प्रस्थान
२८ “पुजारीको काम गर्नको लागि+ तिमीले इस्राएलीहरूमध्येबाट आफ्नो दाइ हारुन+ अनि तिनका छोराहरू+ नादाब, अबिहु,+ एलियाजार र इथामारलाई+ बोलाउनू। २ तिम्रो दाइ हारुनको वैभव र शोभा बढाउन तिनको निम्ति पवित्र पोसाक बनाउनू।+ ३ त्यो पोसाक निपुण व्यक्तिहरूलाई बनाउन लगाउनू, जसलाई मैले बुद्धिले परिपूर्ण पारेको छु।+ हारुन पुजारीको रूपमा मेरो सेवा गर्न नियुक्त भएका व्यक्ति हुन् भनेर चिनाउने पोसाक तिनीहरूले बनाऊन्।
४ “तिनीहरूले बनाउनुपर्ने पोसाक यी नै हुन्: छातीपाता,*+ एपोद,*+ बाहुला नभएको अलखा,*+ कोठे बुट्टा भएको लामो लुगा, फेटा+ अनि पटुका।+ तिनीहरूले ती पवित्र पोसाक तिम्रो दाइ हारुन र तिनका छोराहरूको निम्ति बनाऊन् र तिनीहरूले पुजारीको काम गर्दा ती पोसाक लगाऊन्। ५ ती पोसाकहरू बनाउन ती निपुण कालिगडहरूले सुन, निलो धागो, बैजनी ऊन, सिन्दूरे रङ्गको धागो र उच्च कोटीको मलमल* कपडा प्रयोग गरून्।
६ “तिनीहरूले बाटिएको उच्च कोटीको मलमल, सुन, निलो धागो, बैजनी ऊन र सिन्दूरे रङ्गको धागो मिसाएर एपोद बुनून्।+ ७ एपोदको काँधका दुवै भागका दुई छेउलाई गाँस्नू। ८ एपोदलाई टम्म कसेर बाँध्न त्यसमा एउटा पेटी गाँस्नू।+ त्यो पेटी पनि बाटिएको उच्च कोटीको मलमल, सुन, निलो धागो, बैजनी ऊन र सिन्दूरे रङ्गको धागो मिसाएर बुनिएको होस्।
९ “तिमीले दुई वटा ओनिक्स*+ रत्न ल्याएर त्यसमा इस्राएलका छोराहरूको नाम कुँद्नू।+ १० तिनीहरूको उमेरअनुसार तिनीहरूको नाम कुँद्नू; एउटा रत्नमा छ जनाको अनि अर्को रत्नमा बाँकी छ जनाको। ११ जसरी कालिगडले छाप कुँद्छ, त्यसरी नै उसलाई ती दुवै रत्नमा इस्राएलका छोराहरूको नाम कुँद्न लगाउनू।+ अनि पत्थर-घरहरू सुनको बनाएर ती रत्नहरूलाई त्यसमा जडान गर्नू। १२ सुनमा जडिएका यी रत्नहरूलाई एपोदको काँधको भागमा लगाउनू। यी रत्नहरू इस्राएलका छोराहरूको निम्ति सम्झनाको चिन्ह होस्;+ हारुन यहोवा परमेश्वरसामु जाँदा नाम कुँदिएका यी रत्नहरू तिनको दुवै काँधमा सम्झनास्वरूप रहिरहून्। १३ तिमीले सुनका पत्थर-घरहरू १४ र डोरीजस्तै बाटेको निखुर सुनको दुई वटा सिक्री बनाउनू+ अनि सिक्रीलाई पत्थर-घरहरू भएको पातामा गाँस्नू।+
१५ “बुट्टा भर्ने कालिगडलाई न्यायको छातीपाता बनाउन लगाउनू।+ यो पनि एपोदजस्तै सुन, निलो धागो, बैजनी ऊन, सिन्दूरे रङ्गको धागो र बाटिएको उच्च कोटीको मलमल प्रयोग गरेर बनाइएको होस्।+ १६ यसलाई पट्याउँदा वर्गाकार होस्। यसको लम्बाइ एक बित्ता* र चौडाइ एक बित्ता होस्। १७ तिमीले त्यसमा चार लहर हुनेगरि रत्नहरू जडान गर्नू। पहिलो लहरमा माणिक, पुष्पराज अनि पन्ना राख्नू। १८ दोस्रो लहरमा फिरोजा, नीलम अनि यशवमणि राख्नू। १९ तेस्रो लहरमा लेसेम,* अगेट अनि कलेजी स्फटिक राख्नू। २० चौथो लहरमा क्रिसोलाइट, ओनिक्स अनि हरितमणि राख्नू। यी रत्नहरूलाई सुनका पत्थर-घरहरूमा जडान गर्नू। २१ तिमीले यी रत्नहरूमा इस्राएलका १२ वटा कुललाई चिनाउने १२ छोराको नाम कुँद्न लगाउनू। प्रत्येक रत्नमा एक-एक जना छोराको नाम छापजस्तै कुँद्न लगाउनू।
२२ “छातीपाताको किनारामा घेरा बनाउन डोरीजस्तो बाटेको निखुर सुनको सिक्री बनाउनू।+ २३ छातीपाताको लागि सुनको दुई वटा मुन्द्रा बनाउनू अनि त्यसलाई छातीपाताको माथिल्लो दुई कुनामा लगाउनू। २४ सुनका दुई वटा सिक्रीलाई छातीपाताको छेउमा भएका दुई वटा मुन्द्रामा जोड्नू। २५ ती दुवै सिक्रीको अर्को छेउचाहिँ एपोदको दुवै काँधमा भएको पत्थर-घरको अघिल्तिर जोड्नू। २६ तिमीले सुनको दुई वटा मुन्द्रा बनाउनू अनि त्यसलाई छातीपाताको तल्लो दुई छेउको भित्रपट्टि अर्थात् एपोदतिर फर्कनेगरि लगाउनू।+ २७ तिमीले सुनको अर्को दुई वटा मुन्द्रा बनाउनू र ती मुन्द्राहरूलाई एपोदको अगाडिपट्टिको भागमा अर्थात् काँधको भागको मुनिपट्टि ती जोडिने ठाउँमा लगाउनू, जुन एपोदको पेटीभन्दा माथिपट्टि पर्छ।+ २८ छातीपाताको मुन्द्रा र एपोदको मुन्द्रालाई निलो डोरीले कस्नू। यसो गर्दा छातीपाता एपोदको पेटीभन्दा तल सर्न पाउँदैन।
२९ “हारुन पवित्र स्थानमा* प्रवेश गर्दा तिनले इस्राएलका छोराहरूको नाम कुँदिएको न्यायको छातीपाता सधैँ लगाऊन् र त्यो छातीपाता यहोवा परमेश्वरसामु सधैँको निम्ति सम्झनाको चिन्ह होस्। ३० न्यायको छातीपातामा ऊरीम र तुम्मीम*+ पनि राख्नू। यहोवा परमेश्वरसामु जाँदा हारुनले यी दुई कुरा लैजान कहिल्यै नबिर्सून्। इस्राएलीहरूको न्याय गर्न प्रयोग गरिने यी साधनहरू हारुनले यहोवा परमेश्वरसामु जाँदा न्यायको छातीपातामा सधैँ राखून्।
३१ “एपोदभित्र लगाउने बाहुला नभएको अलखा निलो धागो मात्र प्रयोग गरेर बनाउनू।+ ३२ अलखामा टाउको छिराउने गला बनाउनू। तानमा बुन्ने कालिगडले त्यो गलावरिपरि किनारा बनाओस्। गलाको किनारा छालाको कवचको घेराजस्तै बलियोगरि बुन्नू ताकि त्यो नफाटोस्। ३३ अलखाको फेरमा चाहिँ निलो धागो, बैजनी ऊन र सिन्दूरे रङ्गको धागो प्रयोग गरेर अनार आकारका फुर्काहरू बनाउनू र त्यसको बीच-बीचमा सुनका घण्टीहरू राख्नू। ३४ एउटा सुनको घण्टी र अनार आकारको एउटा फुर्का अनि फेरि त्यस्तै सुनको घण्टी र अनार आकारको फुर्का पालैपालो राखेर अलखाको पूरै फेर भर्नू। ३५ हारुनले पुजारीको काम गर्दा यो अलखा लगाऊन्। पवित्र स्थानमा* यहोवा परमेश्वरसामु प्रवेश गर्दा र त्यहाँबाट निस्कँदा घण्टीको आवाज सुनियोस् नत्र हारुन मर्नेछन्।+
३६ “तिमीले निखुर सुनको एउटा चम्किलो पाता बनाउनू र त्यसमा यी शब्दहरू कुँद्नू: ‘यहोवा पवित्र हुनुहुन्छ।’+ ३७ तिमीले त्यसलाई निलो डोरीले फेटामा बाँध्नू;+ त्यो पाता फेटाको अगाडिपट्टि होस्। ३८ हारुनले त्यो आफ्नो निधारमा लगाऊन्। इस्राएलीहरूले पवित्र भेटीको रूपमा चढाउने थोकहरू परमेश्वरको नजरमा पवित्र हुन्छ। त्यसैले कुनै इस्राएलीले पवित्र थोकहरू चढाउँदा त्रुटि भएमा त्यसको दोष हारुनलाई लाग्नेछ।+ मानिसहरूले यहोवा परमेश्वरको निगाह पाऊन् भनेर त्यो पाता सधैँ हारुनको निधारमा रहोस्।
३९ “तिमीले कोठे बुट्टा भएको मलमलको लामो लुगा बुन्नू र पटुका पनि त्यसरी नै बुनेर बनाउनू। अनि उच्च कोटीको मलमलको फेटा पनि बनाउनू।+
४० “हारुनका छोराहरूको वैभव र शोभा बढाउने+ लुगा, पटुका र शिरपोस बनाउनू।+ ४१ तिमीले आफ्नो दाइ हारुन र तिनका छोराहरूलाई यी पोसाक पहिराइदिनू, तिनीहरूलाई अभिषेक गर्नू,+ पुजारी नियुक्त गर्नू+ र चोख्याउनू। त्यसपछि तिनीहरूले पुजारीको रूपमा मेरो सेवा गरून्। ४२ साथै तिनीहरूको नग्नता ढाक्नको लागि मलमलको छोटो सुरुवाल* बनाउनू।+ त्यो कम्मरदेखि घुँडासम्म पुग्ने होस्। ४३ हारुन र तिनका छोराहरू भेट हुने पालमा* आउँदा अथवा तिनीहरूले पवित्र ठाउँको वेदीमा पुजारीको काम गर्दा त्यो सुरुवाल लगाऊन्। यसो गर्दा तिनीहरू दोषी हुनेछैनन् र मर्नेछैनन्। यो नियम हारुन र तिनका सन्तानले सधैँ पालन गरून्।