Wo Tete Wahonekelwa Ova Kolindu
14 Sukei nolwembia, otyo mahi mututumba* mumone otyali tyomphepo ikola, mahi hahe vali mulinge vokuula.+ 2 Mokonda ou upopia omalaka, havanthu eepopila mahi o Huku, mokonda nawike utyiiva,+ upopia tupu ovipuka vikola viaholekwa+ omphepo ikola. 3 Mahi ngwe ou uula utunga, upameka, onondaka apopia mbukengelela ovanthu. 4 Ou upopia omalaka mwene ulitunga, ou uula utunga ewaneno. 5 Ame nahandele ñgeno amuho mupopia omalaka,+ mahi nafweva-po tyokuula, hahe muule.+ Ngwe tyili, ou uula wapona pu ou upopia omalaka, nkhwali oputyina apotoyola* etyivile okutunga ewaneno. 6 Mahi pehepano umwe ñgaa, vanthu vetu, ine ndyiya oko andyipopi omalaka, onwe matyimupe-tyi, ine nahanda mupole-po opo nkhwali hiyembe kehololoko,+ kenoñgonoko,+ keulo, kondongeso?
7 Otyo otyipuka tyike vala novipuka viahafimi mahi vipopia, ongayeta notyisandyi. Ine katyihikilwa omu mwene tyihikilwa, oñgeni omunthu metyiivi okuti tyihikwa ngootyo ongayeta, tyihikwa ngootyo otyisandyi? 8 Onkhwino okwahahikwa aiivala nawa, olie mati ovilwa vieya-po akatuka? 9 Otyipuka tyike, noonwe ine kelaka lienyi kakutundu onondaka mbwiivala, olie metyinoñgonoka etyi tyili nokupopiwa? Opo onwe mamupopila vala omphepo. 10 Mupondola hamwe amupopi omalaka omanyingi eli mouye, mahi kutupu elaka liehena etyi lipopia. 11 Mokonda ine etyi tyipopiwa ame hityikungunyika, matyiti vala ame nalinga onthunda-vilongo ku ou upopia, ngwe ou upopia alingi onthunda-vilongo kwaame. 12 Noonwe ongootyo, mokonda onwe mwesuka unene notyali tyomphepo ikola, ovolei okulinga ovahona kotyali matyitungu ewaneno.+
13 Naina, ou upopia elaka, elikwambele etyivile okulipotoyola.*+ 14 Mokonda ame okulikwambela melaka, o kotyali nalingwa nomphepo ikola ilikwambela, mahi ame momutwe wange mutupu etyi tyitunda-mo. 15 Naina opo pahe tyilingwa ñgeni? Ame mandyiti umwe, ame ndyilikwambela tyotyali nalingwa nomphepo ikola, ame tupu ndyipola momutwe wange. No pokwiimba, mandyiti umwe ame ndyiimba tyotyali nalingwa nomphepo ikola, ame tupu ndyipola momutwe wange. 16 Mokonda ine ove pokwiimba ulinga vala tyotyali tyomphepo ikola, opo pahe ou uli vala opo, ou munae metyivili okuti “Amem” ove nga wapandula, tyina etyi ove uli nokupopia ehetyiivite? 17 Otyili, ove uli nokupandula, tyili waviukisa, mahi mukwenyi katyemupamekele. 18 Ame ndyipandula Huku mokonda ndyipopia omalaka omanyingi vali kwoonwe amuho. 19 Mahi mewaneno hahe ndyipopie onondaka ononthano mbatunda momutwe wange,* opo ndyilongese-vo na* vakwetu, tyipona okupopia onondaka 10.000 melaka vehei.+
20 Vanthu vetu, mwahalingei ovana kokukungunyika ovipuka,+ mahi lingei ovana movivi;+ lingei ovakulu kokukungunyika ovipuka.+ 21 Movitumino mwahonekwa okuti: “‘Mandyipopi novanthu ava momalaka vehei, mandyipopi navo nomilungu viononthunda-vilongo, mahi kamavanthehela-le,’ otyo tyapopia Siovaa.”*+ 22 Ngwe omalaka hatyilimbo tyovataveli, mwene o tya ava vehevataveli,+ mahi eli eulo ha lya ava vehevataveli, olio mwene o liovataveli. 23 Naina, ine ewaneno liliongiya mphangwa ike, aveho avapopi omalaka, pahe amunyingila omunthu uli vala opo, hamwe ovava vehevataveli, kamavati onwe mwalinga komutwe? 24 Mahi ine onwe amuho, meliongiyo omo muli nokuula, pahe apeya ou wehemutaveli, hamwe omunthu vala uli opo, onondaka mamupopi mambumuviyula, ngwe atyimupe okulitala vali nawa. 25 Tyali monthulo yae matyihololoka, mwene pahe melipetamena-po afende Huku, ati: “Huku naina uli umwe pokati kenyi.”+
26 Pahe naina, tyina okulingwa apa otyityi vanthu vetu? Tyina muliongiya, tyitie ou una oviimbo, ou una tyokulongesa, ou una ehololoko, ou una tyomalaka, ou o tyokupotoyola.+ Ovipuka aviho omu vilingilwa vilinge viokutunga. 27 Ava vokupopia omalaka, hahe valinge vala vevali, okuti hatyo vetatu, avelihila-hila, ou umwe alinge wokupotoyola.*+ 28 Mahi ine petupu ou mapotoyola,* opo vahapopie natyike mewaneno, mwene velipopile vala, tyilinge vala tyavo na Huku. 29 Vokuula+ kupopie vala vevali, okuti hatyo vetatu, ava ovakwavo vatehelele, vakungunyike. 30 Mahi ine umwe upumphi omo utambula ehololoko, ou ankho upopia atie filuu. 31 Mokonda onwe okuulila kumwe amuho, aveho valongoka, aveho vapama.+ 32 Otyali tyomphepo ikola ovauli vapewa, tyina okwoondweywa novauli vatyo. 33 Mokonda Huku, ha Huku yombwandya, mahi o Huku yombembwa.+
Ngeetyi tyilingwa momawaneno aeho ovasukuki, 34 momawaneno, ovakai vahapopie, mokonda kavayekelwe vapopie.+ Mahi, vetavele kovalume,+ valinge etyi tyapopia Ovitumino. 35 Ine vena etyi vahanda okupula, vakapulile ovalume vavo keumbo, mokonda tyikundisa omukai okupopila mewaneno.
36 Okuti ondaka ya Huku yatuka kwoonwe? Okuti oku onwe vala yekehika?
37 Ou wamati hamwe omuuli, hamwe ati una otyali tyomphepo ikola, una okutavela okuti ovipuka evi nemuhonekela, otyitumino tya Tatekulu. 38 Mahi ou wehesuku natyo etyi, nae makaniangwa.* 39 Naina vanthu vange, sukei no tyokuula,+ mahi tupu mwahailikei ou upopia omalaka.+ 40 Mahi ovipuka aviho viviuke umwe nawa, vieendele momululi.*+