Omukanda wa Vali Onohamba
10 Akambe+ wali novana 70 ovakwendye vali ko Samaliya. Seuu ahoneka omikanda evitumu ko Samaliya kovatumini vo Sesiliyeli, no kovakulu vatyo,+ no ko vokuyunga ovana va Akambe.* Ati: 2 “Tyati umwe ovana va tatekulu yenyi onwe muna-vo. Omatemba ovilwa nononkhambe mbatyo onwe munambo, epunda-umbo lienyi liapama, ngwe muna ovihongati. Omukanda ou nga wehika kwoonwe, 3 povana va tatekulu yenyi koyei-po umwe ukahi vali nawa, wafwapo,* amumupake kotyipundi tyoutumini wa he. Lwilei eumbo lya tatekulu yenyi.”
4 Ovo ngwe avatili unene owoma avati: “Sokei vala! Ine onohamba onombali kambetyivilile okumulwisa,+ onthwe, onthwe valie?” 5 Ou omutumini wo mombala,* nomutumini wo mepunda-umbo, novakulu votyilongo, no vokuyunga ovana va Akambe, avatumu ondaka ku Seuu avati: “Onthwe tuvaundapi vove, matulingi atyiho ututuma. Kamatupake kouhamba omunthu nawike. Linga etyi tyaviuka komaiho ove.”
6 Seuu evehonekela vali omukanda wa vali ati: “Ine mwahula kwaame, mwati mwahanda okunthavela, muhuka ngoopo endywei kuno ko Sesiliyeli, amwetelela omitwe viovana va tatekulu yenyi.”
Ovana ovo vohamba 70 ovakwendye, opo yatyo vali mepunda-umbo kovalume vankhimana vokuvetekula. 7 Etyi vatambula omukanda oo, avakwata ovana 70+ vohamba aveveipaa, omitwe viatyo avevipake monosesu avevitumu ko Sesiliyeli. 8 Omutumwa-ndaka eya emupopila ati: “Vaeta omitwe viovana vohamba.” Emukumbulula okuti: “Viongiyei ononthunthu* onombali kombundi yepunda-umbo, amuvisi-po ngapo vikala atee kutya.” 9 Etyi apinduka-po komuhuka atalama komutwe wovanthu aveho ati: “Onwe hanwe-ko muvelwa onombei.* Ame nalingile omphango tatekulu yange andyimwipaa.+ Mahi olie waipaa ovanthu ava aveho? 10 Kalei tyityii okuti naike ondaka ya Siovaa, ondaka Siovaa apopia veumbo lya Akambe, yahamalingwa.*+ Siovaa ukahi nokulinga atyiho apopia, etyi atumine omuundapi wae Iliya.”+ 11 Seuu aipaa aveho vokwahupile meumbo lya Akambe ko Sesiliyeli, novalume veumbo liae ovanene vatyo, nomapanga ae, novanakwa vae,+ kahupisile-po nawike.+
12 Seuu atundu opo aende no ko Samaliya. Eumbo ovanthita vakutila onongi,* likala ponthele pondyila. 13 Oko aya oko, tyina avasa vana velilandula na Akasiya+ ohamba yo Sundaa evepulu okuti: “Onwe, onwe valie?” Avati: “Onthwe tulilandula na Akasiya, twenda tukatala ine ovana vohamba veli nawa, ovana va tembwa otyilongo.”* 14 Liwa-liwa apopila ovakwa-vita viae ati: “Vekwatei nomwenyo!” Avevekwata nomwenyo aveveipaela ponthele ponyombo yeumbo, pakutilwa onongi. Ovalume ovo vena 42, eveipaa aveho ahahupisa nawike.+
15 Atwalako akaya, akavasa Sonandambe+ omona wa Lekambe+ ukahi nokuya kwe. Emukukunya* emupulu okuti: “Omutima wove wayemba* umwe kwaame ngeetyi omutima wange wayemba kwoove?”
Sonandambe emukumbulula okuti: “Yoo!”
“Naina eta okuvoko.”
Ngootyo, aeta okuvoko Seuu emunanena ketemba liae liovilwa. 16 Emupopila okuti: “Twende atuho, opo utale etyi ame nahayeke onondyale mba* Siovaa.”+ Ngootyo Seuu emutyindi ketemba liae liovilwa. 17 Seuu ehiki ko Samaliya aipaa aveho vahupa meumbo lya Akambe ko Samaliya; anyimi-ko aveho,+ ngeetyi Siovaa apopile etyi atuma Iliya.+
18 Tupu Seuu aongiya ovanthu aveho evepopila okuti: “Akambe wafendele vala katutu Mbaale,+ mahi ame mandyimufende vali unene. 19 Pahe ihanei ovauli aveho va Mbaale,+ novanthu aveho vemufenda novanakwa+ vae aveho. Pahakambe nawike mokonda mandyilingila Mbaale otyilikutila otyinene. Una weheile maipawa.” Seuu wevekemba vala opo aipae ovanthu aveho vafenda Mbaale.
20 Seuu apopi okuti: “Popilei* ovanthu aveho veye keliongiyo enene lya Mbaale.” Avetyipopila ovanthu. 21 Seuu atumu ondaka mo Isilayeli aiho, ovanthu aveho vafenda Mbaale aveya. Nawike wakambele-po. Avanyingila mondywo* ya Mbaale,+ ondywo ya Mbaale aiho aiyula ovanthu. 22 Apopila una uyunga ondywo yokupaka omivalo ati: “Etela ovanthu aveho vokufenda Mbaale ovikutu.” Eveetela ovikutu. 23 Pahe Seuu na Sonandambe+ omona wa Lekambe, avanyingila mondywo ya Mbaale. Seuu apopila ovafendi va Mbaale okuti: “Ovolei nawa, muno muhakale nawike ufenda Siovaa mukale vala vokufenda Mbaale.” 24 Konyima avanyingila opo vaave ovilikutila noviawa viokuyokwa. Seuu ankho wapaka ovalume 80 pondye vamwe pomafwalali ae, evepopila okuti: “Ine umwe pwoonwe uhupisa omunthu wiike pwaava ndyikahi nokupakula pomavoko enyi, oe maipawa polukalo lwae.”*
25 Etyi vamana okulinga otyilikutila tyokuyokwa, Seuu apopila ovayungi* novatumini okuti: “Nyingilei amuveipaa! Muhahupisei nawike!”+ Ovayungi novatumini aveveipaa nomitunga otyo vayumba pondye omandindi atyo, avatwalako okuveipaa atee mondywo ikola* yondywo ya Mbaale. 26 Avatwala pondye onomphandyi mbukola+ mbo mondywo ya Mbaale, avembupake otupia.+ 27 Avahanye-ko otyipandyi tyikola+ tya Mbaale; tupu avahanye-ko ondywo ya Mbaale,+ aikala omphangu yokwila kofika ili-ko atee hono.
28 Ngootyo Seuu anyimi-mo Mbaale mo Isilayeli. 29 Mahi Seuu ahayeke-po ononkhali mba Selombowau, omona wa Nembate, mbuna Selombowau alingisisile ova Isilayeli konthele yokufenda ononthane mboolu mbuli ko Mbetele noko Ndaa.+ 30 Siovaa apopila Seuu okuti: “Mokonda yetyi walinga nawa, walinga etyi tyaviuka komaiho ange, olingi eumbo lya Akambe+ ngeetyi tyikahi momutima wange, mwoove omo mamutundu ovanthu mavekelipinga-pinga kotyipundi tyoutumini wo Isilayeli+ tukwana.” 31 Mahi Seuu ahaendela Motyitumino tya Siovaa Huku yo Isilayeli, nomutima wae auho.+ Kayekele-po ononkhali Selombowau alingisisile ova Isilayeli okulinga onkhali.+
32 Pononthiki opo Siovaa ahimbika katutu-katutu okupola* ova Isilayeli otyilongo. Hasayeli atwalako okulwisa ova Isilayeli+ motyilongo tyavo atyiho, 33 okutuka ko Solondau okwenda no koutundilo wekumbi, otyilongo atyiho tyo Sileyande, otyilongo tyova Ngande, nova Lumbe, nova Manasesi,+ tyahimbikila ko Alowele ikala popepi nomulola wo* Alunoo, atee ko Sileyande no Mbasaa.+
34 Ovipuka ovikwavo viehipululo lya Seuu, ovipuka aviho alinga, novipuka ovinene alinga, kaviahonekelwe momukanda womahipululo o pononthiki mbonohamba mbo Isilayeli? 35 Pahe, Seuu akapululukwa-po novakwaukulu vae, akapakwa ko Samaliya; Seowakasi+ omona wae emupingi kouhamba. 36 Ononthiki ambuho Seuu atuminine mo Isilayeli ko Samaliya mbutuuka omanima 28.