LISAU 45

Vikhi Vilomboloka Kuhewa Kulumba Vyuma Vya Tumbu?

Momo Yali

Yesu wakalonga heti zindongi zendi kazatokelele “kulumba mbandu ya tumbu.” (João 15:19) Avye vilomboloka wekha kulihaka kuvita na vya zinguvulu. Mazi mukuywela kwasili, kakuhehu aku kutusula kulumba vyuma vye. Avamwe vezi kutuzemba mukonda katwezi kulumba vyuma vye. Namwahi twafanya kupama kutusula kulumba mbandu ya tumbu, na kukhala na ufelelo kwa Yehova Suku?

1. Namwahi zi Kilistau zezi kusoka kukhanda ya zinguvulu za tumbu?

Zi Kilistau vezi kuleka vumbi ku zinguvulu. Amomo twezi kulumba vye Yesu akasika, “tuhana vye vya Sezalo kwa Sezalo.” Vye vilomboloka kwakuninga twafanya kuhotolokela ku zinguvulu. (Marcos 12:17) Bibilya yiti nga zinguvulu zali mukutumina Yehova yindi avatusili kutumina. (Romanos 13:1) Mukonda lya vye, twezi kuleka mukomu kuhutuminu wa zinguvulu. Mazi twaziva kwakuninga avuvu kavesi na utuminu winzi nañgu wa Suku. Twaziva kwakuninga Suku tuhu na Uñgana wendi uhasa kumana vithombo viose vya vathu.

2. Namwahi tuhasa kuleka kwakuninga katwezi kulihekela ku vyuma vya tumbu?

Etu katwezi kulihekela ku vyuma vya tumbu, nañgu momo Yesu akakhala kulumba. Hose vathu vakamona Yesu mu kulumba simwe siliwanu, avuvu vakasola kumulumba nguvulu, mazi endi kakateveli. (João 6:15) Mukonda lya vikhi? Endi wakaywela heti: “Uñgana wami kaulumbi mbandu lya tumbu lini lye.” (João 18:36) Etu tuzindongi za Yesu, twezi kuleka kwakuninga katulumba mbandu ya tumbu ku vyuma vinzi. Etu, katwezi kuya kuvita, kusimanya bandeira na kwimba yinu. (Tanga Miqueias 4:3.) Kukhanda yikwau, etu katwezi kuzemba yimwe nguvulu ni lowo kusola yikwau. (1 João 5:21) Aze zimwe ziphiku twezi kuleka kwakuninga twali na ufelelo winzi kwa Suku.

LILONGI WEKHA

Ziva vimwe vyuma vihasa kusola kutulumbisa mbandu ya tumbu na momo uhasa kulumba tuyula twamboti phala kusangulwisa Yehova.

Umwe muyala wahewa kulumba mbandu ya partido.

3. Zi Kilistau za sili, kavezi kuvanda ku vyuma vya tumbu

Yesu na zindongi zendi, kavakakheleli kulihekela ku vyuma vya tumbu. Netu twatokhala kulandula zinganyu zavu. Tangyenu Romanos 13:1, 5-7 na 1 Pedro 2:13, 14. Talyenu VIDYU. Vyelienu kukhanda ya vihulu vye:

VIDYU: Zi Kilistau za Sili Kavezi Kulumba Mbandu ya Tumbu—Mbandu 1 (4:28)

Mukonda lya vikhi twatokala kuleka vumbi ku zinguvulu?
Vyuma vikhi twafanya kulumba phala kuhotolokela zinguvulu?

Mukuhita kwa vita, kwali vamwe vezi kuywela veti kavalihekeli ku vyuma vya zinguvulu, mazi vilinga vyavu vyezi kuleka mwakaseka. Mazi vikhi vilomboloka kuhewa kulumba mbandu ya tumbu? Tangyenu João 17:16. Talyenu VIDYU. Vyelienu kukhanda ya sihulu se:

VIDYU: Zi Kilistau za Sili Kavezi Kulumba Mbandu ya Tumbu—Mbandu 2 (3:11)

Mukonda lya vikhi katwatokeleli kulumba mbandu ya tumbu?

Mazi nga nguvulu asoli nga zi Kilistau valumba vyuma vye Suku kasoli? Tangyenu Atos 5:28, 29. Talyenu VIDYU. Vyelienu kukhanda ya vihulu vye:

VIDYU: Zi Kilistau za Sili Kavezi Kulumba Mbandu ya Tumbu—Mbandu 3 (1:18)

Nga situminu sa zinguvulu satulomba kulumba vimwe vyuma, situminu sa Suku nasu asitulombi kulomba vyuma vya kaseka, kwahi twafanya kutava?
Vyuma vikhi vikwau uhasa kusoka uti zi Kilistau kavatokeleli kuhotolokela ku vimwe vyuma vya zinguvulu?

4. Kulihekeli ku vyuma vya tumbu, sikhali kuvisoka sikhali ku vye tulumba

Tangyenu 1 João 5:21. Talyenu VIDYU. Vyelienu kukhanda ya vihilu vye:

VIDYU: Mukonda lya Vikhi zi Kilistau Vafanya Kukhala na Zikhono Phala Kuhewa Kulumba Mbandu (2:49)

Mu vidyu twatala, mukonda lya vikhi Ayenge akahewa kulumba vyuma vye vakamulomba?
Avi usoka uti wakalumba samboti?

Vyuma wekha vikwau visola kutuhekela ku vyuma vya zinguvulu? Talyenu VIDYU. Vyelienu kukhanda ya vihulu vye:

VIDYU: Vye Twatuva ku Sentinela: Kulumbi Mbandu ya Tumbu lye Lyali na Kahandu (5:16)

Nga tumbu lyetu vali mukulyasa ndundu na likwau, mukonda lya vikhi twafanya kusimbakata?
Namwahi katwatokeleli kulihekela ku vyuma vya tumbu, ola kwakuninga avye nguvulu alumbi vya kutukengela lamba?
Nga twakwiva sinene mu Televisau na mu Radio vyuma vye viywela kukhanda ya zinguvulu, na vye tuhalu twetu vezi kuywela kukhanda ya vye, namwahi tukukhala kusoka?