1 Ova Kolindu
10 Pahe vakuatate, ame nahanda munoñgonoke okuti, ovakuaukulu vetu vakalele mombuelo yekaka iya aveho avalambela melunga, 2 aveho vambatisalelwe etyi valandula Moisesi mombuelo yekaka netyi valambela melunga, 3 iya aveho valile vala okulia kuike vapelwe na Huku 4 tupu aveho avanu omaande vapewa na Huku. Ankho vanwa omaande monkhanda ankho ilinga ngatyina ivelandula, onkhanda Huku eveavelele iya onkhanda oyo ankho ilekesa Kilisitu. 5 Mahi ovanyingi puvo vanumanesile Huku iya avankhila moluhandya.
6 Ngotyo, ovipuka ovio viakala ongeleka pala onthue, opo tuhakale nehando liokulinga ovipuka ovivi, ngetyi ngwe valingile. 7 Tupu tuhafendei ovihuku, ngetyi vamwe puvo valingile; tyahonekwa okuti: “Ovanthu vapumphama avali, avanu. Iya avakatuka avanyane.” 8 Tupu muhalingei ouhayo wotyihola* ngetyi vamwe puvo valingile ouhayo wotyihola,* iya 23.000 puvo avankhi monthiki ike vala. 9 Tupu tuhalolei Siovaa ngetyi vamwe puvo vemulolele, avaipawa nononyoka. 10 Tupu muhalondovolei ngetyi vamwe valingile, avaipawa nomuhanyauni. 11 Ovipuka ovio vievemonekelele opo vikale ongeleka yetu iya viahonekwa pala okutulondola, onthue vokukahi konthyulilo youye uno wovivi.
12 Ngotyo, una usoka okuti utai, alunguke opo ahatoke. 13 Mukahi nokulolwa monkhalelo ovanthu aveho vekahi nokulolwa. Mahi Huku omukuatyili iya kamemuyeke mulolwe notyipuka muhevili okukoleleya, mahi tyina mulolwa ngwe memuavela omphitilo opo mutyivile okukoleleya.
14 Moluotyo, nonthyolwe mbange, endei nkholo efendelo liovihuku. 15 Ame ndyimupopila ngatyina muvanthu vokupunga nawa ovipuka; sokei onwe muene etyi napopia. 16 Okuti okopo ei yononkhano onongwa tulikuambelela ha mokonda youwa tupola kohonde ya Kilisitu? Ombolo ei tuvembula, ha mokonda youwa tupola kolutu lwa Kilisitu? 17 Mokonda pena vala ombolo ike, onthue namphila tuvanyingi mahi tulutu lwike vala, mokonda atuho tulia kombolo ike vala.
18 Talelei kova Isilayeli:* Vana valia kovilikutila navo kavafende Huku komutala wovilikutila? 19 Oityi muaina nahanda okupopia? Okuti otyipuka tyiawa kotyikahuku tyisilivila, ine otyikahuku tyisilivila? 20 Au; mahi napopia okuti, ovilikutila viovanthu vomalongo vevilingila ovilulu, ha Huku; iya ame hihande mulipake kumwe novilulu. 21 Onwe kamupondola okunwa kokopo ya Siovaa no kokopo yovilulu; kamupondola okulia “komesa ya Siovaa” no komesa yovilulu. 22 Ine ‘tukahi nokukalesa Siovaa nonkhuelume’? Okuti tuapama vali kwe?
23 Ovipuka aviho, vikahi nawa, mahi haviho vieta ouwa. Ovipuka aviho vikahi nawa, mahi haviho vipameka. 24 Kese umwe ahaovole ouwa wae muene, mahi aovole wa mukuavo.
25 Liei ovipuka aviho vilandeswa popalasa, amuhapulu mokonda yomutima wenyi, 26 mokonda “ohi novipuka aviho vilimo, ovia Siovaa.” 27 Inkha omunthu umwe uhetavela mu Kilisitu umukonga iya onwe amuhande okuenda, liei atyiho emuavela, amuhapulu mokonda yomutima wenyi. 28 Mahi inkha umwe umupopila okuti: “Ohitu ei yaawa otyilikutila kovikahuku,” muheiliei mokonda ya una wemupopila, no mokonda yomutima. 29 Hikahi nokupopia omutima wenyi muene, mahi o womunthu omukuavo. Namphila ndyipondola okutokola etyi nahanda, hipondola okutyilinga, opo pahamoneke omutima womunthu nawike umbela onombei. 30 Inkha tyina ndyilia ndyipandula, omokonda yatyi ndyipopilwa omapita mokonda yetyi ndyipandula?
31 Ngotyo, tyilinge mulia ine munwa ine mulinga otyipuka otyikuavo vali, lingei ovipuka aviho pala omunkhima wa Huku. 32 Lungukei opo muhakale emanya lipundukisa ova Sundeu nova Geleku newaneno lya Huku. 33 Ngetyi ame ndyikahi nokuovola okuhambukiswa ovanthu aveho movipuka aviho, anahaovola ouwa wange muene, mahi andyiovola wovanyingi, opo vayovolwe.