Isaiya
56 Etyi, otyo tyapopia Siovaa, wati:
“Kakatelei mouviuki,+ amulingi etyi tyaviuka,
Mokonda eyovo liange apa katutu maliya,
Ouviuki wange mauholololwa.+
2 Una ehambu omunthu una ulinga ngootyo,
Omunthu ukakatela mutyo,
Ulandula nawa Otyasapalo tyange ehetyisilisa,+
Ukondola okuvoko kwae kovivi viatyo aviho.
3 Onthunda-vilongo uhula ku Siovaa,+ kapondola okupopia okuti:
‘Tyotyili Siovaa makamphola kovanthu vae.’
Omulume watukanwa* kapondola okupopia okuti: ‘Tala! Ame ndyimuti vala wakukuta.’”
4 Mokonda, etyi, otyo Siovaa apopila ovalume vatukanwa, vatwalako okweendela nawa movityasapalo viange, vakoya-po okulinga etyi tyinthyambukiswa, vakakatela momphango yange, wati:
5 “Ame mandyikeveavela enyina, notyipandyi mondywo yange no mokati kovimato viange,
Otyipuka otyiwa vali tyipona ovana ovakwendye novakainthu.
Mandyikevepa enyina limwe lihapu,
Enyina lihanyimi-ko
6 Ononthunda-vilongo vokwahula ku Siovaa na vemuumbile,
Opo vahumbe enyina lya Siovaa,+
Nokukala ovaundapi vae,
Aveho vana valandula Otyasapalo, avehetyisilisa,
Vana vakakatela momphango yange,
7 Ava navo mandyiveeta komphunda yange ikola,+
Andyivekalesa nehambu mokati kondywo yange yomalikwambelo.
Oviawa viavo viokuyokwa, novilikutila viavo, maviketavelwa komutala wange wovilikutila.
Mokonda ondywo yange, maikatiwa ondywo yomalikwambelo ovanthu vovilongo aviho.”+
8 Tatekulu Ohamba Onene Siovaa, ukahi nokwongiya ova Isilayeli velityandyana, wati:+
“Mandyikaongiya vali ovakwavo kwe, okuyawisa ku vana vaongiywa-le.”+
9 Onwe amuho vinyama viohika, endywei mulie,
Onwe amuho, vinyama vyo motyiteta.+
10 Ovalavi vae ovamphoki,+ kaveete natyike.+
Aveho ovimbwa ovihita-mulungu, vihetyivili okuweya.+
Vekahi nokulaka, valangala-po. Vetyihole tyokupoila.
11 Ovalavi ovo, ovimbwa viahuyukwa nokulia.*
Kavekuta nii vala katutu.
Ovanthita vokuhena enoñgonoko.+
Aveho vaya vala nonondyila mbavo mwene.
Tyiti ou woovola olukulu lwae, ou woovola olukulu lwae moumphulu otyo ati:
12 “Endywei, mandyikapola okavinyu,
Tunwei, atee tukolwa.+
Onthiki ya muhuka maikala vala ngo yo hono, mahi maikala vali nawa!”