Ił Ééhodoozįįłii Bíkaʼnitá

“Háí Jesus átʼínígíí éí ląʼígóó diné ałʼąą átʼéego yaa nitsídaakees. Niheʼoodląʼ haa shı̨́ı̨́ níłtso ndi, doodaiiʼ doo daʼiiniidlą́ą da ndi kódadiiʼníi łeh, ‘Háishąʼ díí hastiin átʼı̨́?’”​—AUTHOR STAN GUTHRIE.

DINÉ éí Jesus háí lá ájítʼí danízin. Jesus baa haneʼgo naaltsoos dawóltaʼígíí dóó ndaʼalkidgo ádaalyaaígíí ayóó átʼéego bee bééhoʼdílzin. Ákótʼéii ndi Jesus tʼahdii baa naʼídíkid. Jesus íiyisí átʼı̨́ı̨́ ńtʼééʼígíí diné ałʼąą átʼéego haa nitsídaakees.

Tʼah doo ląʼí náhááh yę́ędą́ą́ʼ naakigo haneʼ yaa halneʼii diné díí ndeiyídéíłkid. “Háísh éí Jesus átʼı̨́ı̨́ ńtʼééʼ?” áádóó website biijįʼ ánídaʼdoohdlííł deidííniid. Éí diné kónídadooʼniid:

● “Hweʼiinaʼ bee ayóó jijoobaʼgo naʼnitiní jílı̨́ı̨́ ńtʼééʼ.”

● “Tʼáá nihígi átʼéego diné jílı̨́įgo hweʼiinaʼ áyóó átʼéego ájiilaa.”

● “Jesus tʼáá aanii hiináá ńtʼééʼígíí éí doo bééhózin da.”

● “Jesus éí God biYeʼ jílı̨́įgo hoʼdizhchı̨́, dajiztsą́, dóó dajiztsą́ą́dę́ę́ʼ náázhdiidzáago ádił niʼiidzííh bitsʼą́ą́dę́ę́ʼ yisdá nihíínil. Éí tʼahdii jiiná dóó nahasdzáán bikáajįʼ nínáázhdoodááł.”

● “Shí éí díí yinishdlą́, Jesus Christ éí tʼáá bí tʼéiyá God biYeʼ jílı̨́. Éí tʼáá ahiijįʼ bílaʼashdlaʼii dóó god jílı̨́.”

● “Jesus yeeʼ éí tʼóó haneʼ átʼé, éí áłchíní yázhí nahalingo dajoodlą́.”

Bééhózínígo díí ałʼąą átʼéego ádajinínígíí łaʼ shı̨́ı̨́ doo tʼáá aanii da. Jesus baa ndaʼídíilkidgi łáʼ baʼahódlíigo nihił náhodoolnihígíísh hólǫ́? Díí naaltsoos ádayiilaaígíí éí Diyin Bizaad God tʼáá bí bizaad átʼéego dayoodlą́. Éí bąą Diyin Bizaad tʼéiyá tʼáá aaníigo Jesus baa haneʼígíí yee nihił halneʼ.a​—2 Timothy 3:16.

Díí naaltsoos deiyíníiltaʼgo éí áłahjįʼ Jesus baa ndaʼídíkidígíí Diyin Bizaad biiʼdę́ę́ʼ hazhóʼó nihił hodoolnih. Jesus éí “tʼáá háiida boodlą́ągo baa dzólíhígíí” yisdáʼiildéehjįʼ bá ahóótʼiʼ ní. (John 3:16) Tʼáá ni hazhóʼó naniłkaah áádóó tʼáá ni íininizı̨́įʼgo Jesus dóó baa dzíínílíigo bikʼeh ááníił dooígi baa íhoołʼaah.

[Footnote]