21 Pahe Ndaviti aende ko Nombe,+ ku Aimeleke omunakwa. Etyi Aimeleke elivasa na Ndaviti, ahimbika okuteketa emupulu okuti: “Omokonda yatyi weila awike? Omokonda yatyi weheililile nomunthu umwe?”+ 2 Ndaviti akumbulula Aimeleke, omunakwa okuti: “Ohamba yanthuma okulinga otyipuka tyimwe, mahi aimphopila okuti: ‘Wahayeke nawike anoñgonoke otyilinga mandyikutumu, nii onondongwa nekwavela.’ Mokonda yotyo, napopia novakwa-vita vange opo tulivase pomphangu imwe. 3 Pahe, ine una-vo vala onombolo ononthano hamwe otyimwe vali vala, ndyavele-vo.” 4 Mahi omunakwa akumbulula Ndaviti okuti: “Petupu ombolo iliwa novanthu aveho, pena vala ombolo ikola;+ mupondola okwiilia vala ine ovita viove kaveliyamene novakai.”*+ 5 Ndaviti apopila omunakwa ati: “Tyotyili ovakai vakalela kokule noonthwe ngeetyi tulinga-linga-le tyina twenda movilwa.+ Ine mwene ovalume kavayame-ale kweevi viasila movilinga valinga-linga-le, okuti pahe hono kavamanene-mo umwe?” 6 Omunakwa emwaavela onombolo mbukola,+ mokonda mutupu vali, muna vala onombolo mbokulekeswa, mbapolwa mekaka lya Siovaa opo papingiywe onomphe monthiki onombolo mbupolwa-mo.