopola seo se ilego sa diragalela Moshe. Ga re nyake go senya segwera sa rena se sebotse le Jehofa seo re se šometšego ka nako e telele, ka go hloka boitshwaro gateenyana. Re ka dira’ng gore re be le seka se se bohlokwa?

RE KA DIRA ENG GORE RE BE LE BOITSHWARO?

Rapelela moya o mokgethwa. Ka baka la’ng? Ka gobane boitshwaro ke se sengwe sa dika tšeo di enywago ke moya wa Modimo, gomme Modimo o nea bao ba mo kgopelago moya wa gagwe. (Luka 11:13) Modimo a ka diriša moya woo wa gagwe go re thuša gore re kgone go ba le boitshwaro. (Bafil. 4:13) Le gona, a ka re thuša gore re kgone go ba le dika tše dingwe tšeo di enywago ke moya wa gagwe go swana le lerato, e lego dika tšeo di tlago go re thuša gore re kgone go ba le boitshwaro.—1 Bakor. 13:5.

Phema selo le ge e le sefe seo se ka dirago gore go be thata gore o be le boitshwaro. Ka mohlala, o se ke wa tsena diwepesaeteng goba wa bogela dilo tšeo di nago le boitshwaro bjo bobe. (Baef. 5:3, 4) Ge e le gabotse, re swanetše go phema selo le ge e le sefe seo se ka re lekago gore re dire selo se sebe. (Die. 22:3; 1 Bakor. 6:12) Ka mohlala, motho yo a nago le bothata bja go lekega gabonolo go itshwara ka tsela e mpe, o swanetše go phema go bala dipuku tša marato goba go bogela dimubi tšeo di bolelago ka marato.

Re ka no thatafalelwa ke go diriša keletšo ye. Eupša ge re dira sohle seo re ka se kgonago, Jehofa o tla re nea matla a gore re be le boitshwaro. (2 Pet. 1:5-8) O tla re thuša gore re kgone go laola dilo tšeo re di naganago, tšeo re di bolelago le tšeo re di dirago. Go bontšha gore Jehofa a ka kgona go re thuša, Paul le Marco bao re boletšego ka bona mathomong a sehlogo se, ba ile ba kgona go ithuta gore ba se sa ba bogale. Le gona nagana ka mohlala wa ngwanabo rena yo mongwe yo a bego a fela a galefela baotledi ba bangwe mo tseleng e bile a elwa le bona. O ile a dira’ng ka bothata bjoo? O re: “Ke be ke rapela letšatši le lengwe le le lengwe. Ke ile ka bala dihlogo tšeo di bego di bolela ka go ba le boitshwaro, e bile ka swara ka hlogo ditemana tša Beibele tšeo di bego di tla nthuša. Ke kgale ke lwantšhana le bothata bjo, eupša mesong e mengwe le e mengwe ke ipotša gore ke swanetše go dula ke theošitše maswafo. Le gona, ge ke na le lebaka le itšego ke tloga e sa le ka pela e le gore ke se ke ka tšama ke felafela pelo mo tseleng.”

RE KA DIRA ENG GE RE KA PALELWA KE GO BONTŠHA BOITSHWARO?

Ka dinako tše dingwe re ka palelwa ke go bontšha boitshwaro. Ge re paletšwe, re ka ikwa re sa swanelege go rapela Jehofa. Eupša ka nako yeo ke gona moo re swanetšego go rapela Jehofa. Ka gona rapela Jehofa ntle le go senya nako. Mo kgopele gore a go lebalele le go go thuša, e bile o ikemišetše gore o se ke wa bušeletša phošo yeo gape. (Ps. 51:9-11) Jehofa a ka se nyatše thapelo ya gago ge o mo kgopela gore a go gaugele. (Ps. 102:17) Moapostola Johane o re gopotša gore madi a Morwa wa Modimo “a re hlwekiša sebeng sohle.” (1 Joh. 1:7; 2:1; Ps. 86:5) Gopola gore ka mehla Jehofa o botša bahlanka ba gagwe gore ba lebalelane. Ka gona, re ka kgodišega gore le rena o tla dula a re lebalela.—Mat. 18:21, 22; Bakol. 3:13.

Jehofa o be a kwele bohloko kudu ge Moshe ka nakwana a be a paletšwe ke go bontšha boitshwaro kua lešokeng. Eupša Jehofa o ile a mo lebalela. Beibele e re Moshe o re beetše mohlala o mobotse kudu wo re swanetšego go o latela wa go ba le tumelo. (Doit. 34:10; Baheb. 11:24-28) Jehofa ga se a ka a dumelela Moshe go tsena Nageng ya Kholofetšo, eupša o tlo mo tsoša bahung gore a tle a tlo phela lefaseng la Paradeise. Le rena re ka tla ra phela ka mo go sa felego ge e ba re leka go bontšha seka se sa boitshwaro.—1 Bakor. 9:25.