Ricardo dóó Andres Baa Haneʼ

Diyin Bizaad bitsʼą́ą́dę́ę́ʼ íhooʼaahígíí tʼáá íiyisíí bidziil niheʼiinaʼ łahgo átʼéego íidoolííł. Ricardo dóó Andres kótʼéego baa haneʼ.

RICARDO: Tʼahdii ashiiké jílı̨́įgo, 15 nááhaigo, gang bizhdiiyá. Shikʼis ániid íishłaaígíí ádaatʼínígíí shíniʼ sélı̨́ı̨́ʼ. Awáalyaagóó deeshááł niizı̨́ı̨́ʼ, éí áadi neezná shinááhai! Yáadish óolyé. Kééhashtʼı̨́įgi, awáalyaa hótsaago nidaaskaígíí tʼáá íiyisíí bee béédahoʼdílzin yee ádaa dahaʼniih. Shí ałdóʼ ákóníshtʼée doo nisin.

Doo ádahalyáanii bił ahéédiishkahgo éí azeeʼ tsiʼndaʼiiłáhígíí, naʼageh bee tsiʼnaʼadá, índa doo yáʼádaashóonii ádaatʼéii baa nitseeyá. Łaʼ tłʼéeʼgo bił ahéédiishjahígíí bił ndaʼasiildǫǫn. Kʼasdą́ą́ʼ shiʼdiisyı̨́, ákondi nidasiisiiʼ. Éí bikéédóó, sheʼiinaʼ hazhóʼó yishtʼih doogo baa tsídíkééz. Sheʼiinaʼ yishtʼihígíí éí yáʼátʼéehgo ádeeshłíiłgo baa ákoniizı̨́ı̨́ʼ. Éí haitʼéego? Háadi lá shíká adoolwołígíí bikʼídínéeshtááł?

Shikʼéí doo bił dahózhǫ́ǫ da. Beʼiinaʼ bee bichʼįʼ nidahwiiʼná. Shidáʼí bighan hazʼą́ągi éí yáʼátʼéehgo bił hazʼą́. Shił bééhózingo éí diné yáʼátʼéehii danilı̨́, índa Diyin Bizaad bikʼehgo deíkááh. Éí bitsʼą́ą́dę́ę́ʼ God bízhiʼ éí Jiihóvah wolyé bíhoołʼą́ą́ʼ. Diné ndaʼasdǫǫn bikéédóó, Jiihóvah bichʼįʼ sodeeszin, bízhiʼ bee yíníshzhíigo, shíká anilyeed bidííniid. Áádóó biiskání, łaʼ Jiihóvah Yá Dahalneʼé dáádílkał néineestsʼingo, tʼóó bikʼee deesyiz! Éí Diyin Bizaad yee nashinitin.

Nantłʼago shichʼįʼ hodiisnááʼ. Ałkʼidą́ą́ʼ dashikʼis yę́ę shichʼįʼ nidahalnih, kodi nihaa ninááł dashiłní. Azhą́ nantłʼa ndi, dooda nidishniih. Tʼáá Diyin Bizaad bidinishkaalgo bíhooshʼaah. Baa shił hózhǫ́ íʼiishłaa! Tʼáá íiyisíí sheʼiinaʼ yáʼátʼééh sílı̨́ı̨́ʼ, éí tʼáá aaníí ił hózhǫ́ bikʼíninítą́ą́ʼ.

Béénáshniih, God bichʼįʼ sodeeszin éí neezná nááhaijįʼ awáalyaa góneʼ sidáa doo, áko gang yee shaa dahaʼniih doo. Neeznáa nááhaijįʼ nahashneʼ doo, éí shíká íínílwodígíí átʼéego náánáłahjįʼ bee bíká adeeshwoł bidííniid. God éí shí sodiszin yidíistsʼą́ą́ʼ, áádóó tʼááłáhájįʼ nahashneʼgo 17 nááhai! Tʼáadoo awáalyaagóó nitseeyáa da.

Ląʼí dashikʼis yę́ę éí nizaagóó awáalyaa bá nidahastʼą́. Łaʼ éí daneezná. Nátʼą́ą́ʼ baa nitséskeesgo, shikʼéí Jiihóvah Yá Dahalneʼé danilíinii tʼáá íiyisíí baa ahééh nisin. Éí tʼáá sahdii danilı̨́įgo, Diyin Bizaad yikʼeh deíkááh. Shikʼéí éí gang biláahdi átʼéego shił danilı̨́. God yee nashineeztą́ʼígíí éí yéigo baa ahééh nisingo sheʼiinaʼ yáʼátʼéehgo íishłaa.

ANDRES: Shinaagóó nahazʼánígíí tʼóó badahojoobáʼí kéédahatʼı̨́ bitah shiʼdizhchı̨́ dóó shiyaa hooʼaʼ ákweʼé azeeʼ tsiʼndaʼiiłáhígíí, aghaʼ daʼiiʼniihii, ndaʼiłtseedii, dóó ałjiłnii dahólǫ́. Shizhéʼé ayóó adlą́ dóó cocaine choyoołʼı̨́įgo yaa dineedzá. Tʼááłáhájįʼ shimá yił ahigą́, éí áhoodziih dóó átiʼáhiʼdilʼı̨́.

Tʼah ániid naashá yę́ędą́ą́ʼ, aʼniishdląąʼ dóó azeeʼ tsiʼndaʼiiłáhígíí choinishʼı̨́įgo baa nidiisdzá. Tʼááłáhájįʼ kintahdi naasháago anishʼįįh dóó shaa nináhaniih. Tʼáá náás sélı̨́ı̨́ʼdóó, shizhéʼé bił áhą́dígo nishłí éí doo ákótʼéé góneʼ áshíílóóz. Azeeʼ tsiʼndaʼiiłáhígíí yah dahiniilʼįįh dóó nihaa nidahaniih yee nashineeztą́ą́ʼ. Tʼáadoo hodiinaʼí béeso tʼóó ahayóí íishłaa. Tʼáadoo hóyání hooghangi siláo shaadaazkai. Dashiiłtsood, dóó awáalyaagi ashdlaʼ nááhaijįʼ shanahootʼą́ éí diné síníłhı̨́ daaníigo shikʼidahodiiʼą́.

Łah abínígo ayóó íitsʼaʼgo bee haʼoodzííʼ Diyin Bizaad baa náhódóotʼįįł éí Jiihóvah Yá Dahalneʼé yá dahoołʼaʼ. Akǫ́ǫ́ deeshááł niizı̨́ı̨́ʼ. Baa hodiistsʼą́ʼígíí éí shił yáʼátʼéehgo, áádóó Jiihóvah Yá Dahalneʼé bił Diyin Bizaad íhooshʼaahgo baa nídiisdzá. God bikʼehgo oodáłígíí, tʼáá aaníí tʼéí scriptures biyiʼdę́ę́ʼ shichʼįʼ ííshjání ádayiilaa.

Łaʼda shíká eelwodgo tʼéiyá bííníshghahgo baa ákoniizı̨́ı̨́ʼ. Bił awáalyaa shijéʼígíí, ashtʼínígíí doo bił yáʼádaatʼééhgóó shichʼįʼ bádahachįʼ. Adziil dóó hódząʼ bíká sodiszin, Jiihóvah shíká eelwod. Awáalyaa bichʼįʼ doo niʼ nishłı̨́ı̨́góó, Diyin Bizaad baa yáshtiʼ.

Chʼééh shiʼdiltʼeʼjįʼ ahoolzhiizhgo, nísísdzííd tʼáá awáalyaagi sidáa doo nisin ńtʼééʼ! Chʼéénísdzáago, łaʼ awáalyaaí shikééʼ dah nidadilniih. Łaʼ éí, “Hágoóneeʼ naʼniłkaadii yázhí, nighangóó náádááł,” dashiłní.

Doo God bóhoołʼą́ąʼgo haash yitʼéego sheʼiinaʼ yishtʼih doo nisin łeh. God ayóóʼáshóʼní ayóó baa ahééh nisin, tʼáadoo yóóʼashidííʼą́ą da.a