31 “Molingi okandiyelo konomphalavinga+ koolu yatyo mwene. Oolu molingi nayo okandiyelo konomphalavinga, ina okutyopwa nohamala. Omphapelo* yatyo, nomwenge watyo, nonomphalavinga mbatyo, nomalufo, nonongolo, nononthemo, mbuna okulingwa tyeliima kumwe.+ 32 Momwenge watyo mamutundu onomphalavinga epandu: ononthatu mbuhula nthele imwe ononthatu mbuhula konthele onkhwavo. 33 Konomphalavinga mbatyo ambuho, nthele imwe makukala omalufo etatu ekahi ngononthemo mbomunkhete, mbayapaulwa nonongolo nononthemo; konthele onkhwavo, nako akukala omalufo etatu ekahi ngononthemo mbomunkhete, mbayapaulwa nonongolo nononthemo. Onomphalavinga ambuho mbaima komwenge wokandiyelo konomphalavinga o ngootyo mambukala. 34 Komwenge wokandiyelo konomphalavinga makukala omalufo ekwana ekahi ngononthemo mbomunkhete, mbayapaulwa nonongolo nononthemo. 35 Mombwelo yonomphalavinga mbo tete mbaima komwenge, mamukala ongolo ike, mombwelo yonomphalavinga mba vali, amukala ongolo ike, mombwelo yonomphalavinga mbahulililako mamukala vali ongolo ike; ongootyo onomphalavinga epandu mbaima komwenge mambukala. 36 Onongolo mbatyo, nonomphalavinga, nokandiyelo katyo akeho kena okuliima, kalingwe noolu yatyo mwene,+ yokwatyopwa nohamala. 37 Olingi ovikandiyelo epandu-vali vyo konomphalavinga mbako; tyina ovikandiyelo vyo konomphalavinga viamateme mavimimikila komutwe wako.+ 38 Viokunyima omutemo,* novityiyo vietwe viokandiyelo konomphalavinga, vina okulingwa noolu yatyo mwene.+ 39 Okandiyelo konomphalavinga novityuma ovio aviho vina okulingwa notalendu* ike yoolu yatyo mwene.