Omukanda wo Tete Onohamba
14 Pononthiki opo Ambiya, omona wa Selombowau avele. 2 Selombowau apopila omukai wae okuti: “Mbambavo, liimbilisa opo vehekwimbuke okuti umukai wa Selombowau, oende ko Silo. Oko kuna Aiya omuuli. Oe wamphopila okuti ame mandyikakala ohamba yovanthu ava.+ 3 Tyinda onombolo 10, nomingome viaundaiswa nawa, nokatenda kowiki, ovitwala kwe. Mekupopila oñgeni omona makala.”
4 Omukai wa Selombowau alingi etyi apopilwa. Aende ko Silo+ ehiki meumbo lya Aiya. Omaiho a Aiya ankho kaapikita; ankho keete-po vali mokonda yokwakulupa.
5 Mahi Siovaa wapopilile Aiya okuti: “Apa katutu omukai wa Selombowau meya okukupula konthele yomona wae wavela. Ame mandyikupopila etyi una okupopia.* Tyina eya, meya tyeliimbilisa.”
6 Etyi Aiya emwiva ukahi nokunyingila pombundi, ati: “Mukai wa Selombowau nyingila. Omokonda yatyi welityitulila? Natumwa opo ndyikupopile ondaka imwe yalema. 7 Enda, kapopile Selombowau okuti: ‘Siovaa Huku yo Isilayeli wati: “Ame nekukatula pokati kovanthu vove opo ndyikulinge onkhalamutwe yovanthu vange ova Isilayeli.+ 8 Napola ouhamba meumbo lya Ndaviti andyikwavela-o.+ Mahi ove kukahi ngomuumbili wange Ndaviti, wokwaendelele movitumino viange, etavela nomutima wae auho, okulinga vala etyi tyaviuka komaiho ange.+ 9 Ove walinga vali etyi tyapenga tyipona aveho vatetekela okutumina kwoove, welilingila otyika-huku novilolo viotyivela* opo unumanese,+ wanthyindamena.+ 10 Mokonda yotyo, mandyietela ononkhumbi eumbo lya Selombowau; mandyinyimi-ko* mo Isilayeli ovalume* aveho vo meumbo lya Selombowau, okukutikinyamo vana vahulilwa no vokwasoya, mandyikombo eumbo lya Selombowau,+ ngeetyi tyikombwa omatwii apahahupu natyike! 11 Vo meumbo lya Selombowau mavankhila mepunda-umbo, ovimbwa mavikevelia-po; vana mavankhila movipembe mavakaliwa noviila, mokonda o Siovaa wetyipopia.”’
12 “Pahe katuka, enda no keumbo. Moti vala tyina upaka onomphai mepunda-umbo, omona anyimi. 13 Ova Isilayeli mavekemulila avekemupaka. Mombunga ya Selombowau omona oo vala makapakwa meendo, mokonda oe vala aike meumbo lya Selombowau Siovaa Huku yo Isilayeli amona otyipuka otyiwa. 14 Okutuka monthiki oyo, Siovaa maovola ohamba onkhwavo maitumina o Isilayeli, maikanyima-ko* eumbo lya Selombowau.+ Otyo tyikahi-ale nokumoneka. 15 Siovaa makaipaa ova Isilayeli, avakayalala kombanda yomaande ngotyingenge, ova Isilayeli ekevetukula meheke eli ewa ankho aavela ovakwaukulu vavo,+ ekeveyandyanesa nthele-ina Ondongi*+ mokonda velitungila ovipandyi vikola,*+ avanumanesa Siovaa. 16 Ngwe makayeka-po o Isilayeli mokonda yononkhali Selombowau alinga, alingisisa ova Isilayeli okulinga onkhali.”+
17 Omukai wa Selombowau akatuka aende, akondoka ko Tilisa. Tyina ehika kombundi yeumbo, omona anyimi. 18 Avemupake, ova Isilayeli aveho avemulili ngeetyi Siovaa apopile etyi atuma omuundapi wae omuuli Aiya.
19 Ovipuka ovikwavo viehipululo lya Selombowau, ovilwa+ alingile netyi atumina, viahonekwa momukanda womahipululo o pononthiki mbonohamba mbo Isilayeli. 20 Ononthiki Selombowau atumina mbutuuka omanima 22. Konyima, akapululukwa-po novakwaukulu vae;+ Nandambe omona wae, emupingi kouhamba.+
21 Pononthiki opo, Lombowau omona wa Salomau, oe ohamba yo Sundaa. Lombowau wali nomanima 41 etyi alinga ohamba, atumina omanima 17 mo Selusalei, epunda-umbo Siovaa aholovona+ pomapunda-umbo omihoko aviho vyo Isilayeli opo likale omphangu apaka enyina liae.+ Ina ya Lombowau wali omu Amoo utiwa o Naamaa.+ 22 Ova Sundaa ankho valinga ovivi komaiho a Siovaa,+ mokonda yononkhali valinga, avemunumanesa vali unene tyipona ovakwaukulu vavo.+ 23 Tupu ankho vatunga onomphangu mbukola mbaya peulu, nonomphandyi mbukola, novipandyi vikola,*+ ankho vatunga motyipunda+ atyiho tyokwaya peulu nomombwelo yomuti wavinda.+ 24 Tupu motyilongo+ ankho muna ovalume valala* novalume vakwavo mondywo ya Huku. Ankho valinga ovipuka viapenga unene ngeevi ovanthu Siovaa ataatele komaiho ova Isilayeli ankho valinga.
25 Menima lya tano ohamba Lombowau eli kovipundi, Sisake+ ohamba yo Isitu, akatuka eya okulwisa o Selusalei.+ 26 Atyindi-mo omalumono aeho o mondywo ya Siovaa nomalumono aeho o mondywo*+ yohamba. Atyindi umwe atyiho, nonondyakulilo ambuho mboolu Salomau alingile.+ 27 Ohamba Lombowau alingi onondyakulilo mbotyivela otyitasu mbupinge-po, embwaavela ononkhalamutwe mbovayungi* vayunga kombundi yeumbo liohamba. 28 Apeho tyina ohamba yenda mondywo ya Siovaa, ovayungi vatyinda onondyakulilo, haa avembukondola vali mondywo yovayungi.
29 Ovipuka ovikwavo viehipululo lya Lombowau, ovipuka aviho alinga, kaviahonekelwe momukanda womahipululo o pononthiki mbonohamba mbo Sundaa?+ 30 Pokati ka Lombowau na Selombowau+ apeho ankho pakala ovilwa. 31 Pahe Lombowau akapululukwa-po nonombwale mbavo, akapakwa komaendo ovakwaukulu vae Mepunda-umbo lya Ndaviti.+ Ina wali omu Amoo+ utiwa o Naamaa. Omona wae Ambiyau*+ emupingi kouhamba.