Susuwee
4 Ovanthu aveho vati vala yaukee ondongi yo Solondau, Siovaa apopila Susuwee ati: 2 “Koya ovalume 12 movanthu aveho momihoko aviho, tyitie omu mwatunda omulume wike omu mwatunda omulume wike,+ 3 oveti: ‘Polei omamanya 12 mondongi yo Solondau pokati-na-kati apa petai ovanakwa.+ Omamanya oo etyindei-po amweende nao apa mamukalalela.’”+
4 Susuwee ivee etyi apopilwa, aihana ovalume 12 vokwakoywa pova Isilayeli. Momihoko aviho mwatunda omunthu wike-wike. 5 Susuwee eveti: “Lambelei komutwe Wotyikasa tya Siovaa Huku yenyi, amweende mondongi yo Solondau pokati-na-kati amukoyo-po omamanya, atyiti ou watyinda like potyipepe ou watyinda like, omamanya atuuka momihoko viova Isilayeli aviho, 6 mutalaile-ko. Ine haa ovana* venyi vemupula avati: ‘Omamanya aa oatyi?’+ 7 Onwe haa vepopilei okuti: ‘Omamanya aa, ookuhinangelesa ova Isilayeli omeva ondongi yo Solondau atalamene pokwamona otyikasa tya Siovaa tyomphango.+ Etyi otyikasa otyo tyayauka ondongi yo Solondau omeva aatalama. Omamanya aa, maahinangailisa apeho ova Isilayeli.’”+
8 Ova Isilayeli avalingi umwe etyi Susuwee evetuma. Avapolo omamanya 12 mondongi yo Solondau pokati-na-kati, ngeetyi Siovaa atuma Susuwee. Avapolo-mo omamanya atuuka potyifwe tyomihoko viova Isilayeli. Veetyindile-po, avaende nao apa mavakalalela ngapo veetula.
9 Susuwee nae apolo omamanya 12, eepake mondongi yo Solondau pokati-na-kati apa petai ovanakwa vatyinda otyikasa tyomphango.+ No hono omamanya oo opo eli.
10 Ovanakwa vokwatyinda Otyikasa, avatalama pokati-na-kati mondongi yo Solondau atee ovanthu valinga ovipuka aviho Siovaa atuma, evi atumine Susuwee apopile ovanthu. Avalingi umwe atyiho Mwisesi atumine Susuwee. Tyina ovanakwa oku vatalama mondongi, ovanthu otyo vayauka liwa-liwa. 11 Etyi ovanthu aveho vayauka, pahe ovanakwa avalandula-ko navo avayauka Notyikasa tya Siovaa, otyo ovanthu aveho vatala.+ 12 Vomuhoko wa Lumbe no wa Ngande, notyinthimbu tyo vomuhoko wa Manasesi, avayauka tyelionga lwovita,+ ovo veli komutwe wova Isilayeli vakwavo, ngeetyi Mwisesi evelongesile.+ 13 Ovakwa-vita vehungi 40.000 vamanekela ovilwa avayauka ngeetyi Siovaa atuma, avaviuku moluhandya lwo Selikoo.
14 Monthiki omo, Siovaa akulameka Susuwee, otyo ova Isilayeli+ aveho vatala. Avahimbika okulinga onthilo* Susuwee ononthiki ambuho mbomwenyo wae, ngeetyi valingile onthilo na Mwisesi.+
15 Siovaa apopila Susuwee ati: 16 “Popila ovanakwa vokwatyinda otyikasa Tyoumbangi,+ vatunde mondongi yo Solondau.” 17 Susuwee apopila ovanakwa ati: “Pahe tundei-mo mondongi.” 18 Etyi ovanakwa vokwatyinda otyikasa+ tya Siovaa tyomphango vatunda mondongi yo Solondau tyeendela umwe pohi pakukuta, hikee koluhimba omaande o Solondau aahimbika vali okweenda, ondongi aiyula unene aihandye+ ngeetyi ilinga-le.
19 Ova Isilayeli vatunda ko Solondau monthiki 10 yohanyi yo tete, avakaonga onthanda ko Silingale+ konondimbu mbo koutundilo wo Selikoo.
20 Omamanya ana 12 vapola mo Solondau, Susuwee eepake po Silingale.+ 21 Apopila ova Isilayeli okuti: “Tyina haa komutwe wandyila ovana vamapulu ko vohe okuti: ‘Omamanya aa oatyi?’+ 22 Onwe muna okuvekumbulula okuti: ‘Ova Isilayeli vayaukile ondongi yo Solondau avakwate pohi pakukuta,+ 23 pweetyi Siovaa Huku yenyi akukutisa omaande ondongi yo Solondau, aakukutila umwe momaiho avo avalambe. Siovaa Huku weikukutisa ngeetyi alingile Elunga Likuhuka, elikukutisa umwe otyo tutala atulambe.+ 24 Wetyilinga opo ovanthu aveho kombanda yohi vanoñgonoke okuti okuvoko+ kwa Siovaa kwapama, noonwe opo mutile owoma* Siovaa Huku yenyi apeho.’”