Genesis
Héígar áádóó Íshmeiyel
16 Áko Éíbram hweʼasdzą́ą́ Sérai doo ałchíi da; éí Ííjip kéyahdę́ę́ʼ asdzání łaʼ Héígar wolyéego há naalʼaʼí nilı̨́. 2 Áko Sérai éí Éíbram áyidííniid, Shoo, Bóhólníihii doo ashchı̨́ı̨́góó áshósin; tʼáá shǫǫdí asdzání shá naalʼaʼígíí bił ałtʼaniʼaash, áko daatsʼí shaʼáłchíní hodooleeł. Áko Éíbram éí Sérai bizaad kʼeh ádziidzaa. 3 Áádóó Éíbram éí Kéínan kéyah biyiʼ kééhojitʼı̨́įgo neeznáá nááhaidóó bikʼijįʼ Éíbram beʼasdzą́ą́ Sérai éí Ííjip kéyahdę́ę́ʼ asdzání há naalʼaʼí Héígar éí hahastiin baazhníłtı̨́, beʼasdzą́ą́ nilı̨́į doo biniyé. 4 Áko Héígar baazhníyá, áádóó Héígar iʼniiltsąąd, áko izhʼniiltsąądgo hazhdeelʼı̨́įʼgo bá nijilʼaʼí doo hoł yílįįd da. 5 Áko Sérai éí Éíbram áyidííniid, Shichʼįʼ nahwiiʼnánígíí bá ninádíítłish. Shinaalʼaʼí naa níłtı̨́, áko iʼniiltsąądgo haʼádeelʼı̨́įʼgo doo bił nishłı̨́į da sélı̨́ı̨́ʼ. Bóhólníihii nihaa nídóotʼįįł. 6 Nidi Éíbram éí Sérai áyidííniid, Ninaalʼaʼí bee nóhólnííh, jóʼakon; tʼáá ni nínízinígi áhodíílííł. Áko Sérai atíháłʼı̨́įgo bitsʼą́ą́ʼ yóóʼajoolwod.
7 Áko Bóhólníihii bidiyingo naalʼaʼí halgaidi tó háálínídi nijigháahgo hakʼíníyá; Shur hoolyéégóó atiin bíighahgi áhoolyé. 8 Áko áhodííniid, Héígar nílíinii, Sérai bá naalʼaʼí, háádę́ęʼshąʼ naniná? Háágóoshąʼ díníyá? Áko ázhdííniid, Sérai shinanitʼaʼí bitsʼą́ą́ʼ yóóʼeeshwod. 9 Áko Bóhólníihii bidiyingo naalʼaʼí áhodííniid, Ninanitʼaʼí bichʼįʼ nídídááh; bá nináánílʼaʼ doo. 10 Áádóó Bóhólníihii bidiyingo naalʼaʼí ánááhodooʼniid, Naʼáłchíní náás daʼahílchíihii tʼóó ahayóí ádeeshłíiłgo doo jóołtaʼ ánéelą́ą́ʼ dooleeł. 11 Nááʼáłdóʼ Bóhólníihii bidiyingo naalʼaʼí ánááhodooʼniid, Yíníltsą́, jóʼakon, áko ashkii dííłchííł, Íshmeiyel* bee yídíízhiił, háálá nichʼįʼ nahwiiʼnánígíí Bóhólníihii ná yidiiztsʼą́ą́ʼ. 12 Áádóó diné bitahgóó télii ałchinii nahojílin doo; diné tʼáá ałtso hweʼanaʼí doo, áádóó diné tʼáá ałtso biʼanaʼí jílı̨́į doo, áko hakʼisóó kéédahatʼı̨́ı̨́dóó binaashiijí kééhojitʼı̨́į doo. 13 Áko Bóhólníihii hachʼįʼ haadzíʼígíí, Diyin God shiníłʼíinii nílı̨́, bizhdííniid, háálá ázhdííniid, Daʼ shiníłʼínígíísh yiiłtsą́? 14 Éí bąą tó háálínígíí éí Bíyer-laháí-roi hoosyeʼ; éí Kéídesh áádóó Bííred bitaʼgi áhoolyé.
15 Áádóó Éíbram éí Héígar há hayeʼ yishchı̨́, áko Éíbram hayeʼ Héígar há yishchínígíí Íshmeiyel bee jíízhiʼ. 16 Áko Éíbram éí tseebídiindóó baʼaan hastą́ą́h honááhaigo Héígar éí Íshmeiyel yishchı̨́.