Genesis
Áízak doochíłígíí bee nihootʼą́
18 Áko Bóhólníihii hachʼįʼ yitʼíní íʼdiilyaa; Mámre bichéchʼil naazkaadgi honíbaal bichʼéʼétiingi dzizdáago hwee honiigai. 2 Áádóó hajííghal, nítʼééʼ jóʼakon, diné táaʼgo hanaashii naazı̨́įgo dziiłtsą́, áko honíbaal bichʼéʼétiindóó nízhdiiʼnaʼgo bidááh jílwodgo niʼjįʼ yaa ádziidzaago 3 ázhdííniid, ShiBóhólníihii, nihił nishłı̨́ı̨́ ládą́ą́ʼ nihinaalʼaʼí tʼááká bitsʼą́ą́ʼ dah doohkááh yíilaʼ, tʼáá shǫǫdí. 4 Haaʼíshąʼ tó łaʼ nídidookáałgo nihikeeʼ bee táádadoohgis, áádóó díí chéchʼil biyaagi háádadoołyįh. 5 Ninaalʼaʼí baa noohkai; chʼiyáán łaʼ nihá nídideeshkááł, áko éí bee nihikʼéé dahodootahgo náánáohkah doo. Lą́ʼąą, tʼáá ádííníniidígi átʼéego ánínééh, dahodííniid. 6 Áádóó Éíbraham honíbaal biyiʼ góneʼ Sárah bił yah ajoolwodgo ábizhdííniid, Tsxı̨́įłgo akʼáán táadi haaką́ągo taonihgo náneeskaadí ánílééh. 7 Áádóó Éíbraham habéégashii naakaigóó jílwod, áko béégashii yáázh yáʼátʼéehii neeskʼahii názhníłtı̨́įgo há naalʼaʼí baazhníłtı̨́, áádóó tsı̨́įłgo néísʼah. 8 Áádóó abeʼ neeskʼęhígíí áádóó abeʼ índa béégashii yáázh nídzísʼahígíí nidziistʼéego bichʼįʼ nidziizką́; tsin biyaagi bíighahdóó dzizı̨́įgo daʼííyą́ą́ʼ.
9 Áko ádahodííniid, Háájíshąʼ neʼasdzą́ą́ Sárah? Áko ázhdííniid, Níbaal yiiʼ sidá. 10 Áko Bóhólníihii ání, Tʼáá kojįʼ anáhoolzhiizhgo tʼáá aaníí naa náádeeshdááł, jóʼakon, neʼasdzą́ą́ ashkii yidoołchííł. Áko éí níbaal bichʼéʼétiindóó haneʼjí wóneʼdę́ę́ʼ Sárah adíiztsʼą́ą́ʼ. 11 Áko Éíbraham índa Sárah tʼáá ájíłah tʼáá hazhóʼó hoʼniitih; Sárah éí doo ąądii níjídleeh da dzizlı̨́ı̨́ʼ. 12 Éí bąą Sárah tʼáá hayiʼídi ádaa joodlohgo ájíní, Daʼ shí hasistihdóó bikʼijįʼ índa shahastiin bóhonishníihii haastihgoósh shił nááhoneeni doo? 13 Áko Bóhólníihii éí Éíbraham áyidííniid, Haʼátʼíishąʼ biniyé Sárah ádeidlohgo ání, Tʼáá aaníí hasistihgoósh awééʼ shee hodooleeł? 14 Tʼáá haʼátʼíhídaásh Bóhólníihii chʼééh íidoołʼįįł? Ákweʼé nihoolzhiizhgo naa náádeeshdááł, áko Sárah biyáázh hodooleeł. 15 Ákohgo Sárah, Doo yishdloh da, jidííniid, háálá nídzíldzid, áko áháłní, Dooda, tʼáá aaníí yídloh.
Éíbraham éí Sádam kin haalʼáhígíí yá náʼookąąh
16 Áko diné nídiijéeʼgo Sádam kin haalʼáii yichʼįʼgo dadééʼı̨́ı̨́ʼ, áko Éíbraham tʼáá áyídíjįʼ hoł niikai. 17 Áko Bóhólníihii ádííniid, Daʼ baa nídiisdzáhígíísh Éíbraham bitsʼąą dínéeshʼı̨́ı̨́ł? 18 Jó, Éíbraham tʼáá aaníí ayóó átʼéii áádóó dineʼé tʼáá íiyisí bidziilii dooleeł, áádóó nahasdzáán bikáaʼgi ałʼąą dineʼé tʼáá ałtso hanahjįʼ bikʼihozhdoodliił. 19 Hwééhasin; haʼáłchíní áádóó haghangi kéédahatʼíinii Bóhólníihii yikʼehgo dayíkáah doo biniyé tʼáá ákogi ádaaníiłgo yáʼátʼéehgo ádaatʼı̨́į dooleełgi bee jinootı̨́įł doo, áko Bóhólníihii éí Éíbraham yá haadzíiʼii yá íidoolííł. 20 Ákohgo Bóhólníihii ánáádooʼniid, Sádam kin haalʼáii índa Gomárah kin haalʼáii ayóó átʼéego cha hahoyiinííh áádóó ádił daʼílzíihgo tsʼídá bąąh yínínígi ádaatʼı̨́; 21 éí bąą kʼad ákóyaa deesháałgo dínéeshʼįįł; tʼáá daatsʼí aaníí bikʼee jóchaaígi áhooníiłgo disétsʼą́ą́ʼ; doodaiiʼ éí shił bééhodoozįįł.
22 Áko diné hatsʼą́ąjįʼ tʼáá áłah názyizgo Sádam kin haalʼáajigo dah diiʼáázh, áko Éíbraham tʼéiyá Bóhólníihii tʼahdii yichʼįʼ sizı̨́. 23 Ákohgo Éíbraham áháníjįʼ hachʼįʼ niníyáago ádííniid, Daʼ diné tʼáá ákogi átʼéiísh diné doo yáʼáshóonii tʼáá bił ádííłdįįł? 24 Díí kin haalʼáhígi ashdladiin diné tʼáá ákogi ádaatʼéii hólǫ́ǫgoósh tʼáá bił ádííłdįįł; ashdladiin diné tʼáá ákogi ádaatʼéii daatsʼí biniinaa doo ádííłdįįł da? 25 Diné tʼáá ákogi ádaatʼéii diné doo yáʼáshóonii tʼáá bił ádííłdįįłígíí éí doo ákóoneʼ ánítʼée da! Ákwíindzaago diné tʼáá ákogi ádaatʼéii diné doo yáʼáshóonii bił aheełtʼéego ákóníléehgo doo ákóoneʼ ánítʼée da! Nahasdzáán bikáaʼgi tʼáá átʼéé nítʼééʼ Ánihwiiʼaahii nilíinii, daʼ éísh doo tʼáá ákwii ádooníił da? 26 Áko Bóhólníihii ádííniid, Sádam kin haalʼáhígi ashdladiingo diné tʼáá ákogi ádaatʼéii bikʼíníyáago hó hanahjįʼ kin haalʼáii doo ádeeshdįįł da. 27 Áko Éíbraham haadzíiʼgo ání, Jó, kʼad tʼáá shí shíniikʼehgo azhą́ łeezh índa łeeshchʼiih tʼéiyá nishłı̨́į nidi shiBóhólníihii bichʼįʼ haasdziih. 28 Diné tʼáá ákogi ádaatʼéii ashdladiin dooleełjįʼ ashdlaʼ bee biʼohgoshąʼ, daʼ ashdlaʼ bee biʼoh nidiísh kin haalʼáii tʼáá átʼé ałdóʼ ádííłdįįł? Áko ádííniid, Dízdiindóó baʼaan ashdlaʼ bikʼíníyáago lá kin haalʼáii doo ádeeshdįįł da ni. 29 Hachʼįʼ haadzíiʼgo ánááhodooʼniid, Dízdiin yikʼíníyáagoshąʼ? Áko áhodííniid, Dízdiin ázhnéelą́ąʼgo biniinaa doo áhodeeshdįįł da. 30 Áko ánááhodooʼniid, Tʼáá shǫǫdí, Bóhólníihii, tʼáadoo shá díílnihí, áko hanáádeesdzih. Tádiin yikʼíníyáagoshąʼ? Áko ánááhodooʼniid, Tádiin bikʼíníyáago doo áhodeeshdįįł da. 31 Áko ázhdííniid, Jó, kʼad tʼáá shí shíniikʼehgo Bóhólníihii bichʼįʼ hanáánásdziih. Naadiin yikʼíníyáagoshąʼ? Áko ánáádooʼniid, Naadiin jiltʼéego biniinaa doo áhodeeshdįįł da. 32 Áádóó ánáázhdooʼniid, Tʼáá shǫǫdí, Bóhólníihii, tʼáadoo shá díílnihí, áko tʼááłáhídi hanáádeesdzih. Ákweʼé neeznáá jiltʼéego yikʼíníyáagoshąʼ? Áko ánáádooʼniid, Neeznáá jiltʼéego biniinaa doo áhodeeshdįįł da. 33 Áádóó Bóhólníihii dah náhodiileʼ; jó, Éíbraham ałtso bił ahił nahodzisneʼ, áádóó Éíbraham bighangóó anáádzá.