Omukanda wo Tete Ehipululo
11 Etyi pakala, ova Isilayeli aveho, aveya mo Hemboloo, aveliongiya pu Ndaviti,+ avati: “Tala! Onthwe tunkhipa liove, tuhitu yove.*+ 2 Kohale pweetyi Saulu ohamba, ove wahongolelele ova Isilayeli movilwa viavo.*+ Siovaa Huku yove, ekupopila okuti: ‘Ove mokakala omunthita wovanthu vange ova Isilayeli, okakala onkhalamutwe yovanthu vange ova Isilayeli.’”+ 3 Ovakulu aveho vo Isilayeli, avaende kohamba Ndaviti mo Hemboloo, Ndaviti alingi navo omphango ko Hemboloo, komaiho a Siovaa. Avalembula Ndaviti akala ohamba yo Isilayeli,+ ngeetyi Siovaa atumine Samuwele.+
4 Konyima, Ndaviti nova Isilayeli aveho, avaende ko Selusalei, mo Sembusi.+ Vakaka motyilongo otyo ova Sembusi.+ 5 Ova Sembusi avalingi omukwele Ndaviti, avati: “Ove nii muno kumaliate-mo!”+ Mahi, Ndaviti anyingila mepunda-umbo liokwapama lyo Siyau,+ hono litiwa Epunda-umbo lya Ndaviti.+ 6 Ndaviti ati: “Una utetekela okwipaa ova Sembusi, makala onkhalamutwe,* makala omutumini.” Sowambe+ omona wa Seluya, ngae utetekela okwenda-ko, akala onkhalamutwe. 7 Ndaviti akakala mepunda-umbo liokwapama. Otyo lialukilwa okuti Epunda-umbo lya Ndaviti. 8 Ahimbika okutunga epunda-umbo aliho, okuhimbikila Kotyipunda* atee konohika ononkhwavo mbepunda-umbo. Sowambe apindula-po onohika ononkhwavo mbepunda-umbo. 9 Ndaviti ankhimana vali unene,+ Siovaa womambamba ovita ankho una-e.
10 Ava ankho ononkhalamutwe mbovakwa-vita vokwapama va Ndaviti, veliwanekele nova Isilayeli aveho, avemukwatesako moutumini wae, avemuvialeka avemulingi ohamba, ngeetyi Siovaa apopile matyilingwa Isilayeli.+ 11 Ovakwa-vita vokwapama va Ndaviti, ovava: O Sasombeyau+ omona wo mu Hakimoni, onkhalamutwe ya vetatu.+ Nthiki imwe, aipaa ovalume 300 neonga liae.+ 12 Kwe kulandula Eliyasale,+ omona wa Ndondo, omu Aowii.+ O umwe povakwa-vita vetatu vokwapama. 13 Ankho vena Ndaviti ko Pasi-Ndamii,+ oku ova Filisitiya veliongiyile opo valwise ova Isilayeli. Apa vali pali epia liosevata, ovanthu avakahateka mokonda yova Filisitiya. 14 Mahi ngwe atalama pokati-nakati kepia, aipaa ova Filisitiya, ayakulila epia. Ngootyo, Siovaa eveetela eyovo limwe enene.*+
15 Vetatu pononkhalamutwe 30, avaende atee konkhanda, avakavasa Ndaviti meleva lyo Andulau,+ pweetyi omaswalali ova Filisitiya aonga onthanda Melola lyo* Lefaii.+ 16 Ndaviti wali meleva liae, omaswalali ova Filisitiya ali mo Mbelei. 17 Ndaviti elipopila okuti: “Ñgeno ndyiti lale-lale nanwa omaande omonyombo ili popepi nombundi yo Mbelei!”+ 18 Etyi omaswalali ae etatu etyiiva, aanyingila monthanda yova Filisitiya, aatape omaande monyombo yokuli ponthele yombundi yo Mbelei, avaetela Ndaviti. Mahi Ndaviti ehetavela okweenwa, eenengulila Siovaa. 19 Ati: “Ame hipondola okulinga otyipuka ngootyo ku Huku yange! Okuti ndyipondola okunwa ohonde yovalume ava, vayumbahi omienyo viavo?*+ Opo vakapole omeva aa, vayumbilehi omienyo viavo.”* Ehetavela okweenwa. Ovio, ovipuka vialingile ovakwa-vita vae vetatu vokwapama.
20 Ambisai+ velikwai na Sowambe,+ wali onkhalamutwe yovalume vamwe vetatu. Waipaele ovalume 300 neonga liae. Nae akala nomunkhima ngoovo vetatu.+ 21 Pokati kavo vetatu, ngwe wankhimanene vali ku vakwavo vevali, wali onkhalamutwe yavo. Mahi kankhimanene avasi pu vetatu votete.
22 Mbenaya+ omona wa Seoyanda wali omulume wakola omutima,* walingile ovipuka ovinene ko Kambeseeli.+ Waipaele ovana vevali va Aliyeli, wo ko Moambe alauka no konyombo monthiki ongandyi yalia, aipaa onkhulika.+ 23 Tupu waipaele omulume umwe omunene omulaale wo ko Isitu una ono kovandu ononthano* moule.+ Namphila akwata eonga liae peke likahi ngomuti wo vokutunga,*+ Mbenaya emulwisa nomphangoti, emupolo eonga ena-lio, emwipaa nalio.+ 24 Ovio, ovipuka vialingile Mbenaya omona wa Seoyanda. Wankhimanene unene ngovakwa-vita ovo vetatu vokwapama. 25 Namphila ankhimanene vali kovalume 30, mahi kankhimanene ngovalume ovo vetatu.+ Mahi Ndaviti wemuholovonene opo akale umwe povayungi vae.
26 Ovakwa-vita vokwapama vali pomafwalali, o Asaeli+ velilandula na Sowambe, na Elanaa omona wa Ndondo wo ko Mbelei,+ 27 na Samote omu Halolita, na Helesi omu Pelonita, 28 na Ila+ omona wa Ikesi omu Tekowa, na Ambiyeseli+ omu Anatote, 29 na Simbekai+ omu Husaa, na Ilai omu Aowii, 30 na Maalai + omu Netofa, na Helende+ omona wa Mbaanaa omu Netofa, 31 na Itaii omona wa Limbai wo ko Simbeaa yova Mbesamii,+ na Mbenaya omu Pilatoo, 32 na Hulai wo komilola* vyo ko Ngaasi,+ na Ambiyeli omu Alambaa, 33 na Asimavete omu Mbaulii, na Eliyamba omu Saalumbii, 34 novana va Hasee omu Sisonita, na Sonataa omona wa Sange omu Halalita, 35 na Aiyau omona wa Sakale omu Halalita, na Elifale omona wa Uli, 36 na Hefele omu Mekelatite, na Aiya omu Pelonita, 37 na Hesilo omu Kalumelu, na Nalai omona wa Esimbai, 38 na Sowele velikwai na Nataa, na Mimbale omona wa Hangili, 39 na Seleke omu Amoo, na Naalai omu Mbeelote, wokutyinda ondyakulilo ya Sowambe omona wa Seluya, 40 na Ila omu Itilita, na Ngalembe omu Itilita, 41 na Uliya+ omu Hete, na Sambande omona wa Alai, 42 na Andina omona wa Sisa, onkhalamutwe yovana va Lumbe, ankho uundapa novalume 30, 43 na Hanaa omona wa Maakaa, na Sosafaa omu Mitenite, 44 na Usiya omu Asitalote, na Sama na Seyele ovana va Hotau omu Alowele, 45 na Sendiyeli omona wa Sinili, na Sowa velikwai nae, omu Tisita, 46 na Eliyeli omu Maavita, na Selimbai na Sosaviya ovana va Elenaau, na Itima omu Moambe, 47 na Eliyeli, na Ombende, na Saasiyeli omu Mesombaite.