Ecclesiastes

Diné hóyáanii ááníiłgi

11 Nibááh táłkáaʼjįʼ ahíłhan áádóó łąʼí yiską́ą́dóó bikʼijįʼ bikʼídíníítááł. 2 Diné tsostsʼid yiltʼéego, éí doodaléiʼ tseebíltʼéego baʼdííłtsoł, háálá nahasdzáán bikáaʼgi doo yáʼátʼééhgóó áhodooníiłii doo nił bééhózin da. 3 Kʼos éí tó dah deíyeehgo nahasdzáán bikáaʼjįʼ níłtsą́ nináłtı̨́ı̨́h áádóó shádiʼáahjigo, doodaiiʼ náhookǫsjigo tʼiis naaʼanííkaadgo tʼáá naaʼanííkaadígi sitą́ą doo. 4 Níyolgo baa ákoznízinii doo kʼezhdiʼdooléeł da, áádóó kʼosgo baa ákoznízinii doo azhdooyish da. 5 Níłchʼi deeztʼiʼdę́ę́ʼ doo nił bééhózinígi átʼéego áádóó asdzání yiltsą́ągo awééʼ yééltsánígíí bitsʼin nooséełii doo nił bééhózinígíigi átʼéego, tʼáá éigi átʼéego Diyin God tʼáá ałtsoní áyoolíiłii binaanish nilíinii doo nił bééhózin da. 6 Abínígo kʼééʼdídlééh áádóó eʼeʼáahjįʼ ałdóʼ binanilnish, háálá dínóosééł áádóó dínóotʼı̨́įłii, díí daatsʼí, éí doodaiiʼ níléí daatsʼí, éí doodago tʼáá áłah daatsʼí tʼáá aheełtʼéego nizhóní dooleełígíí doo nił bééhózin da.

7 Tʼáá aaníí, adinídíín nizhóní áádóó anááʼ éí jı̨́honaaʼéí iʼdííłdíingo bił yáʼátʼééh. 8 Diné hináago tʼóó ahayóí binááhaigo bíniʼdii tʼáá ałtso yaa bił nihoozhǫǫh, nidi chahałheeł bikʼiidooldohígíí yénálniih, háálá éí tʼóó ahayói doo; éí tʼáá ałtso nidahwiileehígíí tʼáadoo nídandlíní da.

Ániid nidaakaii kótʼé bidooʼniid

9 Dinééh nílíinii, ániid nanináhígíí baa nił hózhǫ́ áádóó ániid nanináago níyoołkáłígíí nijéí bił hóshǫ́ǫ leʼ; nijéí yídin nilíinii áádóó ninááʼ bee yíníʼíinii bikʼehgo yínááł, nidi díí biniinaa naa náhódóotʼįįłjįʼ Diyin God andoolósígíí nił bééhózin leʼ. 10 Éí bąągo yínííł nijéí bitsʼą́ąjįʼ kónílééh, áádóó nitsʼíís yidoołchǫǫłii bitsʼádiníʼaah, háálá áłchíní jílínígíí áádóó ániid naʼadáhígíí tʼóó kónígháníjįʼ átʼé.