Neemiya
1 Ame, ame Neemiya*+ omona wa Hakaliya, ombu onondaka mbange: Mohanyi ya Kisileu* menima 20 nali mo Susaa,*+ meumbo limwe liapama.* 2 Pahe Hanani+ umwe pwaava tulilandula navo, novalume ovakwavo vo ko Sundaa, aveya, andyivepulu ova Sundaa vokwahupile koukonde,+ tupu andyivepulu o Selusalei. 3 Avakumbulula okuti: “Vana veli mepunda-umbo enene* vokwahupile koupika, veli nokumoneswa unene ononkhumbi, otyo vakundiswa.+ Ovimato vyo Selusalei viahanyauka,+ omapito atyo ayokwa notupia.”+
4 Etyi neiva onondaka ombo, andyipumphama andyihimbika okulila, andyikala ononthiki ononyingi tyeihamenwa. Andyikala ononthiki mbumwe tyahali,+ andyilikwambela ku Huku keulu. 5 Ame andyiti: “Ove Siovaa Huku keulu, Huku omunanene utilisa owoma, ufwisapo omphango yae, wokulinga olwembia olunene ava vemuhole naava vetavela ovitumino viae,+ 6 ikula-vo omaiho ove, omakutwi ove atehelele elikwambelo liomuundapi wove, ndyilinga hono kwoove, tyilinga tyinthiki na tyitenya,+ okwitila ovaundapi vove ova Isilayeli, ndyipopia ononkhali ovanthu vo Isilayeli valinga kwoove. Atuho twalinga onkhali kwoove, tyilinge ame, tyilinge vomeumbo lya tate.+ 7 Tyotyili twalinga etyi tyapenga unene kwoove,+ mokonda katwetavelele ovitumino, novitumino viove vionomphela ove waavelele omuundapi wove Mwisesi.+
8 “Mbambavo hinangela-vo ondaka wapopilile* omuundapi wove Mwisesi yatile: ‘Ine kamukala ovakwatyili, ame mandyimuyandyanesa movanthu vovilongo ovikwavo.+ 9 Mahi, ine mukondoka kwaame, amutavela ovitumino viange, amulingi etyi vipopia, namphila ovanthu veliyandyana movilongo vyo kokule-kule,+ ame mandyiveongiya, mandyiveeta pomphangu naholovona opo ikale nenyina liange.’+ 10 Vati umwe ovo ovaundapi vove, ovo ovanthu vove, vana wayovola nononkhono ononene nokuvoko kwove kwapama.+ 11 Ove Siovaa, mbambavo omakutwi ove, atehelele elikwambelo liange ame muundapi wove nomalikwambelo ovaundapi vove, vana vahambukilwa okutila owoma enyina liove. Mbambavo, kwatesako ame muundapi wove ovipuka viendevo nawa hono, omulume oo andingevo okankhenda.”+
Pononthiki opo ame ankho ndyaavela ovinyu yohamba.+