Maluku
10 Etyi atunda opo aende no ko nondimbu mbo Sundeia okuyauka o Solondau, ovanthu aveliongiya vali pwe. Ahimbika vali okuvelongesa ngetyi ehole-ale okulinga. 2 Iya ova Faliseu avafuene pwe, opo vemupite kohi, iya avemupulu inkha tyitavela omulume okuhenga omukai wae. 3 Evekumbulula okuti: “Oityi Moisesi emutuma?” 4 Avati: “Moisesi watuma ahonekelwe omukanda wokulihenga iya ataatwa.” 5 Mahi Sesusi evepopila okuti: “Wemuhonekela otyitumino otyo mokonda muatena omitima. 6 Mahi, ponthyimbi ‘Huku watunga omulume nomukai. 7 Moluotyo, omulume masi-po he na ina, 8 iya ovo vevali avakala vala ohitu ike.’ Ngotyo kavakala vali vevali mahi ohitu ike. 9 Moluotyo, etyi Huku awaneka kumwe omunthu ehetyiyapule.” 10 Puetyi ankho vekahi vali mondyuo, ovalongwa avahimbika okumupula konthele yotyo. 11 Evepopila okuti: “Una uhenga omukai wae anepe omukuavo ulinga oumbalehi komukai wae wo tete. 12 Iya inkha omukai uhenga omulume wae akanepwa nomukuavo, ulinga oumbalehi.”
13 Ovanthu avahimbika okumuetela ovana opo eveyameka omavoko, mahi ovalongwa avevetyilika. 14 Etyi Sesusi etyimona anumana, evepopila okuti: “Yekei ovana veye ku ame. Muhevetyilikei, mokonda Ouhamba wa Huku owa vana vekahi ngovana. 15 Tyotyili ame ndyimupopila okuti, olie uhatambula Ouhamba wa Huku ngomona, kamakanyingila-mo.” 16 Iya akuate ovana ahimbika okuvekanena nawa, ayambeka omavoko ae kuvo.
17 Etyi ankho ekahi nokuenda, omulume umwe eya no kwe nokuhateka aikila konongolo emupulu okuti: “Mulongesi Omuwa, oityi ndyina okulinga opo ndyikamone omuenyo uhapu?” 18 Sesusi emupopila okuti: “Omokonda yatyi undyihanena okuti muwa? Kutupu omunthu nawike omuwa, omuwa o Huku vala. 19 Ove wii nawa ovitumino, viati: ‘Uhaipae, uhalinge oumbalehi, uhavake, uhaave oumbangi womatutu, uhavakele momatutu, humba ho na nyoko.’” 20 Omulume emupopila okuti: “Mulongesi, ndyikahi-ale nokulinga ovipuka ovio aviho tunde pouna.” 21 Sesusi emutale, akala noluembia nae, iya ati: “Wakambesa okulinga otyipuka tyike. Enda kalandese ovipuka aviho una, onombongo mbatyo ombuaavela ovahepi, opo ukakale nolumono keulu. Konyima oya okala omulongwa wange.” 22 Mahi ekumbululo olio alimunumanesa, iya aende nokuanumana unene, mokonda ankho una omalumono omanyingi.
23 Sesusi atale kovanthu aveho, apopila ovalongwa vae okuti: “Matyikepuiya unene ngatyi ku vana vokuna onombongo ononyingi okunyingila Mouhamba wa Huku!” 24 Mahi, ovalongwa avahuvu unene nonondaka mbae. Iya Sesusi evepopila okuti: “Vana vange, tyipuiya unene okunyingila Mouhamba wa Huku! 25 Tyapepuka vali ekamelu okukuata meyulu lionguya, tyipona omunthu omuhona okunyingila Mouhamba wa Huku.” 26 Nkhele atyivehuvisa vali unene, avemupulu* okuti: “Opo naina olie upondola okuyovolwa?” 27 Sesusi wevetala, ati: “Kovanthu otyo katyivilwa, mahi ku Huku ha ngotyo, mokonda Huku upondola okulinga ovipuka aviho.” 28 Petulu ahimbika okumupopila okuti: “Tala! Onthue tuasa-po ovipuka vietu aviho, atukulandula.” 29 Sesusi ati: “Tyotyili ame ndyimupopila okuti, una wasa-po eumbo liae, ine onondenge mbae, ine onomphange mbae ine o he ine o ina, ine ovana ine omapia ae mokonda yange no mokonda yonondaka onongwa, 30 makatambula omaumbo, nonondenge, nonomphange, novo ina, novana, nomapia, ovikando vilamba po 100 pahetyino, kumwe nononkhumbi iya mouye omupe mauya,* akamona omuenyo uhapu. 31 Mahi ovanyingi vatetekela mavekesaililwa iya vokuesaililwa mavakala ovatete.”
32 Pahe ankho Sesusi novalongwa vae vekahi metapalo lienda ko Selusalei iya Sesusi ankho ukahi komutwe wavo, ovalongwa vae ankho vahuva. Mahi vana ankho vevelandula avahimbika okutila owoma. Aihanena vali ponthele ono apositolu Ekwi na Vevali, ahimbika okuvepopila ovipuka mavikamoneka nae. 33 “Talei! Tukahi nokuenda ko Selusalei, Omona womulume makapakulwa pomavoko ovanene-nakwa novahoneki vovitumino. Iya mavakapopia okuti una okuipawa, avemupakula pomavoko ovanthu veheva-Sundeu. 34 Iya avemulingi omukuele nokumunthila omate, nokumuveta avemuipaa. Mahi tyina pamalambe ononthiki ononthatu mapindulwa-po kononkhia.”
35 Tiaku na Suau ovana va Sebedeu, avafuene pwe avemupopila okuti: “Mulongesi, tuhanda utulingile etyi matukuiti.” 36 Ngwe evepulu okuti: “Oityi onwe muhanda ndyimulingile?” 37 Avemukumbulula okuti: “Tuyeke tukapumphame no ove Mouhamba wove, wike okokulio kuove omukuavo okokumbili ku ove.” 38 Mahi Sesusi evepopila okuti: “Etyi mukahi nokuita onwe kamutyii. Mupondola okunwa kokopo ame ndyikahi nokunwa, ine okumbatisalwa monkhalelo ame ndyikahi nokumbatisalwa?” 39 Avemupopila okuti: “Enga tupondola.” Moluotyo, Sesusi evepopila okuti: “Mamunu kokopo ame ndyikahi nokunwa, amumbatisalwa monkhalelo ame ndyikahi nokumbatisalwa. 40 Mahi, okupumphama kokulio kuange no kokumbili kuange, hameko ndyimuavela-tyo, mahi tyipewa vana Tate aholovona.”
41 Etyi ovakuavo ekwi vetyiiva, avanumanena Tiaku na Suau. 42 Mahi Sesusi eveihana iya evepopila okuti: “Onwe mutyii okuti vana vatiwa onohamba* mbomalongo, vatumina ovanthu iya ovanene vatyo vakolonyeka vana vekahi mombuelo yavo. 43 Mahi ha ngotyo-ko tyina okulingwa pokati kenyi; una uhanda okukala omunene pu onwe una okukala omuundapi wenyi, 44 iya una uhanda okukala omutete pu onwe una okukala omupika wa aveho. 45 Mokonda alo umwe Omona womulume keile okuundapelwa, mahi weya okuundapela vakuavo nokuaava omuenyo* wae opo ayovole ovanthu ovanyingi.”
46 Pahe avanyingila mo Selikoo. Mahi puetyi ekahi nokuenda no ko Selikoo kumwe novalongwa vae novanthu ovanyingi, Balitimeu (omona wa Timeu) omumphoki ankho upumphi konthele yetapalo. 47 Etyi eiva okuti o Sesusi omu Nasalee, ahimbika okulaveleya, ati: “Sesusi Mona wa Daviti kala-vo nonkhenda na ame!” 48 Moluotyo, ovanyingi avahimbika okumutyilika, avemupopila opo ahaviele, mahi ngwe nkhele atualako vali okulaveleya peulu, ati: “Mona wa Daviti kala-vo nokankhenda na ame!” 49 Ngotyo, Sesusi atalama, ati: “Mundyihanenei.” Iya avaihana omulume oo omumphoki, avati: “Likuatehila! Katuka; ukahi nokukuihana.” 50 Ayumbuhi ovikutu viae, akatuka liwa-liwa, aende no ku Sesusi. 51 Sesusi emupopila okuti: “Oityi uhanda ndyikulingile?” Omulume omumphoki apopi okuti: “Mulongesi* mphatule-vo omaiho ange.” 52 Iya Sesusi emupopila okuti: “Enda. Ekolelo liove liekukalesa nawa.” Liwa-liwa omaiho ae aamono-po iya ahimbika okulandula Sesusi metapalo.