Omukanda wa Vali Ehipululo
2 Pahe Salomau atumu okutunga ondywo inkhimaneka enyina lya Siovaa+ nombala* youhamba wae mwene.+ 2 Salomau aovola ovalume 70.000 vokumuundapela* no vokuteta omamanya monomphunda vena 80.000,+ nononkhalamutwe mbavo vena 3.600.+ 3 Tupu Salomau atumu vakapopile Hilau+ ohamba yo Tilu okuti: “Ndinge-vo ngeetyi walingile tate yange Ndaviti, etyi wemutumikisile omavai omusendulu opo atunge eumbo liae.*+ 4 Ame mandyitungila enyina lya Siovaa Huku yange ondywo, ndyimusukukisile-yo opo ikale yokuyokela onombao mbunika nawa+ komaiho ae nokupaka apeho onombolo mbotyiawa.+ Tupu mamulingilwa oviawa viokuyokwa komuhuka no kongulohi,+ no movityasapalo+ na tyina ohanyi yaviala+ no pononthiki mbovipito+ vya Siovaa Huku yetu. Otyo, otyilinga ova Isilayeli vena okulinga apeho. 5 Ondywo mandyitungu maikala onene, mokonda Huku yetu omunene vali kovika-huku aviho. 6 Olie upondola okumutungila ondywo? Komaulu no keulu lyo komaulu, kafu-ko.+ Pahe ame, ame-lie ndyimutungile ondywo, nkhwali himutungila vala omphangu yokuyokela ovilikutila komaiho ae? 7 Pahe nthume-vo omulume utyivila okuundapa nawa noolu nopalata, notyitasu,+ notyivela, novinyanga viotyivala tyonkhula, novinkhuhu,* novingole, tupu utyivila okuhonga ovipuka. Ngwe maundapa mo Sundaa no mo Selusalei novanongo vange, tate yange Ndaviti ataindya.+ 8 Tupu nthume omavai omusendulu wo ko Limbanu no omungalaviya,+ no omusandalu,+ mokonda ndyityii nawa okuti ovaundapi vove vetyivila okutyoka omiti vyo ko Limbanu.+ Ovaundapi vange mavaundapa novaundapi vove+ 9 opo vanthyongele omavai omanyingi, mokonda ondywo mandyitungu maikala onene unene. 10 Tala! Ovaundapi vove vokutyoka omiti viomavai, mandyiveavela okulia,+ ono kolu* 20.000 mbotiliku nono kolu 20.000 mbosevata, nonombatu* 20.000 mbovinyu, nonombatu 20.000 mbomulela.”
11 Hilau ohamba yo Tilu, ahonekela Salomau omukanda ati: “Mokonda Siovaa uhole ovanthu vove, wekulinga ohamba opo uvetumine.” 12 Hilau apopi vali okuti: “Siovaa Huku yo Isilayeli wokwatunga eulu nohi ahilivikwe, mokonda waavela Ohamba Ndaviti omona omunongo,+ walunguka una onondunge,+ matungu ondywo ya Siovaa nombala youhamba wae mwene. 13 Pahe ndyikahi nokutuma Hilau-Ambi+ omulume umwe omunongo, una enoñgonoko, 14 mee yae owomuhoko wa Ndaa, tate yae omu Tilu. Omulume umwe utyivila okuundapa noolu nopalata, notyitasu, novivela, nomamanya, nomavai, nomainya otyivala tyonkhula, nomulinya omungole, novinyanga viokwankhimana, nomulinya wakuhuka.+ Tupu utyivila okuhonga ovipuka aviho nokulinga ovipuka aviho ovikwavo aitwa.+ Maundapa novanongo vove novanongo va tatekulu yange Ndaviti, tate yove. 15 Pahe ove tatekulu yange, tuma otiliku nosevata, novinyu walaa okwaavela ovapika vove.+ 16 Onthwe matukutyokela omiti aviho mo Limbanu+ ove wesuka navio, atuvikutu ovipandi avikwateswa melunga atee ko Sope.+ Ove ovipolo-ko okevitwala ko Selusalei.”+
17 Salomau avalula ovalume aveho ononthunda-vilongo vakala motyilongo tyo Isilayeli+ ngeetyi tyalingile tate yae Ndaviti,+ avatuuka 153.600. 18 Povalume ovo apolo-po vena 70.000 vokumuundapela,* 80.000 evepe ovilinga viokuteta omamanya+ monomphunda, 3.600 avakala ononkhalamutwe mbavo.+