2 Ova Kolindu

1 Ame Paulu, o apositolu ya Kilisitu Sesusi kehando lya Huku, na Timotiu omukuatate wetu, tukahi nokumutumisa omukanda ou, mewaneno lyo mo Kolindu okukutikinya-mo ovasukuki aveho mo Akaia.

2 Okankhenda okanene nombembwa vitunda ku Huku Tate yetu, na Tatekulu Sesusi Kilisitu vikale no onwe.

3 Huku, Tate ya Tatekulu Sesusi Kilisitu, Tate wokankhenda, upameka ovanthu movitateka aviho ankhimanekwe, 4 una utupameka* mononkhumbi* mbetu ambuho, opo no onthue tutyivile okupameka vakuetu mononkhumbi* ambuho, nepameko tutambula ku Huku. 5 Tyetyi, onthue tumona ononkhumbi ononyingi mokonda tuvalanduli va Kilisitu, tupu mokonda ya Kilisitu tutambula epameko enene. 6 Mahi, inkha onthue tumona ononkhumbi,* opala epameko neyovo lienyi; iya inkha tukahi nokupamekwa opala no onwe mupamekwe, opo mukuatesueko okukoleleya mononkhumbi ngombu no onthue tuna-mbo. 7 Iya ekevelo lietu konthele yenyi liapama, mokonda tutyii okuti ngetyi no onwe mumona ononkhumbi kumwe no onthue, tupu mamumono epameko kumwe no onthue.

8 Mokonda vakuatate, onthue katuhande onwe mukale tyihei ononkhumbi tuakala nambo ko Asia. Tuamoneswa ononkhumbi ononene ankho tuhevili okukoleleya kononkhono mbetu muene iya ankho katutyii inkha matuhupu. 9 Ankho tusoka okuti matunkhi. Otyo tyetulongesa okuhayumbu onthumbi mu onthue muene, mahi atuyumbu onthumbi mu Huku, una upindula-po vokuankhia. 10 Ngwe wetuyovola kotyiponga otyinene tyononkhia, iya metuyovola, tuna onthumbi yokuti tupu matualako okutuyovola. 11 No onwe mupondola okutukuatesako, mokutulingila-ko omalikuambelo ku Huku. Inkha ovanyingi vetulingila-ko omalikuambelo, Huku meetehelela iya etukuatesako, mokonda yotyo ovanyingi avapandula.*

12 Onthue tuna ehunga liokulipanda mokonda yetyi, mouye uno haunene pokati kenyi onthue tuakala novituwa viasukuka, noukuatyili utunda ku Huku, ha kounongo wo mouye uno mahi omokankhenda okanene ka Huku. Omutima wetu nao utuavela oumbangi konthele yotyo. 13 Mokonda onthue katuemuhonekelele ovipuka muhevili okutanga* amuvinoñgonoka, iya ame ndyikevelela okuti mamutualako okunoñgonoka nawa* ovipuka ovio, 14 ngetyi tupu muanoñgonoka okuti onwe mulipanda mokonda yetu, no onthue matukelipanda mokonda yenyi monthiki ya Tatekulu yetu Sesusi.

15 Ngotyo nonthumbi oyo, ankho napanga okutetekela okuya oko, opo mukale nehambu otyikando tyavali;* 16 mokonda ankho nahanda okumupila tyina ndyenda no ko Masedonia, tyina ndyitunda ko Masedonia andyikondoka vali ku onwe, iya amunthyindikila tyina ndyenda no ko Sundeia. 17 Ngotyo, okuti tyina ankho nasoka okulinga ngotyo, ankho netyitala ngatyina otyipuka tyihasilivila? Nii hasokele okulinga ehando liange muene, ngotyo hatile “enga” iya andyiti vali “au.” 18 Mupondola okuyumba onthumbi mu Huku yokuti etyi tuemupopila otyili. Katupondola okutetekela okuti “enga” ha konyima atuti vali “au.” 19 Mokonda Omona wa Huku, Sesusi Kilisitu ou tukahi nokuivisa pokati kenyi, ame na Silivanu* na Timotiu, kakalele “enga” akala vali “au” mahi “enga” yakala umwe “enga” konthele yae. 20 Mokonda omilao aviho vya Huku, vikala umwe “enga” menyina lya Sesusi. Ngotyo, tupu omenyina liae tutila “Amem” ku Huku, iya otyo tyiavela omunkhima Huku mokonda yetu. 21 Mahi una utukalesa nonthumbi yokuti onwe no onthue tuva Kilisitu o Huku, wokuetulembula. 22 Tupu wapaka enyingilikilo liae ku onthue, iya etukalesa nonthumbi yetyi matyiya, ononkhono mba Huku, momitima vietu.

23 Huku ombangi yange,* konthele yetyi neheile ko Kolindu, hahandele okumunumanesa. 24 Hakuti onthue tutumina ekolelo lienyi, mahi tuundapela kumwe no onwe pala ehambu lienyi, tyetyi onwe mukahi tyapama mokonda yekolelo lienyi muene.