Omukanda wo Tete Onohamba

15 Menima 18 ohamba Selombowau+ omona wa Nembate eli kovipundi, Ambiyau akala ohamba yo mo Sundaa.+ 2 Watuminine omanima etatu mo Selusalei. Ina utiwa o Maakaa+ omutekula wa Ambisalome. 3 Alingi ononkhali ngombu mbalingile he, omutima wae ankho hamukwatyili-ko* ku Siovaa Huku yae, ngomutima wa Ndaviti, omukwaukulu wae. 4 Mahi mokonda ya Ndaviti,+ Siovaa Huku yae, wemwavela okandiyelo* mo Selusalei,+ mokwapaka omona wae pomphangu yae, apameka o Selusalei opo itwaleko apeho. 5 Mokonda Ndaviti walingile atyiho tyaviuka komaiho a Siovaa, ononthiki ambuho mbomwenyo wae, kaanyene natyike Huku emutumine, otyetyi vala alingile Uliya omu Hete.+ 6 Pokati ka Lombowau na Selombowau ankho pakalela vala ovilwa ononthiki mbatyo ambuho mbomwenyo wavo.+

7 Ovipuka ovikwavo viehipululo lya Ambiyau, ovipuka aviho alinga, kaviahonekelwe momukanda womahipululo o pononthiki mbonohamba mbo Sundaa?+ Tupu pokati kavo ovo Ambiyau na Selombowau+ pakalele ovilwa. 8 Ambiyau akapululukwa-po novakwaukulu vae, akapakwa pomaendo onombwale mbavo Mepunda-umbo lya Ndaviti; omona wae Asa+ akala ohamba emupingi kouhamba.+

9 Menima 20 Selombowau ohamba yo Isilayeli eli kovipundi, Asa ahimbika okutumina mo Sundaa. 10 Atumina omanima 41 mo Selusalei. Ina-mukulukai* ankho utiwa o Maakaa+ omutekula wa Ambisalome. 11 Asa walingile etyi tyaviuka komaiho a Siovaa,+ ngeetyi tyalingile Ndaviti omukwaukulu wae. 12 Wataatele motyilongo+ ovalume ankho valala novalume ovakwavo mondywo ya Huku, ahanyemo ovilolo aviho vitoyesa,* vina ovakwaukulu vavo valingile.+ 13 Asa atee umwe wapolele ina-mukulukai Maakaa+ kovipundi,* mokonda walinga otyika-huku tyimwe tyitoyesa+ afende kotyipandyi tyikola.* Wahanyaunine-ko otyika-huku tyitoyesa tya ina-mukulukai, etyitwala Komulola wo Sendoloo,+ etyipake motupia. 14 Mahi onomphangu mbukola mbokwaya peulu kembuhanyene-ko,+ omutima wa Asa wali wotyili* ku Siovaa, momwenyo wae auho.* 15 Atwala mondywo ya Siovaa ovipuka vapakulile na tate yae vialinga ovipuka vikola: Opalata, noolu, novityuma ovinyingi.+

16 Pokati ka Asa na Mbaasa+ ohamba yo Isilayeli, apeho ankho pakala ovilwa. 17 Mbaasa ohamba yo Isilayeli, eya okulwisa o Sundaa, ahimbika okupameka* o Lamaa+ opo pahamone nawike unyingila nii ou ulupuka mohika ya* Asa ohamba yo Sundaa.+ 18 Opo yatyo opo Asa apolo opalata aiho noolu aiho yokwahupile momalumono o mondywo ya Siovaa no momalumono o mondywo* yohamba eyaavela ovaundapi vae. Ohamba Asa ayeetumu veetwale ku Mbeni-Handande, omona wa Tambilimo, Tambilimo omona wa Hesiyoo ohamba yo Silia,+ ikala ko Ndamasiku, atumu vemupopile okuti: 19 “Twalinga omphango* na ame no ove, na tate yange na tate yove. Nekutuma opalata no olu otyali. Yeka-po omphango walinga* na Mbaasa ohamba yo Isilayeli, opo atunde mohika yange.” 20 Mbeni-Handande etavela Kohamba Asa, atumu ononkhalamutwe mbomafwalali ae vakalwise omapunda-umbo o Isilayeli, avateye-po o Isoo,+ no Ndaa,+ no Ambele-Mbete-Maakaa, no Kinelete aiho notyilongo atyiho tyo Nafitalii. 21 Etyi Mbaasa etyiiva, ayeke-po okupameka* o Lamaa, atwalako okukala mo Tilisa.+ 22 Ohamba Asa aiihana ovanthu aveho vo Sundaa — petupu ou wahaihanenwe — avatyindi-po omamanya nomavai oko Lamaa, ana Mbaasa ali nokutunga nao, ohamba Asa ngao ipameka* nao o Semba+ ko Mbesamii no Misipaa.+

23 Ovipuka ovikwavo viehipululo lya Asa, ovilinga viae aviho ovinene alinga, atyiho alinga nomapunda-umbo atunga,* kaviahonekelwe momukanda womahipululo o pononthiki mbonohamba mbo Sundaa? Mahi etyi akulupa akala nouvela umwe monomphai.+ 24 Asa akapululukwa-po nonombwale mbavo, akapakwa pomaendo ovakwaukulu vae Mepunda-umbo lya Ndaviti omukwaukulu wae. Omona wae Seosafaa+ akala ohamba emupingi kotyipundi.

25 Nandambe+ omona wa Selombowau akala ohamba mo Isilayeli menima lya vali Asa ohamba yo Sundaa eli kovipundi, atumina mo Isilayeli omanima evali. 26 Ankho ulinga etyi tyapenga komaiho a Siovaa, ankho weendela monondyila mba tate yae,+ no mononkhali mbae, walingisisile ova Isilayeli okulinga onkhali.+ 27 Mbaasa omona wa Aiya, womeumbo lya Isakale, apange okwipaa Nandambe, Mbaasa emwipaela ko Simbetone+ yova Filisitiya, pweetyi Nandambe nova Isilayeli aveho vekahi nokuliseta no Simbetone. 28 Mbaasa wemwipaa menima lya tatu Asa ohamba yo Sundaa eli kovipundi, emupingi kouhamba. 29 Etyi akala ohamba, aipaa aveho vomeumbo lya Selombowau. Ahasi-mo nawike womeumbo lya Selombowau ufima, eveipaa aveho ngeetyi tyapopile Siovaa etyi atumine omuundapi wae Aiya, omu Silo.+ 30 Otyo tyamoneka mokonda yononkhali Selombowau alingile, alingisisa ova Isilayeli okulinga onkhali, mokonda wanumanesile unene Siovaa, Huku yova Isilayeli. 31 Ovipuka ovikwavo viehipululo lya Nandambe, ovipuka aviho alinga, kaviahonekelwe momukanda womahipululo o pononthiki mbonohamba mbo Isilayeli? 32 Pokati ka Asa na Mbaasa ohamba yo Isilayeli,+ apeho ankho pakalela vala ovilwa.

33 Menima lya tatu Asa ohamba yo Sundaa eli kovipundi, Mbaasa omona wa Aiya akala ohamba mo Tilisa, atumina o Isilayeli aiho omanima 24.+ 34 Mahi ankho ulinga etyi tyapenga komaiho a Siovaa,+ ankho weendela monondyila mba Selombowau, no mononkhali mbae, walingisisile ova Isilayeli onkhali.+