Luka
21 Pahe etyi ayelula omaiho, amono ovahona vapaka oviawa viavo movikasa* viokupaka onombongo. 2 Konyima, amono omuhepe umwe upaka-mo onombongo onombali mbovivela mbuna esilivilo lihehi,* 3 ati: “Tyotyili ame ndyimupopila okuti omuhepe ou omuhepi wapaka-mo vali unene tyipona vakuavo aveho. 4 Mokonda aveho vapaka-mo etyi vahupisa, mahi ngwe mouhepi* wae, wapaka-mo atyiho ankho ena tyokulitekula.”
5 Konyima, tyina vamwe ankho vekahi nokupopia konthele yondyuo ya Huku, nonkhalelo yehiwiswa nawa nomamanya omawa novipuka viaawa ku Huku, 6 ngwe ati: “Ovipuka evi aviho mukahi nokutala, makuya ononthiki mbumwe pehekesala emanya nalike liatenthama kekuavo alihahanyua-po.” 7 Iya avemupulu okuti: “Mulongesi, onalupi ovipuka ovio mavimoneka? Iya olipi enyingilikilo malilekesa okuti ovipuka ovio maviya?” 8 Ngwe ati: “Lungukei opo pahamoneke nawike umuyondya, mokonda ovanthu ovanyingi mavekeya menyina liange, avati: ‘Ame Kilisitu’ iya ‘Omuvo wanakua ukahi popepi.’ Mahi muhevelandulei. 9 Tyihe-otyo vala, mamukeiva ovilwa novitateka,* muhatilei owoma. Mokonda ovipuka ovio vina okumoneka, mahi onthyulilo kamaiya liwa-liwa.”
10 Konyima evepopila okuti: “Otyilongo matyikalwisa otyilongo otyikuavo, ouhamba maukalwisa ouhamba omukuavo. 11 Makukamoneka ovinimawe ovinene, ponomphangu ononyingi mapakakala ondyala nomikihi. Makukamoneka ovipuka vitilisa owoma iya keulu akukatunda omanyingilikilo omanene.
12 “Mahi tyina ovipuka ovio vihenemoneke, ovanthu mavekemukuata, avemumonesa ononkhumbi avekemutuala monondyuo mbokufendela no movikaleya. Mavekemutuala kovatumini no kono hamba mokonda yenyina liange. 13 Otyo matyimuavela omphitilo yokuava oumbangi. 14 Mahi, muhapongiyei momitima vienyi oñgeni mamukakumbulula, 15 mokonda ame mandyimuavela onondaka, nounongo, onondyale mbenyi ambuho kamambutyivili okumukumbulula natyike. 16 Tyihe-otyo vala, mamukapakulwa* alo umwe novoho na vana mulikuai navo, nombunga, nomapanga iya vamwe pu onwe mavakaipawa. 17 Iya onwe mamukayalwa novanthu aveho mokonda yenyina liange. 18 Mahi alo umwe oluhuki lwike komitwe vienyi kamalukavomba-ko. 19 Inkha mukoleleya mamukayovola omienyo vienyi.*
20 “Mahi, tyina muamamono onthanda yomafualali eliseta no Selusalei, noñgonokei okuti ehanyauno liayo likahi popepi. 21 Ngotyo, vana vekahi mo Sundeia vahimbike okukahateka no konomphunda iya vana vekahi mokati, vatunde-mo, vana vekahi komapia vahakondoke-mo vali. 22 Mokonda, ombo ononthiki Huku makoyesa* ovanthu, opo ovipuka aviho viahonekwa vifuisuapo. 23 Ovakai ovalemi na vana vanyamisa pononthiki ombo ngongo yavo! Mokonda motyilongo mamukakala ononkhumbi ononene iya Huku makakala nonyengo novanthu ava. 24 Iya mavakaipawa nomutunga, avakatualwa koukonde novanthu vomalongo aeho iya o Selusalei aikaliatwa novanthu vomalongo,* alo omuvo wanakua womalongo* ufuisuapo.
25 “Tupu, pekumbi no pohanyi no pononthungululu mapakakala omanyingilikilo iya kombanda yohi ovanthu mavakakala mononkhumbi, avakala tyihetyii oityi mavalingi, mokonda yokukoma kuelunga nokuhangayala kualio. 26 Ovanthu mavakaambuka nowoma, mokonda yovipuka mavikeya kombanda yohi iya ovipuka keulu mavikapukumunwa. 27 Iya ovanthu mavakamona Omona womulume uya kombanda yomakaka nepondolo nomunkhima omunene. 28 Mahi, tyina ovipuka ovio viamahimbika okumoneka, kalei lutai, amukatula omitwe vienyi, mokonda eyovo lienyi likahi popepi.”
29 Ngotyo, evepopila onthengele-popia imwe, ati: “Talelei komuti womukuyu no komiti omikuavo. 30 Tyina vikahi nokuyova onwe muene mutyimona amunoñgonoka okuti ombila ili popepi. 31 Tyelifwa notyo, tyina muamamono okuti ovipuka ovio vikahi nokumoneka, noñgonokei okuti Ouhamba wa Huku ukahi popepi. 32 Tyotyili ame ndyimupopila okuti, ovanthu vomuvo oo, kamavakapwa-ko alo ovipuka ovio aviho vimoneka. 33 Eulu nohi mavikalamba, mahi onondaka mbange nalumwe mambukalamba.
34 “Mahi, muhayekei omitima vienyi vilemenwe nomasukalalo okulia unene, nokunwa unene, nokukala notyiho momuenyo, iya onthiki oyo aimutumphulula 35 ngeliva. Mokonda maiya kovanthu vatyo aveho vekahi kombanda yohi aiho. 36 Tualeiko tyipahi, nokuita omuvo auho, opo muhupe kovipuka ovio aviho mavikeya, amukala komutwe Womona womulume.”
37 Ngotyo, komutenya ankho ulongesila mondyuo ya Huku, mahi tyina kuamanthikovela atundu-mo akalala komphunda itiwa Omphunda Yomindyambi. 38 Iya ovanthu aveho aveya kwe kombimba mondyuo ya Huku opo vemutehelele.