1 Swau

5 Ovanthu aveho vetavela okuti Sesusi o Kilisitu, ovana va Huku iya aveho vana vehole He wokuemueta kouye, tupu vehole una aeta kouye. 2 Moluotyo, onthue tunoñgonoka okuti tuho le ovana va Huku, tyina tuhole Huku nokuendela movitumino viae. 3 Mokonda, ohole na Huku ihangununa etyi: Onthue tuna okuendela movitumino viae; iya ovitumino viae kavialemene, 4 mokonda aveho vana* vatuka mu Huku, vafinda ouye. Iya tyifinda ouye otyetyi: ekolelo lietu.

5 Olie upondola okufinda ouye? Ha munthu wokuna ekolelo liokuti Sesusi Omona wa Huku? 6 Oo, oyo una wokueya nomaande nohonde Sesusi Kilisitu, ha nomaande vala, mahi omaande nohonde. Iya ononkhono mba Huku mbuaava oumbangi, mokonda mbuhololola otyili. 7 Mokonda kuna ovipuka vitatu vihololola olie Sesusi: 8 ononkhono mba Huku, nomaande, nohonde; iya ovipuka ovio vitatu vilitavela.

9 Inkha tutavela oumbangi wovanthu, opo oumbangi wa Huku omunene vali. Mokonda ou, oo oumbangi Huku aava, oumbangi una aava konthele Yomona wae. 10 Omunthu una ekolelo mo Mona wa Huku una oumbangi mwe muene. Omunthu uhena ekolelo mu Huku, ukahi nokuti Huku onkhembi, mokonda utupu ekolelo moumbangi Huku aava konthele yo Mona wae. 11 Iya oumbangi oyou wokuti Huku wetuavela omuenyo uhapu, iya omuenyo oo ukahi mo Mona wae. 12 Omunthu wokuna Omona una omuenyo oo; una uhena Omona wa Huku, utupu omuenyo oo.

13 Ame nemuhonekela ovipuka ovio opo munoñgonoke okuti muna omuenyo uhapu, onwe vokuna ekolelo menyina lyo Mona wa Huku. 14 Iya ei oyo onthumbi* tuna konthele yae, yokuti atyiho tuita tyelikuata nehando lya Huku, Huku ututehelela. 15 Iya inkha tutyii okuti Huku ututehelela konthele ya kese tyipuka tuita, tutyii okuti matutambula ovipuka tuaita, mokonda tueviita kwe.

16 Inkha omunthu umwe umona omukuatate wae ulinga onkhali ihatuala kononkhia, una okumulingilako omalikuambelo iya Huku memuavela omuenyo. Ava vekahi nokupopiwa ovokualinga onkhali ihatuala kononkhia. Mahi kuna onkhali ituala kononkhia. Konthele yonkhali oyo, ame hipopila omunthu okuti elikuambele opo akuateseko una walinga onkhali ngo oyo. 17 Atyiho tyihaviukile onkhali, mahi kuna onkhali ihatuala kononkhia.

18 Onthue tutyii okuti kese munthu watuka ku Huku kalingi onkhali, mahi Omona* wa Huku umuyunga, iya ondingavivi kaipondola okumulinga* natyike. 19 Tutyii okuti tuatuka ku Huku, mahi ouye auho utuminwa nondingavivi. 20 Mahi onthue tutyii okuti Omona wa Huku weile, iya etuavela ekungunyiko opo tunoñgonoke Huku yotyotyili. Iya onthue tukahi kumwe nae mokonda yo Mona wae Sesusi Kilisitu. Oo, o Huku yotyotyili, nondyivi-ndyivi yomuenyo uhapu. 21 Vana vange, liyungei kovikahuku.