Tó Yíląąd Yę́ędą́ą́ʼ,​—Háíshąʼ Daʼdiiztsʼą́ąʼgo Akʼeh Dahółʼįįd?

Nóah biyóołkááł yę́ędą́ą́ʼ tʼóóʼahayóigo doo akǫ́ǫ́ ádajitʼı̨́ı̨́ da ńtʼééʼ. Genesis 6:5

Ádam dóó Íiv baʼáłchíní hazlı̨́ı̨́ʼ áko nahasdzáán bikáaʼgi diné tʼóóʼahóóyóí. Náásgóó łaʼ God yá ndaalʼaʼí yę́ę Séítan yił, God yitsʼą́ąjįʼ náhaskai.

God yitsʼą́ąjįʼ náhaskai yę́ę nahasdzáán bikáajįʼ adáákaigo diné bitsʼíís kʼehgo ádaʼdiilyaa, sáanii bedaʼasdzą́ą́ ádeedoolííł biniyé. Áko díí sáanii yéʼii tsoh nidayiischı̨́ éí tʼóó báádahadzid dóó ayóí dabidziil ńtʼééʼ.

Nihookááʼgi diné doo akǫ́ǫ́ ádaatʼı̨́įgo tʼóó tsiʼhaʼooldeeʼ. Diyin God Bizaad áníigo éí doo yáʼádaashxóonii ayóó átʼéego bee nihookááʼgi tʼááʼałtsogóó tʼóó tsiʼadeesdeeʼ.

Nóah éí God yikʼeh hóółʼįįdgo tsinaaʼeeł dikʼą́ągo nineezgo áyiilaa. Genesis 6:13, 14, 18, 19, 22

Nóah éí diné yáʼátʼéehii jílı̨́ı̨́ ńtʼééʼ. Jiihóvah éí Nóah áyidííniid diné doo yáʼádaatʼéhígíí tó bee áhodeeshdįįł.

God Nóah ánáánéidooʼniid, tsinaaʼeeł ayóíʼíníłtsxogo ádíílííł neʼasdzą́ą́ dóó naʼáłchíní áádóó naaldlooshii ałʼąą ádaatʼéego biłʼiihdííkah.

Nóah aadę́ę́ʼ tó dooląął níigo diné yił hoolneʼ, ndi tʼáadoo daboosdląąd da. Áko łaʼ éí tʼóó haa daadloh áádóó náánáłaʼ tʼóó dabijoosłxááʼ.

Tsinaaʼeeł ałtso ályaago, Nóah naaldlooshii yah ayííʼeezh.