Omukanda wo Tete Ehipululo
15 Ndaviti atwalako okulitungila onondywo Mepunda-umbo lya Ndaviti. Tupu, aviukisa nawa pomphangu imwe opo apake-po Otyikasa tya Huku yotyotyili, etyitungila-po ekaka.+ 2 Ndaviti ati: “O vomuhoko wa Levii vala vena okutyinda otyikasa tya Huku, mokonda ovo Siovaa akoya opo vatyinde otyikasa tya Siovaa, nokumuundapela apeho.”+ 3 Ndaviti aongiya ova Isilayeli aveho mo Selusalei opo vakapole Otyikasa tya Siovaa, avetyieta apa etyitungila.+
4 Ndaviti aongiya ovana va Alau+ no vokwatuka mu Levii.+ 5 Povana va Kowate, ankho pena Uliyeli onkhalamutwe, na vana elilandula navo vena 120. 6 Povana va Melali, ankho pena Asaiya+ onkhalamutwe, na vana elikwai navo vena 220. 7 Povana va Seleso, ankho pena Sowele+ onkhalamutwe, na vana elikwai navo vena 130. 8 Povana va Elisafaa,+ ankho pena Semaiya onkhalamutwe, na vana elilandula navo vena 200. 9 Povana va Hemboloo, ankho pena Eliyeli onkhalamutwe, na vana elilandula navo vena 80. 10 Povana va Usiyeli,+ ankho pena Aminandambe onkhalamutwe, na vana elikwai navo vena 112. 11 Tupu, Ndaviti aihana ovanakwa, Sandoke+ na Ambiyatale,+ povana va Levii aihana-po Uliyeli, na Asaiya, na Sowele, na Semaiya, na Eliyeli na Aminandambe, 12 evepopila okuti: “Onwe, munonkhalamutwe mbovana va Levii, momaumbo ovoho. Onwe na vana mulikwai navo, lisukukisei, amukapola Otyikasa tya Siovaa, Huku yo Isilayeli amutyieta apa netyitungila. 13 Mokonda, onthiki yo tete kamwetyityindile,+ Siovaa Huku yetu etuvange,+ tyeetyi, katwaovolele okunoñgonoka oñgeni ñgeno tyityindwa.”+ 14 Ovanakwa novana va Levii avelisukukisa, opo vakapole Otyikasa tya Siovaa, Huku yo Isilayeli.
15 Ovana va Levii avatyindi potyipepe komitengi Otyikasa tya Huku yotyotyili,+ ngeetyi Siovaa atumine Mwisesi. 16 Ndaviti apopila ononkhalamutwe mbovana va Levii opo vakoye vana velikwai navo ovaimbi, opo vaimbe nehambu, otyo vahika ovihumba, novisandyi,+ nomalata.+
17 Ovana va Levii avakoyo Hemaa+ omona wa Sowele. Pu vana velikwai navo, avakoyo-po Asafe+ omona wa Mbelekiya. Pu vana velilandula navo ovana va Melali, avakoyo-po Etaa+ omona wa Kusaiya, 18 na vana velilandula navo, votyikundyi tya vali:+ Sakaliya, na Mbene, na Saasieli, na Semilamote, na Seyeli, na Uni, na Eliyambe, na Mbenaya, na Maaseya, na Matitiya, na Elifeleu, na Mikineya, no vokuyunga ponombundi, ovo Ombende-Endoo na Seyele. 19 Hemaa,+ na Asafe+ na Etaa vokwimba, ankho vena okuhika omalata otyitasu.+ 20 Sakaliya, na Asiyele, na Semilamote, na Seyeli, na Uni, na Eliyambe, na Maaseya na Mbenaya, ankho vahika ovihumba vialundwa nawa, avahiki mo Alamote.*+ 21 Matitiya,+ na Elifeleu, na Mikineya, na Ombende-Endoo, na Seyele na Asasiya, ankho ovo vahongolela vokwimba, ankho vahika ovisandyi vialundwa nawa, avihiki mo Seminite.*+ 22 Kenaniya+ onkhalamutwe yovana va Levii, ankho oe uhongolela vokutyinda Otyikasa, mokonda ankho utyii nawa. 23 Mbelekiya na Elekana, ankho vayunga pombundi Yotyikasa. 24 Sembaniya, na Sosafaa, na Netaneli, na Amasai, na Sakaliya, na Mbenaya na Eliyesele, ankho ovanakwa vokuhika ononkhwino komutwe Wotyikasa tya Huku yotyotyili.+ Ombende-Endoo na Seiya navo ankho vayunga pombundi Yotyikasa.
25 Pahe Ndaviti novakulu vo Isilayeli, nononkhalamutwe mbovityita ekwii, avaende nehambu enene+ keumbo lya Ombende-Endoo okukapola otyikasa tyomphango tya Siovaa.+ 26 Etyi Huku yotyotyili akwatesako ovana va Levii vakatyindile otyikasa tyomphango tya Siovaa, avalingi ovilikutila onondume-tane epandu-vali, nonongi epandu-vali ononthwei.+ 27 Ndaviti opo uvala otyikutu tyehena omavoko tyalingwa notyinyanga tyimwe otyiwa, novana va Levii aveho vokwatyinda Otyikasa, no vokwimba, na Kenaniya onkhalamutwe yo vokutyinda otyikasa no vokwiimba. Ndaviti wavalele otyikutu tyovanakwa tyomulinya.+ 28 Ova Isilayeli aveho, vekahi nokweeta otyikasa tyomphango tya Siovaa, otyo vakwiilila nehambu enene,+ otyo vahika ononkhwino,+ nonombendo, nomalata, novihumba, novisandyi.+
29 Mahi, etyi otyikasa tyomphango tya Siovaa tyehika Mepunda-umbo lya Ndaviti,+ Mikale omona wa Saulu+ atalela pondyanena, amono Ohamba Ndaviti ukahi nokuhela. Ahimbika okumupopia omapita momutima.+