Jesus Yinídlą́ągi Ílı̨́įgoósh Níníłʼı̨́į Doo?
“Tʼáá aaníinii nihił béédahodoozįįł, índa tʼáá aaníinii nihéédeididoochił.”—JOHN 8:32.
DIYIN BIZAAD tʼáá aaníinii biiʼ hólónígíí éí Jesus woodlą́ągi tʼáá ádzaagóó baa haneʼgo yóóʼadaʼniiʼaahii bitsʼąą nihéediyiichííd. Ákoósh Jesus yinídlą́ągi ílı̨́įgo nélʼı̨́? Aooʼ. Háálá Jiihóvah dóó Jesus ílı̨́įgo yinéłʼı̨́. Nihi ałdóʼ ílı̨́įgo daníilʼı̨́į doo.
● Haʼátʼíí biniyé Jiihóvah ílı̨́įgo yinéłʼı̨́? “Diyin God ayóóʼóʼóʼníinii” jílínígíí biniinaa. (1 John 4:8) Jiihóvah éí hoolʼáágóó nihił dahózhǫ́ǫ doo nízin. Jesus ádííniid: “Háálá Diyin God éí nihookááʼ dineʼé tʼáá íiyisíí ayóóʼájóʼníigo bąą haYeʼ tʼáá łáʼí há yizhchínígíí baazhníłtı̨́, áko tʼáá háiida boodlą́ągo baa dzólíhígíí éí . . . iiná doo ninítʼiʼii bee hólǫ́ǫ dooleeł.” (John 3:16) God biYeʼ náanihidiyoołnih biniyé yiníłʼaʼ. Éí nihookáaʼgi hoolʼáágóó kééhoniitʼı̨́į doogo nihá aa áyiilaa. Díí God átséedi yihodeezʼánę́ę bihodoolnííł biniyé. (Genesis 1:28) God biYeʼ tʼáá aaníigo baa haneʼ yaa ídahoołʼaahgo yikʼeh ádaaníłígíí éí iiná doo ninítʼiʼii baa deeshłééł nízin.—Romans 6:23.
● Haʼátʼíí biniyé Jesus ílı̨́įgo yinéłʼı̨́? Jesus ałdóʼ bílaʼashdlaʼii ayóóʼáyóʼní. Éí bąą hweʼiinaʼ nihá ninázhdiníʼą́. (John 15:13) Hoł bééhózingo éí tʼáá hó tʼéiyá yisdáʼiildéehjįʼ hwee ahóótʼiʼ. (John 14:6) Éí nináʼízhdeetʼánígíí ląʼígóó bikʼi hozhdoodliił biniyé. Áko hakééʼ nidaakaiígíí nihílááh díí God íinízinii dóó yihodeezʼánę́ęígíí daʼníłtsʼą́ą́góó bee nidaʼnohtin níigo ayiisʼaʼ.—Matthew 24:14; 28:19, 20.
● Haʼátʼíí biniyé ílı̨́įgo daníilʼı̨́į doo? Nił daʼílínígíí łaʼ baa nitsíníkees—nitsʼíís dóó nighandóóígíí. Nihitah yáʼádahootʼéehgo iiná yáʼátʼéhígíísh danohsin? Jiihóvah éí Jesus binahjįʼ ániid nááhodeesdzáago nihitsʼíís hadaałtʼéego iiná doo ninítʼiʼii bohónéedzą́ągo nihichʼįʼ kwííłʼı̨́. Adiniih dóó tiʼhooʼnííh ałdóʼ ádin doo. (Psalm 37:11, 29; Revelation 21:3, 4) Díísh bidááh nílı̨́? Aooʼ ládą́ąʼgo éí kódíínííł.
John 8:32gi nááníníłʼı̨́: “Tʼáá aaníinii nihił béédahodoozįįł, índa tʼáá aaníinii nihéédeididoochił.” Jesus tʼáá aaníigo baa haneʼígíí dóó God yihodeezʼánę́ę bohojiléhígíí bee doo tsʼíí átʼéégóó nihótąʼii—ádił niʼiidzííh dóó anoonééł bitsʼąą nihéedidoochił. Ndi “tʼáá aaníinii” nił bééhózingo tʼéiyá díí bitsʼąą néididoochił. Áko díí tʼáá aaníinii dóó éidí haitʼéego nihíká adoolwołgi łaʼ baa ínááhoołʼaah. Jiihóvah Yá Dahalneʼé bił dahózhǫ́ǫgo díí yee níká adoojah.