Mukanda wa Vakulu va Sikungulwila Mutumbu Lyose

Enu aziphangi zetu:

Sisola se twali nasu kwa Suku na vathu, situlumbisa “kuya mukulonga vathu mutumbu lyose phala kukhala zindongi na kuva batizala.” (Mat. 28:19, 20; Mar. 12:28-31) Nga twakhala na sisola sa sili, twkuhasa kukwasa vathu va “vasoli kukhala na mwenyu kauhwi.”—At. 13:48.

Ku vizuwa vya munyima, twakakhala kusola sineni kuvyela na vathu, na kuvahana tuhu mikanda. Mazi kulinu kumbi, etu twatokala kuziva momo tuhasa kuvyela samboti na vathu. Twasola kuvaleka sisola mukuvyela navu kukhanda ya vye vuvu vavingi. Avye vilomboloka kwakuninga, twafanya kuziva samboti vye vakuhita navyu na momo twafanya kuvakwasa. Amuni, namwahi mukanda wo uhasa kutukwasa kulumba vye?

Mukanda wo wali na 12 ya lisau zileka vilinga vye twafanya kukhala navyu phala kuleka sisola ku vathu na kulumba zindongi. Zi lisau zasu zivyela kukhanda ya vye Yesu na Ziklistau zikwawu zitete vakalumba ku milimu za kulonga na momo tuhasa kuvakengelesa. Twasola kulonga vathu, mazi suma se salanda, kuvaleka sisola. Vilinga vye twakulilonga mu mukanda wo, vya kutukwasa ku vyuma vyose kukhanda ya milimu za kulonga. Mazi twakuvyela momo vimwe vilinga vitukwasa kumeteka kuta maka na vathu, na kuvahindula na kuvalonga Bibilya.

Mukulilonga mukanda wo, soka momo watokala kulumba vyuma vyasu mu kuvyela na vathu ko yivi watunga. Weza sisola savi kwa Yehova na ku vathu. Tuhasa kulonga vyuma vinzi, mazi nga twaleka sisola ku vathu, twakuhasa kuvakwasa kukhala zindongi.

Aziphangi, twezi kulomba kwa Yehova phala kupama na kumikwasa mu zikhono mwezi kulumba za kusola vathu na kulumba zindonge. Etu tumisola sinene! Phala yitu, suma sineni kukalakala kumuheka nenu.—Sof 3:9.