LISAU 30
Vathu va Vakafa Vakwiya Vahinduka!
Kufa kwezi kuniha lamba na kukola. Wamona Bibilya yiywela yiti kufa nguma. (1 Coríntios 15:26) Mu lisau ya 27 watuva kwakuninga Yehova wakumana kufa. Mazi vathu va vakafa kali kavesi kwiya limwe vahinduka? Mu lisau yiniye wakutuva vyuma vyamboti Yehova akenekeni. Endi wakuhindula vathu venzi phala kukhala na mwenyu kawezi kuhwa. Mazi avye vya kumoneka lumwe? Vakuvahindula phala kukhala na mwenyu kolu ni hanu hosi?
1. Vikhi Yehova asoli kulumba na khumba na makahalo etu vakafa kali?
Yehova wasola kuhindula vathu va vakafa kali. Jó wakakhala na ufelelo kwa Suku endi wakaywela heti ola nafa Suku kesi kuñgulava. Endi wakaywela momo kwa Suku: “Wakwiya uñgushani ami ñgukakutavi [mu Mbila].”—Tanga Jó 14:13-15.
2. Namwahi twaziva tuti vathu va vakafa kali vakwiya vavahinduli?
Aha Yesu akakhala hanu hosi Suku wakamuha zikhono phala kuhindula vathu vakafa. Yesu wakahindula umwe mukwenze wa mukhetu akakhala na 12 ya mivu na mona mukwau wa umwe mukhetu. (Marcos 5:41, 42; Lucas 7:12-15) Akahinduli wekha kahalu lyendi Lazaro. Lazaro wakafa kukahiti vizuwa viwana ola mwemomo Yesu wakahasa kumuhindula. Yesu wakalomba kwa Suku ha akamana akaywele momo: “A Lazaro, kwaya hanu hukanga!” “Muyala yo akafa akavuli hukanga” na mwenyu! (João 11:43, 44) Asisoka momo khumba na makahalu a Lazaro vakasanguluka ha vakamumona mukuvula mu mbila!
3. Silevelelo sikhi wafanya kukhala nasu kukhanda ya khumba na makahalu avi vakafakali?
Bibilya yiywela momo: “Kwakukakhala kufukunuka.” (Atos 24:15) Vathu va Yesu akahindula kumivu za munyima kavakayili kolu. (João 3:13) Vathu vasu vakasanguluka vakavahindula phala kukhala na mwenyu hanu hosi. Nañgu momo kwakahita munyima, kwakamba kandambu Yesu wakuhindula vathu va vakafa kali phala kukhala na mwenyu kauhwi mu tumbu lya waha hanu hosi. Yesu wakaywela heti vosi vali muzimbila, vali muvisoka vya Suku vakwiya vavahindula. Avye vilekesa kwakuninga vose vali muvisoka vya Suku vakwiya vavahinduka, ola va twakalava kali.—João 5:28, 29.
LILONGI WEKHA
Ziva mukonda lya vikhi twali na sili, tuti vathu va vakafa kali vakwiya vakahinduki. Tala wekha momo kuziva vye kuhasa kukukwasa na kukhala na silevelelo samboti.
4. Yesu wakaleka kwakuninga ahasa kuhindula vathu va vakafa kali
Lilongi phala kuziva vye Yesu akalumba kukahalu lyendi Lazaro. Tangyenu João 11:14, 38-44. Vyelienu kukhanda ya vihulu vye:
Namwahi twaziva tuti Lazaro wakafa lumwe?—Talyenu sithimbu sa 39.
Asikhele sunga lumwe ha Lazaro akafa wakaya kolu, usoka uti Yesu nga wakamuhindula wekha phala kwiya hanu hosi?
5. Vathu venzi vakwiya vavahindula!
Tangyenu Salmo 37:29. Vyelienu kukhanda ya sihulu se:
Vathu venzi vakwiya mukukahindula. Amuni kwahi vuvu vakwiya vakatunga?
Yesu wakwiya ahindula vathu va vali na ufelelo kwa Yehova na vathu va kavakazivili vye Bibilya yilonga. Tangyenu Atos 24:15. Vyelienu kukhanda ya vihulu vye:
Yili wasola kumona ha vakwiya vahindula vathu?
Asi soka ku vye: Nañgu momo umwe tata kakumuhwinyi kuhindula mona endi kutulu, Yesu nendi kakumuhwinyi kuhindula muthu yo akafa kali.
6. Kuziva kufukunuka kuhasa kukukwasa na kukuhana silevelelo samboti
Kuziva momo Yesu akahindula mona wa umwe muyala vashana veti Jairo, kwezi kukwasa va vakafunda vathu vavu. Tangyenu vye vya kahita mu mukanda Lucas 8:40-42, 49-56.
Hose Yesu khandi akahindula mona wa Jairo endi wakaywela momo kwa yisi: “Kukhali na woma, khala na ufelelo.” (Talyenu sithimbu sa 50.) Namwahi kuziva uti vathu va vakafa kali vakwiya vahinduka kuhasa kukukwasa nga . . .
muthu yo usola sinene anafi?
wali mukuhita na vyuma vihwinya kumwenyu?
Talyenu VIDYU. Vyelienu kukhanda ya sihulu se:
Namwahi kuziva kwakuninga vathu va vakafa kali vakwiya vahinduka kwakakwasa vitata va Felisiti?
AVAMWE VETI: “Vathu vakafa kali kavahasi kuvahindula.”
Vikhi wezi kusoka?
Mukanda ukhi wa Bibilya uhasa kuleka phala kukwasa muthu wasu kumona kwakuniga ava vakafa kali vakwiya vavahindula?
VIKHI WATUVA
Bibilya yikenekena kwakuninga vathu venzi vakafa kali vakwiya vahinduka. Yehova watuma mona endi Yesu phala kuhindula va vakafa.
Kuzimbuluka
Vikhi Yehova na Yesu vakukalumba ku va vakafa kali?
Ava vakafa kali vakuya vahindula phala kutunga kolu ni hanu hosi? Mukonda lya vikhi watava momo?
Mukonda lya vikhi wali na sili kwakuninga tuhalu twavi na khumba yavi vakafa kali vakwiya vahinduka?
KENGA WEKHA
Tala vye vihasa kukukwasa nga wafunda umwe muthu.
Bibilya yihasa kukwasa yo afundi umwe muthu?
Tala vye vihasa kukwasa vana vazikhemba ha kufa umwe muthu?
Ava vakukahindula vakwiya vayi kolu? Yili kavesi kwiya vahindula?