Isaiya
27 Monthiki omo, Siovaa makakwata omutunga wae watwa, omunene, wakola,+
Akahinangela o Leviyataa,* enyoka liokunthanana,
O Leviyataa, enyoka liokuliponda-ponda.
Makaipaa enyama enene liokuli melunga.
2 Monthiki omo, mwimbilei* okuti:
“Epia lionouva mbulingwa ovinyu!+
3 Ame Siovaa, ndyikahi nokuliyunga.+
Ononthiki ambuho ndyilitapelela.+
Ndyiliyunga kounthiki, no komutenya,
Opo mweheye ou ulinyona.+
4 Pahe hanumanene vali.+
Olie mandwisa nomikete, neholi movilwa?
Mandyikeviliata-liata, andyiviyokela kumwe.
5 Hahe vali ahatekele momphangu yange yapama.
Aovole okukala nombembwa naame.
Akale nombembwa naame.”
6 Mononthiki mambukeya, Sakoo makayumba omwii,
Isilayeli makapapula, akatema ononthemo,+
Otyilongo aveketyiyulisa ovinyango.+
7 Okuti ngwe una okuvangwa neetyi wokumuvanga ekahi nokuvanga natyo?
Okuti una okwipawa ngeetyi tyaipawa ovivimbi viae?
8 Ove, mokemukoyesa, omutaata nonkhwo itilisa owoma.
Mokemutaata nomphepo yove onene, monthiki yomphepo yo koutundilo.+
9 Ongootyo ononkhali mba Sakoo mambukapatwa.+
Etyi, otyo matyikamoneka-po tyina ononkhali mbae amembwevelwa:
Omamanya aeho omutala wovilikutila,
Mekeekalesa ngompheyu yanyanywa pohi.
Kamakukesala otyipandyi natyike tyikola,* nii omutala wokuyokela onombao.+
10 Mokonda, epunda-umbo liokwapama, malikakala ekongola.
Onofika mbokulisila, kamambukahinangelwa vali, mambukasiwa-po, ambukakala ngotyipembe.+
Onthane omo maikalila, ngamo ikalangala,
Aikalia onompha mbalio.+
11 Tyina oumpha walio wamakukuta,
Ovakai mavekeya, aveutiave-ko,
Avakatemesa nao otupia.
Mokonda ovanthu ava, kavanoñgonoka ovipuka.+
Otyo Una wokwevetunga ahamakalela nokankhenda navo.
Una wokweveeta-ko, kamevepande.+
12 Monthiki omo, Siovaa makatiapa omiti viovinyango, okuhimbikila Kondongi,* atee Kelola lyo Isitu.+ Onwe vanthu vo Isilayeli, mamukaongiywa wike-wike.+ 13 Monthiki omo, makukahikwa onkhwino imwe onene,+ vana vekahi nokunama motyilongo tyo Asilia,+ na vana vayandyana motyilongo tyo Isitu,+ mavekeya, avelipetamena-po komaiho a Siovaa, komphunda ikola mo Selusalei.+