Na o be o Tseba?

Ke ka baka la eng Jehofa a be a dumeletše Baisiraele gore ba ka neela ka maebakgorwana le maebana?

KA TLASE ga molao wa Moshe, Jehofa o be a dumeletše gore Baisiraele ba ka neela ka maebakgorwana le maebana. Leeba le lengwe le be le kgona go dirišwa legatong la le lengwe. (Lef. 1:14; 12:8; 14:30) Ke ka baka la’ng se se be se ka hola Baisiraele? Lebaka le lengwe ke gore ka dinako tše dingwe maebakgorwana a be a sa be gona. Ka baka la’ng?

Maebakgorwana a be a phela dinageng tše dintši, gomme a e ya Isiraele ka dikgwedi tše di fišago. Ngwaga o mongwe le o mongwe ka October, di fofela Borwa dinageng tšeo go fišago, gomme tša boa Isiraele ka seruthwane. (Sefela 2:11, 12; Jer. 8:7) Mehleng ya Beibele, ka nako ya marega go be go le thata gore Baisiraele ba hwetše maebakgorwana gore ba tle ba kgone go dira dihlabelo ka ona.

Eupša maeba wona ga a fofele dinageng tše dingwe a dula a le gona, e bile Baisiraele ba be ba kgona go rua maeba. (Bapetša le Johane 2:14, 16.) Go ya ka puku ya Bible Plants and Animals, “batho ba metseng ka moka le ditoropong tša Palestine ba be ba ruile maeba. Mong wa ntlo yo mongwe le yo mongwe o be a na le lefelo lebotong moo nonyana e bego e tla dula gona ka ga gagwe.”—Bapetša le Jesaya 60:8.

Jehofa o be a bontšha lerato le gore o naganela ba bangwe ka go amogela maeba ao a bego a hwetšagala ka nako yeo.