Ova Hembeleu

13 Oluembia luenyi novakuatate lutualeko. 2 Muhalimbuei-ko okutambula ovaenda,* mokonda mokulinga ngotyo, vamwe vatambulile onoandyu tyihetyii. 3 Muhalimbuei vana vekahi movikaleya,* ngatyina no onwe mukahi navo mokaleya, na vana vekahi nokulingwa onya, mokonda tupu no onwe mukahi molutu.* 4 Otyinepo tyihumbwe pokati ka aveho iya oula wovalinepi ukale tyihena onkhako, mokonda Huku makakoyesa ovanthu vokulinga ouhayo wotyihola* no vokulinga oumbalehi. 5 Muhakalei nohole nonombongo, mahi hambukilwei ovipuka muna-vio pehepano. Mokonda ngwe wati: “Ame nalumwe mandyikuyeke iya nalumwe mandyikusi-po.” 6 Opo tukale nonthumbi onene iya atupopi okuti: “Siovaa omukuatesiko wange; ame himakala nowoma. Oityi omunthu apondola okundinga?”

7 Hinangelei vana vekahi komutwe pokati kenyi, vana vemupopila ondaka ya Huku, iya tyina mutala nawa ovipuka oviwa vitunda kovituwa viavo, hetekelei ekolelo liavo.

8 Sesusi Kilisitu oe vala mongulo, no hono, no pala apeho.

9 Muhayapulwei nomalongeso omanyingi, eheiwe, mokonda hahe vali omutima upamekwe nokankhenda okanene ka Huku tyipona okupamekwa novikulia* vihaetela ouwa vana vasukalala unene navio.

10 Onthue tuna omutala wovilikutila kuna vana valinga ovilinga vya Huku mekaka, vahatokalele okulia. 11 Mokonda omandindi ovinyama viohonde itualwa nomunene-nakwa wavilapo mokati komphangu onthyukuki, pala oviawa viononkhali, ayokelwa kondye yonthanda. 12 Tupu na Sesusi wamonena ononkhumbi kondye yepunda-umbo* opo asukukise ovanthu nohonde yae. 13 Ngotyo, tuendei kwe kondye yonthanda, otyo tupenyua ngetyi apenyenwe, 14 tyetyi onthue pano tutupu epunda-umbo malitualako, mahi tuovola nononkhono eli maliya. 15 Mokonda yae, apeho tuavelei Huku otyilikutila tyehiliviko, otyinyango tyomilungu vietu vipopila vakuetu enyina liae. 16 Tyihe-otyo vala, muhalimbuei-ko okulinga otyiwa nokukuatesako vakuenyi novipuka muna, mokonda Huku uhambukilwa ovilikutila ovio.

17 Tavelei ku vana vekahi komutwe pokati kenyi, vetavelei mokonda vemuyunga* ngatyina mavakapulwa, opo vetyilinge nehambu ha nokukema, mokonda otyo tyipondola okumunyona.

18 Tualeiko okutulingilako omalikuambelo, mokonda tuna onthumbi yokuti tuna omutima wasukuka,* tyetyi tuhanda okukala ovakuatyili movipuka aviho. 19 Mahi ame haunene ndyimuiita opo mulikuambele na ndyikondolwe ku onwe liwa-liwa.

20 Huku yombembwa, wokuapindula kononkhia omunthita omunene wonongi, Tatekulu yetu Sesusi, nohonde yomphango ihapu, 21 emulongese ovipuka aviho oviwa pala okulinga ehando liae, iya alinge mu onthue etyi tyimuhambukiswa komaiho ae, menyina lya Sesusi Kilisitu, Huku apewe omunkhima apeho-apeho. Amem.

22 Pahe vakuatate, ame ndyimulondola opo mutehelele noumphua-lundo onondaka ombu mbepameko, mokonda ame nemuhonekela omukanda omututu. 23 Ame nahanda munoñgonoke okuti omukuatate wetu Timotiu wayovoka. Inkha uya liwa, matuya nae tyina ndyiya okumutala-po.

24 Kukunyei-po aveho veli komutwe pokati kenyi novasukuki aveho. Vo ko Italia vemuku kunya-po.

25 Okankhenda okanene ka Huku kakale no onwe amuho.