Vikhi Bibilya Yiywela Kukhanda ya Kunwa Walwa?

Vathu venzi vali na visoka vinzi kukhanda ya walwa. Avamwe vasola kunwa ku vimwe vizuwa na tuhalu twavu. Mazi vathu vakwau kavasoli kunwa. Avamwe vezi kunwa kate vakolwi. Amuni vikhi Bibilya yiywela kukhanda ya walwa?

1. Kunwa walwa situsi?

Bibilya yiti kavitusi aku kunwa walwa. Kunwa suma samboti Suku akahana ku vathu, mukonda Bibilya yilonga yiti: “Vinyu yisangulwisa mbungi ya muthu.” (Salmo 104:14, 15) Bibilya yiywela vamwe vakethu na vayala vakakhala tuhalu twa Suku, mazi vakakhala kunwa.—1 Timóteo 5:23.

2. Mana akhi Bibilya yihana kuva vezi kunwa?

Yehova heti situsi kunwa sinene na kukolwa. (Gálatas 5:21) Bibilya yiti: “Kukhali hukati kava vanwa sinene vinyu.” (Provérbios 23:20) Wamona nga twasola kunwa tulivendeka phala katunwi sinene ola kwakuninga twali yitu veni. Muthu nga anwa sinene, kezi kusoka samboti. Kukhanda yikwau, kahasi kulilava kuvye akuywela na vye akulumba. Kunwa sinene kuvisa mwenyu wa muthu. Nga kwakuniga aha tunwa katuhasi kuywela na kulumba vyuma vyamboti, kota twatusula kunwa.

3. Namwahi tuhasa kuleka vumbi kuvisoka vya vakwetu kukhanda ya kunwa walwa?

Muthu na muthu watokala kusoka yindi veni se wa kunwa walwa ni lowo. Katokalele kuywela mwaviha muthu yo ezi kunwa na silunzi. Kukhanda yikwau katokalele kutetemeka vakwetu phala kunwa. (Romanos 14:10) Nga twatala tuti kunwa kwa kuzindisa vakwetu kota twalikhela. (Tanga Romanos 14:21.) Etu “katulumbi tuhu mboti kaphala yitu, mazi phala vakwetu navu.”—Tanga 1 Coríntios 10:23, 24.

LILONGI WEKHA

4. Handa se wakukhala kunwa ni lowo

Vikhi Yesu akakhala kusoka kukhanda ya walwa? Tala vye Yesu akalumba mu simwe sizuwa. Tangyenu João 2:1-11. Vyelienu kukhanda ya vihulu vye:

• Avye Yesu akalumba yitulonga kwakuninga kunwa walwa situsi?

• Yesu kakavyelele kwakuninga kunwa kasitusi aku. Amuni etu vikhi twafanya kusoka kukhanda yava vezi kunwa?

Nañgu momo twatala kwakuninga kunwa ka situsi aku. Mazi kuli hamwe kasuma samboti aku kunwa. Tangyenu Provérbios 22:3. Vyelienu kukhanda ya vihulu vye phala kutala se watokala kunwa ni lowo:

• Ni wali mu kundesa kalu, mota ni vyuma vikwau.

• Nga wali na ufumba.

• Nga kusipitali vayweli veti kukhali kunwa.

• Nga kwesi kuhasa kulava ndambu ye watokala kunwa.

• Nga vituminu vya ñguvulu vikukanda kunwa.

• Nga wali na umwe muthu kasoli wekha kunwa mukonda endi wakakhala kunwa sinene.

Avi watokala kuzonga walwa phala vakwenu mu sizomba? Talyenu VIDYU.

VIDYU: Sitava Kuvenesa Walwa? (2:41)

Tanyenu Romanos 13:13 na 1 Coríntios 10:31, 32. Vyelienu kukhanda ya sihulu se:

• Namwahi sivatu se twavula mu kutanga, sihasa kukukwasa kulumba kayula kamboti kahasa kusangwisa Yehova?

5. Soka momo wa kunwa

Andi ya kunwa, uvanga kuzimbuluka ku vyuma vye: Yehova kezi kukanda kunwa walwa, endi azemba kunwa sinene. Mukonda lya vikhi? Tangyenu Oseias 4:11, 18. Vyelienu kukhanda ya sihulu se:

• Vikhi vihasa kumoneka nga muthu yo anwa sinene?

Vikhi vihasa kutukwasa phala katunwi sinene? Twatokala kuziva ndambu ye twafanya kunwa na ye katuhasi. Tangyenu Provérbios 11:2. Vyelienu kukhanda ya sihulu se:

• Mukonda lya vikhi wafanya kusoka ku ndambu ye ukunwa?

6. Vikhi vikukukwasa kutusula kunwa sinene?

VIDYU: “Sakasoleli Wekha Mwenyu Wasu” (6:32)

• Mu vidyu, vikhi Dmitry akakhala kulumba ha akakhala kunwa sinene?

• Endi wakahasa kutusula kunwa sinene ku vizuwa vitete?

• Vikhi vya kamukwasa kutusula kunwa sinene?

Tangyenu 1 Coríntios 6:10, 11. Vyelienu kukhanda ya vihulu vye:

• Kunwa sinene situsi?

• Vikhi vileka kwakuninga muthu yo ezi kunwa sinene ahasa kutusula?

Tangyenu Mateus 5:30. Vyelienu kukhanda ya sihulu se:

• Hose Yesu akata sisima sa kuteta kuvoko, endi wakasola kuywela heti twatokala kulumba zikhono zinzi phala kutusula simwe sifa sa viha phala kusangulwisa Yehova. Amuni vikhi wafanya kulumba phala kutusula kunwa sinene walwa?a

Tangyenu 1 Coríntios 15:33. Vyelienu kukhanda ya sihulu se:

• Namwahi kukhala na tuhalu aha ezi kunwa sinene, ahasa kuvutwisa mu kunwa?

VIKHI WATUVA

Kunwa suma samboti Yehova akahana, mazi endi kasolele nga tunwa sinene ni lowo kukoluwa.

Kuzimbuluka

• Vikhi Bibilya yiywela kukhanda ya kunwa walwa?

• Vithombo vikhi vihasa kumoneka mukonda lya kunwa sinene?

• Namwahi tuhasa kuleka vumbi ku va vezi kunwa?

KENGA WEKHA

Namwahi vakwenzi vahasi kulumba tuyula twa mboti kukhanda ya kunwa?

Pare e pense: devo beber? (2:31)

Tanga vye wafanya kulumba phala kukhali kunwa sinene.

“Manter a bebida no devido lugar” (A Sentinela, 1.º de janeiro de 2010)

Zi Kilistau kavatokeleli kulipwaka kuzikhopu andi ya kunwa.

“Perguntas dos Leitores” (A Sentinela, 15 de fevereiro de 2007)

Tanga phala kuziva vye vya kakwasa muyala yo kutula kunwa sinene.

“A Bíblia muda a vida das pessoas” (A Sentinela, 1.º de maio de 2012)