Okutunda
2 Pononthiki opo, omulume umwe wo mombunga ya Levii, anepe omukai omona wa Levii.+ 2 Omukai alingi omulemi, akutula omona omukwendye. Etyi emutala omuwa, emuholeka onohanyi ononthatu.+ 3 Pahe etyi ehemuvilile vali okumuholeka,+ aovola osesu* imwe yalingwa nonole eihoto nolukatalau nelohi, ngamo apaka omona, osesu yatyo eipake monombungu mbo mondongi Nilu. 4 Omphange+ yae akalela konthele, otyo emuyunga.
5 Omona wa Falaoo omufikwena eya okulikoha mondongi Nilu, ovaundapi vae otyo vaenda-enda konthele yondongi. Amono osesu ili monombungu atumu omuundapi ekeipole.+ 6 Etyi apatula osesu, tyina akatala muna omona omukwendye ulila. Emulingila okankhenda mahi ati: “Ou omona wova Hembeleu.” 7 Omphange yae uli nokumuyunga eya apopila omona wa Falaoo ati: “Wahanda ndyikekwihanene omukulu umwe omu Hembeleu ekunyamisile-ko omona ou?” 8 Omona wa Falaoo emuti: “Yoo enda!” Omukainthu oo ahateka aende, akaihana ina yomona.+ 9 Omona wa Falaoo apopila omukai oo, ati: “Enda nomona ou ukemunyamisile-ko, haa ndyikufete.” Omukai oo aende nomona ekemunyamisa. 10 Etyi omukai atala omona wekula, emutwala komona wa Falaoo, ngae ukala ina.+ Emuluku okuti o Mwisesi* ati: “Mokonda nemupola momaande.”+
11 Etyi Mwisesi pahe ekula,* nthiki imwe aende ku ava velilandula navo, tyina avasa vekahi nokutyinda ovipuka vialema;+ uvasa omu Isitu uli nokuveta umwe pu ava velilandula navo, omu Hembeleu. 12 Mwisesi atale oku, atale oku, petupu ou umulwete, aipaa omu Isitu emufifila meheke.+
13 Onthiki onkhwavo aende-ko vali, amono ova Hembeleu vevali veli nokulwa. Apopila wokwapengesa okuti: “Oityi ulwisila mukwenyi?”+ 14 Emukumbulula okuti: “Olie wekuti ove umutumini, ove ukoya onomphela mbetu? Wahanda okundyipaa ngeetyi waipaa omu Isitu?”+ Mwisesi atili owoma elipopila ati: “Etyi nalinga tyeivala!”
15 Konyima Falaoo etyinoñgonoka, aovola okwipaa Mwisesi, mahi Mwisesi aende-nkholo Falaoo, ataula no kotyilongo tyo Mindiyaa,+ ngako akakala. Etyi ehika-ko avasi onyombo ngapo akala. 16 Ko Mindiyaa+ kwali omunakwa una ovana epandu-vali ovahikwena, aveya okutapa omaande veyulise omitemba, opo onongi mba he yavo mbunwe. 17 Mahi ovanthita avevetaata-po ngeetyi valinga-lingale. Mwisesi okutyimona akatuka akwatesako* ovahikwena ovo, anwisa ovipako viavo. 18 Etyi vakondoka keumbo, Leweli*+ he yavo evepulu okuti: “Oityi hono mwakondoka liwa ñgaa?” 19 Ngwe avemukumbulula okuti: “Pena omu Isitu+ wetwamena kovanthita, etutapelela-ko omaande anwisa ovipako vietu.” 20 Apulu ovana vae okuti: “Ya ngwe uli-pi? Mwemusila-po-tyi? Kemwiihanei tulie nae.” 21 Leweli apopila Mwisesi vakale nae, etavela okukala meumbo liomulume oo, omulume oo anepesa Mwisesi omona wae Sipola.+ 22 Konyima omukai wae akutula omona omukwendye, emuluku okuti o Seleso,*+ ati: “Nakala onthunda-vilongo motyilongo tyehe-tyange.”+
23 Etyi pakala-pakala,* ohamba yo Isitu ainyimi,+ ava ova Isilayeli ngatyo vala vakalela tyokukema mokonda youpika, otyo valila, veliyava, etyi velipopila okwahanda okuhukululwa-vo moupika, otyo atyiivala ku Huku yotyotyili.+ 24 Huku eivi okukema kwavo,+ ahinangela omphango alingile na Ambalayau, na Isake, na Sakoo.+ 25 Huku ahinangela ova Isilayeli, amono okuti vekahi nokumona onkhumbi.