Go Lebiša Tlhokomelo e Kgethegilego Tikologong

Australia

Go akanyetšwa gore go na le meetse ao a se nago letswai le lentši botlaseng bja lewatle mo e ka bago di-cubic khilomithara tše 500 000. Vincent Post wa Yunibesithing ya Flinders kua Adelaide o re: “[Ka nako e nngwe] meetse a lewatle a kile a ba tlase kudu go feta ka tsela yeo a lego ka yona lehono,” ka gona lebopo le be le bonagala le bulegile. Ka nako yeo pula e be “e tlatša meetse dikarolong tšeo ga bjale di lego ka tlase ga lewatle.” Borathutamahlale ba holofela gore meetse ao a lego botlaseng bja lewatle a ka thuša batho ba ka godimo ga dimilione tše 700 bao ba sa kgonego go hwetša meetse a hlwekilego.

Leganata la Sahara

Go ka direga gore seripagare sa diphoofolo tše dikgolo tšeo di kilego tša hwetšwa leganateng la Sahara, di timeletše goba ga di sa na moo di dulago gona. Go se tsepame ga tikologo le go ata ga go tsongwa ga diphoofolo e ka ba sebaki sa bothata bjoo. Le ge go na le diphedi tše di fapafapanego leganateng go etša dithokgweng, banyakišiši ba re “borathutamahlale ga ba šetše diphedi tša leganateng ka ge ba sa hwetše thekgo e lekanego ya tša ditšhelete.” Ka lebaka leo, go thata gore bašireletši ba tikologo ba hlokomele diphedi tšeo di lego kotsing tša leganateng.

Lefase

Go akanyetšwa gore motho o tee go ba seswai bao ba hwilego ka 2012, ba bolailwe ke tšhilafalo ya moya. Go ya ka Mokgatlo wa Lefase wa tša Maphelo, “ga bjale tšhilafalo ya moya ke e nngwe ya dilo tšeo di beago bophelo kotsing.”