Ovilinga Viovatumwa
23 Paulu atale mo Vombonge Onene, ati: “Vanthu vetu, vakulu vange, ame evi ndyilinga komutima wange kakunekale-ale otyikelei komaiho a Huku+ no hono vala.” 2 Okwiiva otyo, Ananiya omunene-nakwa atumu ava vetai ponthee yae vemuvete komulungu. 3 Paulu emupopila ati: “Huku mekuvange wemphinia ove. Ove upumphama kotyipundi tyonomphela, pahe opengesa umwe Otyitumino, ove umwe pahe uti ndyivetwe?” 4 Ava ankho vetai navo avati: “Ovee, utañgunina omunene-nakwa wa Huku?” 5 Paulu ati: “Vakulu vange, ame hetyikolele okuti omunene-nakwa. Tyahonekwa: ‘Wahapopie omapita ohongoi yotyilongo.’”+
6 Pahe Paulu etyi etyimona okuti naina pati nova Sanduseu nova Faliseu, apopila umwe peulu Mombonge omo Onene, ati: “Vakwe, vanthu vetu, ame ndyimu Faliseu,+ ndyimona wova Faliseu. Etyi nakwatelwa ñgaa okwetavela etutilo liovokwankhia.” 7 Onondaka ombo apopia, ambunkhindula onondyaya pova Faliseu nova Sanduseu, ovanthu pahe atyiti vala ava vahula oku, ava vahula oku. 8 Mokonda ova Sanduseu vati kutupu etutilo, kutupu onoandyu,* mahi ova Faliseu ankho vati ovipuka ovio aviho okovili.*+ 9 Ovanthu avahimbika vala okuviela, vamwe vokwahula kova Faliseu avakatuka, avemwaamena avati: “Omulume ou utupu-ale etyi alinga tyapenga; mwene hamwe una omphepo yapopia nae, hamwe tupu oandyu+ —.” 10 Mahi etyi vayaya vali unene, omunene watyo womafwalali pahe atili owoma, ankho wati hamwe ovanthu mavakwata Paulu avemutunyauna, atumu omafwalali alauke, ekemupole-po puvo, emutwale no mokati momafwalali.
11 Ngwe tyina tyiti kounthiki watyo, Tatekulu atalama ponthele yae ati: “Likwatehila!+ Ove wapale ovanthu oumbangi wamphopia-le mo Selusalei, pahe mokamphopia no ko Loma ukape ovanthu oumbangi.”+
12 Etyi kwatya, ova Sundaa avelipakela-mo vemwiipae, avaane umwe, avati hono katuli, katunu tyahaipaele Paulu. 13 Pomphango yatyo opo, pelipakele ovalume valamba 40, vaanene umwe. 14 Ovalume ovo avaende kononkhalamutwe mbovanakwa no kovakulu, avati: “Onthwe twaana* umwe, kamatuli natyike tyahaipaele Paulu. 15 Onwe pahe lipakelei-mo no Vombonge Onene, tumei omunene watyo womafwalali emweete kuno kwoonwe mulinge ngatyina mwahanda okutala vali nawa ondaka yae. Onthwe matumumanekela umwe, kuno ehehiki-ale atumwiipaela pokati.”
16 Etyi omukwendye umwe omona womphange ya Paulu etyiiva otyo vahanda okulinga, aende akanyingila momafwalali, eketyipopila Paulu. 17 Paulu aihana onkhalamutwe yomafwalali ati: “Twala omukwendye ou komunene womafwalali, una etyi ahanda okumutolela.” 18 Emutwala komunene watyo womafwalali ati: “Paulu wandyihana apopi naame ati twala omukwendye ou tyatiwa una etyi ahanda okukutolela.” 19 Omunene womafwalali emukwate mokuvoko, aende nae ngo opo, emupulu ati: “Oityi ya?” 20 Ngwe ati: “Ova Sundaa velipakela-mo muhuka veye okupopia noove utwale Paulu Kombonge Onene, tyilinge vala ngatyina uti vahanda vali okutehela nawa ondaka yae.+ 21 Mahi ove wehevetavele-vo mbaa, pena ovalume valamba 40 mavemuyolamena, vaana* umwe, vati umwe katuli, katunu tyehemwiipaele;+ ñgaa vamaneka-le, vakevela vala ove uvetavele.” 22 Omunene womafwalali apopila omukwendye oo ati: “Wahatolele umwe nawike okuti ove weile okutyimphopila otyipuka otyo,” pahe emuyeke aye.
23 Aihana ononkhalamutwe onombali mbomafwalali, ati: “Pungei-po ovalume vena 200 vamaneke, novalume vokweendela kononkhambe vena 70, no vokumaneka omaonga vena 200, vaye ko Sesaleya koola ya tatu kongulohi.* 24 Paulu mutaindyilei ononkhambe, mutyivile okumuyunga umwe nawa ekehike komutumini Felisi.” 25 Pahe ahoneka omukanda ati:
26 “Ame Kalaundiu Lisia, nekuhonekela Mutumini Felisi: Ndyikukukunya-po! 27 Omulume ou wakwatwa nova Sundaa, ankho vahanda okumwipaa, ame kuna andyiya umwe novita viange andyimuhukulula+ etyi netyiiva okuti omu Loma.+ 28 Mokwahanda okunoñgonoka oityi vemuhungila andyilauka nae Kombonge yavo Onene.+ 29 Etyi namona ahungwa o Tyovitumino viavo,+ mahi utupu etyi alinga nii vala katutu tyimwipaesa hamwe atyimupakesa mokaleya. 30 Mahi pahe etyi neiva omphango vemupanga,+ andyiti ndyimutume kwoove, ava veli nokumuhunga veye okupopila oko kwoove etyi alinga.”
31 Omafwalali oo, aalingi umwe etyi atumwa, aapolo opo Paulu+ kounthiki, aemutwala no ko Andipatilite. 32 Etyi pahe kwatya aakondoka komakwavo, aende vala no vokwaendela kononkhambe. 33 Ovo vokwaendela kononkhambe avakanyingila umwe mo Sesaleya, omukanda aveuhikiya komutumini, na Paulu avemupakula kwe. 34 Omukanda eutange, pahe apulu o wo kotyilongo patyi, avemuti owo ko Silisia.+ 35 Pahe ati: “Matukevela vokwekuhunga,+ ndyitehele omphela yove.” Atumu ayungilwe mombala* ya Helonde.