इजकिएल
४५ “‘जब तिमीहरू आ-आफ्ना कुलको निम्ति देशको जमिन भागबन्डा गर्छौ,+ तब एक टुक्रा जमिन यहोवालाई अर्पण गर्नू।+ त्यो पवित्र जमिन हुनेछ। त्यसको लम्बाइ २५ हजार हात* र चौडाइ १० हजार हात हुनुपर्छ।+ त्यो सम्पूर्ण इलाका* पवित्र हुनेछ। २ त्यसभित्र ५०० हात चौडाइ र ५०० हात लम्बाइको वर्गाकार इलाका मन्दिरको लागि छुट्ट्याउनू।+ मन्दिरको वरिपरि ५० हात चौडाइ भएको चरन हुनेछ।+ ३ पवित्र जमिनमा २५ हजार हात लम्बाइ र १० हजार हात चौडाइ भएको एक टुक्रा जमिन नाप्नू। त्यसभित्र मन्दिर हुनेछ, जुन अतिपवित्र छ। ४ त्यो जमिन मन्दिरका सेवकहरू अर्थात् यहोवासामु उपस्थित भएर उहाँको सेवा गर्ने पुजारीहरूको+ लागि छुट्ट्याइएको पवित्र जमिन हुनेछ।+ त्यहाँ तिनीहरूले आफ्ना घर बनाउनेछन् र त्यो जमिन मन्दिरको लागि पवित्र ठाउँ पनि हुनेछ।
५ “‘मन्दिरमा सेवा गर्ने लेवीहरूका लागि २५ हजार हात लम्बाइ र १० हजार हात चौडाइ+ भएको एक टुक्रा जमिन हुनेछ। तिनीहरूले आफ्नो भागमा २० वटा भोजनकक्ष पाउनेछन्।+
६ “‘सहरको लागि तिमीहरूले २५ हजार हात लम्बाइ (पवित्र जमिनको लम्बाइबराबर) र ५ हजार हात चौडाइ भएको एक टुक्रा जमिन छुट्ट्याउनू।+ त्यो जमिन इस्राएलका सम्पूर्ण घरानाको लागि हुनेछ।
७ “‘पवित्र जमिन र सहरको लागि छुट्ट्याइएको जमिनको दुवै छेउमा कुलनायकको लागि जमिन हुनेछ। त्यो जमिन पवित्र जमिन र सहरको लागि छुट्ट्याइएको जमिनको छेउमा हुनेछ। त्यो पूर्वपट्टि र पश्चिमपट्टि हुनेछ। यस जमिनको पूर्वदेखि पश्चिमसम्मको लम्बाइ इस्राएलको एउटा कुलको लागि छुट्ट्याइएको जमिनको लम्बाइबराबर हुनेछ।+ ८ त्यो जमिन इस्राएलमा कुलनायकको भाग हुनेछ। मेरा कुलनायकहरूले फेरि कहिल्यै मेरा मानिसहरूलाई दुर्व्यवहार गर्नेछैनन्+ र तिनीहरूले इस्राएलको घरानालाई उनीहरूका कुलअनुसार जमिन दिनेछन्।’+
९ “ब्रह्माण्डका मालिक यहोवा यसो भन्नुहुन्छ: ‘हे इस्राएलका कुलनायकहरू हो, बस्! अति भयो।’
“‘हिंसा र अत्याचार गर्न बन्द गर। जे सही र न्यायोचित छ, त्यही गर।+ मेरा मानिसहरूको सम्पत्ति हडप्न छोड,’+ ब्रह्माण्डका मालिक यहोवा घोषणा गर्नुहुन्छ। १० ‘तिमीहरूले ठीक-ठीक नापतौल प्रयोग गर्नू। तिमीहरूले चलाउने एपा* र बाथ* पनि सही नापका होऊन्।+ ११ एपा र बाथको लागि निश्चित मापदण्ड तोकिएको हुनुपर्छ। एक बाथमा एक होमेरको दसौँ भाग हुनुपर्छ। त्यसैगरि एक एपामा एक होमेरको दसौँ भाग हुनुपर्छ। तिमीहरूले होमेरलाई* आधार मानेर नाप्ने गर्नू। १२ एक शेकेल*+ २० गेराबराबर* हुनुपर्छ। अनि २० शेकेल, २५ शेकेल र १५ शेकेल जोड्दा एक मानेह* हुनुपर्छ।
१३ “‘तिमीहरूले चढाउनुपर्ने भेटी यही हो: प्रत्येक होमेर गहुँबाट एक एपाको छैटौँ भाग र प्रत्येक होमेर जौबाट एक एपाको छैटौँ भाग। १४ तिमीहरूले भेटी चढाउनुपर्ने तेल भने बाथको हिसाबले नापेर दिनू। एक बाथ एक कोरको* दसौँ भाग हो र १० बाथ भनेको एक होमेर हो किनभने १० बाथबराबर एक होमेर हुन्छ। १५ अनि इस्राएलीहरूको बगालबाट प्रत्येक २०० भेडामध्ये एउटा भेडा ल्याउनू। मानिसहरूको पापको प्रायश्चित गर्न+ अन्नभेटी,+ अग्निभेटी+ र मेलबलिको+ रूपमा चढाउनको लागि यी सबै भेटी छुट्ट्याउनू,’ ब्रह्माण्डका मालिक यहोवा घोषणा गर्नुहुन्छ।
१६ “‘इस्राएलका सबै मानिसले यी भेटीहरू+ कुलनायकलाई दिनुपर्छ। १७ विभिन्न चाडमा,+ औँसीहरूमा, विश्रामदिनहरूमा*+ र इस्राएलको घरानाको लागि तोकिएका सबै चाडमा+ कुलनायकले अग्निभेटी,+ अन्नभेटी+ र मद्यभेटीको लागि चाहिने सम्पूर्ण कुरा जुटाउनुपर्छ। इस्राएलको घरानाको निम्ति प्रायश्चित गर्न सकियोस् भनेर पापभेटी, अन्नभेटी, अग्निभेटी र मेलबलिको लागि आवश्यक प्रबन्ध मिलाउने जिम्मेवारी कुलनायकको हुनेछ।’
१८ “ब्रह्माण्डका मालिक यहोवा यसो भन्नुहुन्छ: ‘पहिलो महिनाको पहिलो दिन बथानबाट एउटा निष्खोट बहर लिनू र त्यसलाई बलि चढाएर मन्दिरलाई पापबाट चोख्याउनू।+ १९ पुजारीले पापभेटीको अलिकति रगत लिएर मन्दिरको ढोकाको चौकोसमा,+ वेदीको अग्लो खण्डको चार कुनामा र भित्री चोकको प्रवेशद्वारको चौकोसमा दल्नेछन्। २० अनजानमा पाप गर्नेहरूको लागि+ पहिलो महिनाको सातौँ दिनमा तिमीहरूले त्यसो गर्नू। तिमीहरूले मन्दिरको निम्ति प्रायश्चित गर्नू।+
२१ “‘पहिलो महिनाको १४ औँ दिनमा निस्तार चाड मनाउनू।+ सात दिनसम्म तिमीहरूले खमिर* नहालेको रोटी खानू।+ २२ त्यस दिन कुलनायकले आफ्नो लागि र देशका सबैको लागि पापभेटीको रूपमा चढाउन एउटा बहरको प्रबन्ध गर्नेछन्।+ २३ तिनले चाडको सात दिनसम्म यहोवाको निम्ति अग्निभेटी चढाउन प्रत्येक दिन सात वटा निष्खोट बहर र सात वटा निष्खोट थुमा जुटाउनेछन्।+ साथै पापभेटी चढाउन प्रत्येक दिन एउटा बोका जुटाउनेछन्। २४ अनि तिनले प्रत्येक बहर र प्रत्येक थुमाको निम्ति एक-एक एपा अन्नभेटी जुटाउनुपर्छ। साथै एक एपा अन्नभेटीको निम्ति एक हिन* तेल जुटाउनुपर्छ।
२५ “‘सातौँ महिनाको १५ औँ दिनदेखि सुरु हुने चाडमा पनि पहिलो महिनाको चाडमा जस्तै तिनले सात दिनसम्म+ पापभेटी, अग्निभेटी, अन्नभेटी र तेल जुटाउनुपर्छ।’”