Ovilinga Viovatumwa
27 Ankho pahe twatiwa umwe tuna okwenda nombapolo ko Italia,+ atyiti na Paulu nononkhwatwa ononkhwavo avevepakula komutumini womafwalali utiwa o Suliu, wovita vya Angusitu. 2 Etyi twanyingila mombapolo ankho itundilila ko Andalamitu yenda no oku kutalamena onombapolo motyilongo tyo Asiya, atweende; ankho tuna Alistaluku+ omu Masendonia wo ko Tesalonika. 3 Tyina tyiti muhuka lya mukwavo, atutulukila mo Sindone, Suliu alingi umwe otyali* Paulu, emuyeke nkhele ende komapanga ae vemukwateseko.
4 Oko atutundu-ko atulipake melunga, atukakwate konthele ko Sipele tuyepe omphepo ankho ili nokutweenda omapita. 5 Pahe atutete elunga atukalamba no Silisia no Pafilia atukatalama ko Mila mo Lisia. 6 Oko, omutumini womafwalali avasi-ko ombapolo yo ko Alesandiliya yenda no ko Italia, ngamo etupaka. 7 Atukala ononthiki ononyingi tyeenda vala, ankho tulihindaika vala, pahe atuhiki mo Kinindu, mahi pakalele ovilinga. Omphepo ankho ili nokututahela oku kwehe-ko, pahe atukwate konthele ko Keleta no Salomone tuyepe omphepo. 8 Atyitupwilisa unene okutyama nelunga, atukehika pamwe patiwa o Pokuhikila Onombapolo Popawa, ponthele pepunda-umbo lyo Laseya.
9 Ankho pakala umwe ononthiki, ngwe pahe ankho okunyingila vali melunga okweliyumbahi umwe, opo ngootyo Onthiki Yokupata Ononkhali,+ onthiki yokwahali* ankho yalamba-le, pahe Paulu evepopila 10 ati: “Vakwe, tyina ndyitala ñgaa, ine twenda haa matyitunyono, matukapeseka, kamatupeseka vala kovityuma no kombapolo, matupeseka umwe nomwenyo wetu.”* 11 Ou omutumini womafwalali ehetavela tyapopia Paulu, etavela komutahi, no ku hekulu yombapolo. 12 Mokonda ankho pokutalamena onombapolo okukala-po pomuvo woutalala kapekahi-ale nawa, ovaunyingi avahulu umwe vala kokwenda tyokwati hamwe vetyivila okuhika po Fenikisi, omuvo woutalala uvepwile opo, opo o pokutalamena onombapolo ko Keleta, okutala kombanda no kombwelo.
13 Etyi kombwelo kwatunda okamphepo kafila nawa, avati hamwe etyi vahandele tyania, avahakulula ohako yombapolo avatyame no Keleta, kongengeso yelunga. 14 Mahi kavaendele-po-ale ehimbwe, akuya omphepo imwe onene valukile okuti Eulakilau.* 15 Omphepo ailiyumbu mombapolo, okwenda no komutwe atyehetavela, pahe atuyaangulula-ko, atuviuku vala oku omphepo ina nokututahela. 16 Atukakwata ponthele pokalongo kamwe pokati komeva patiwa opo Kaunda tuyepe omphepo, mahi atupwila owato* ankho ili konyima yahanda okwenda. 17 Mahi etyi veinana-ko, avakutu ombapolo nomapanda, pahe ankho tyokwatila vala owoma vati hamwe mavakaveta meheke mo Siliti,* avavoveka ovinyanga viokweendesa ombapolo aitahwa vala nomphepo. 18 Mokonda omphepo ankho yalinga onene ili nokutupuka-puka vala, etyi tyati monthiki ya vali ovityuma kombapolo avahimbika okutepulula-ko. 19 Tyina tyiti monthiki ya tatu, pahe avakwate ovipuka vimwe viombapolo yatyo mwene, otyo veviyumbahi.
20 Etyi twakala ononthiki ononyingi otyo ekumbi liahamoneka nii vala ononthungululu, tuli vala omo nokupukwa-pukwa nomphepo onene,* pahe atuhulilwa umwe nokuti vala matuhupu pahe ankho katutyeete-ale vali. 21 Ovanthu ankho vakala ononthiki ononyingi otyo vahali natyike, Paulu pahe atalama pokati kavo ati: “Vakwe, soka ine mwetavelele etyi napopile, atwahatundu ko Keleta, ñgeno katwamwene emone eli hono tumona, ñgeno kamwapesekele ñgaa.+ 22 Mahi, pahe ndyimuti, likwatehilei, pano petupu-ale ou mavombo-po,* ombapolo vala maipeseka. 23 Kounthiki naendelelwe noandyu+ ya Huku, Huku yange, ou ndyilingila ovilinga vikola 24 yati: ‘Paulu wahatile owoma. Ove una umwe okukatalama kotyipala tya Sesale,+ tala! Huku wekupa ovanthu ava aveho muna-vo mombapolo.’ 25 Vakwe Likwatehilei, ame ndyiyumba onthumbi mu Huku, etyi natolelwa otyo umwe matyeende. 26 Tuna umwe pokalongo matutahelwa.”+
27 Atee umwe twakati monthiki 14 kokangulohi tuli vala nokutahwa-tahwa Melunga lyo Andiliya, tyina tyiti mokati kovinthiki vokutaha ombapolo pahe veivala hamwe tuna apa matuvahi eheke. 28 Avatale ine nkhele papita kohi vakati ñgaa pena onometulu mbukehika 36,* avaende-po vali katutu avatale vali ine nkhele papita kohi vakati ñgaa pena onometulu mbukehika 27. 29 Tyokwati vala pahe nowoma wokuti hamwe mavakaveta mononkhanda, onohako mbo komutwe avembuyumbu momeva, mokuti-vo hamwe kutya. 30 Vokutaha ombapolo pahe ankho vahanda okuhomboka-ko, otyo vakutulula okawato, ngatyina vahanda okuyumba momeva onohako mbo konyima, 31 Paulu atolela omutumini womafwalali, nomafwalali atyo ati: “Ovalume ava okwahakala mombapolo muno, onwe kamamuhupu.”+ 32 Omafwalali aatete omapanda okawato avekeyeke.
33 Tyina umwe pahe kutya, Paulu aveho evepameka omutima valie-po katutu, ati: “Hono ñgaa twavetesa ononthiki 14 otyo mwalinga vala otyiho, ngwe mutupu natyike mwalia. 34 Vakwe liei, likwatehilei; liei mukale nawa, onwe ñgaa noluhuki vala momitwe vienyi kamaluvombo-mo.” 35 Etyi apopia ngootyo, akwate ombolo, apandula ku Huku otyo aveho vatala, eivembula ahimbika okulia. 36 Pahe aveho avomono ononkhono navo avahimbika okulia. 37 Atuho-atuho mombapolo ankho tuna-mo* 276. 38 Etyi pahe valia umwe vatuuka, avahimbika okupepulula ombapolo, otiliku aveiyumbu melunga.+
39 Akutyi umwe akwaandyuluka, mahi apa ankho veli kavaimbukile-po, vakati-ko ñgaa ngo oko kumonekela eheke,+ avahetekela vatale hamwe vetyivila okukatalameka opo ombapolo. 40 Pahe avatipula onongoi, onohako ambutokela melunga, nonongoi mbovimuti viokutaha ombapolo avembukutulula; avayelula ovinyanga viatyo itahwe nomphepo na vaye no keheke. 41 Avakapuma metulumba lieheke lili mokati kelunga, ombapolo ngamo ihaka, onyima yatyo aihake ayahapikita vali, oku komutwe omanyonda elunga aahimbika okuveta-mo otyo iteka.+ 42 Aa omafwalali aati hahe okwiipaa ononkhwatwa hamwe mbuyoa ambukalomboka. 43 Mahi omutumini womafwalali mokonda ankho wahanda Paulu ahupe, eheveyeke valinge otyo vasoka. Vokutyivila okuyoa evetumu valombokele melunga vayoe vekehike keheke, 44 ava vakwavo valandule-ko; vamwe avayoela komavai, ovakwavo avayoela kovinthimbu viombapolo. Aveho umwe avahupu, avehiki keheke.+