Okutunda
8 Siovaa apopila Mwisesi okuti: “Enda ku Falaoo, mupopila okuti: ‘Siovaa wati: “Yeka ovanthu vange vakafende kwaame.+ 2 Ine uveanyena oheveyeke, otyilongo tyove atyiho matyikala nomamboto.+ 3 Ondongi Nilu maikeyula omamboto; aakanyingila mondywo yove, no koluhinyi lwondywo yove, aakakala koula wove, maakanyingila monondywo mbovaundapi vove, novanthu vove, no monofolono, no movilindo viavo.+ 4 Omamboto maekeya kwoove, no kovanthu vove, no kovaundapi vove aveho.”’”
5 Konyima Siovaa atolela Mwisesi okuti: “Popila Alau uti: ‘Kwata otyimuti otyipake monondongi, no momikungu vyo Nilu, no movinyinda, motyilongo tyo Isitu muye omamboto.’” 6 Alau atandaveka okuvoko, apake otyimuti momaande o Isitu, omamboto aeya, aeyula motyilongo tyo Isitu. 7 Tupu ovanakwa vokwatambula ngatyo valinga novihemba viavo: navo avaeta omamboto motyilongo tyo Isitu.+ 8 Ou Falaoo, aihana Mwisesi na Alau evepopila okuti: “Itei ku Siovaa etupole omamboto aa ame novanthu vange,+ tyeetyi nahanda okuyeka ovanthu vae vaye, vakalingile Siovaa ovilikutila.” 9 Mwisesi atolela Falaoo okuti: “Tyitei kwoove tatekulu, ove upopia onalupi mandyikalavandya opo ove, novaundapi vove, novanthu vove, nomaumbo enyi, muyovoke komamboto. Mamukahupa vala omamboto o mondongi Nilu.” 10 Emukumbulula okuti: “Omuhuka.” Mwisesi ati: “Mandyilingi etyi wapopia tatekulu, utyinoñgonoke okuti petupu ou welifwa na Siovaa Huku yetu.+ 11 Ove tatekulu, nomaumbo ove, novaundapi vove, novanthu vove mamuyovoka komamboto. Omo Nilu+ vala mamukahupa omamboto.”
12 Ovo Mwisesi na Alau avahondovoka ponthele ya Falaoo, ou Mwisesi, akalavandya ku Siovaa tyeetyi watumine omamboto ku Falaoo.+ 13 Siovaa etavela elikwambelo lya Mwisesi, omamboto monondywo mbovanthu, no momapata, no momapia aankhi. 14 Aveeongiya ononthunthu-ononthunthu, otyilongo atyiniki omapita. 15 Ou Falaoo okutyimona okuti atepuluka, ateneka vali omutima wae,+ ehevetavela, ngeetyi Siovaa apopile.
16 Siovaa apopila Mwisesi okuti: “Tolela Alau uti: ‘Veta notyimuti tyove kombundu yeheke, maityituka onome motyilongo atyiho tyo Isitu.’” 17 Avetyilingi. Alau avete notyimuti tyae kombundu yeheke, aityituka onome, ambuya kovanthu no kovinyama. Ombundu aiho yeheke motyilongo tyo Isitu aityituka onome.+ 18 Ovanakwa vokwatambula navo ngootyo vahetekela okulinga novihemba viavo,+ avehetyivili. Onome ambuya kovanthu no kovinyama. 19 Ovanakwa vokwatambula avatolela Falaoo okuti: “Otyo tyalingwa kononkhono mba Huku!”+ Mahi no ngootyo omutima wa Falaoo autene, ehevetavela, ngeetyi Siovaa atolele.
20 Siovaa apopila Mwisesi okuti: “Pinduka-po komuhuka, enda ku Falaoo. Tala! Maende no kondongi! Enda kemutolele okuti: ‘Siovaa wati: “Yeka ovanthu vange vakafende kwaame. 21 Ine ove kuyeke ovanthu vange vaye, mandyikutumu ononyi,* noove novaundapi vove, novanthu vove, nomaumbo enyi; monondywo mbova Isitu mamukeyula ononyi, mambukeyula pohi apa* valiatela. 22 Monthiki oyo, tyotyili motyilongo tyo Ngosene mukala ovanthu vange kamamukakala ononyi. Kamamukakala onyi naike;+ motyinoñgonoka okuti ame, ame Siovaa ndyikahi motyilongo tyino.+ 23 Etyi mandyilingi ovanthu vange tyelikalela neetyi mandyilingi ovanthu vove. Enyingilikilo liatyo malimoneka muhuka.”’”
24 Siovaa ngatyo alinga. Ononyi ononyingi ambunyingila mondywo ya Falaoo, no monondywo mbovaundapi vae, no motyilongo atyiho tyo Isitu.+ Ononyi ambunyono otyilongo.+ 25 Konyima ou Falaoo, aihana Mwisesi na Alau ati: “Endei, lingilei Huku yenyi ovilikutila muno motyilongo.” 26 Mwisesi ati: “Katupondola okulinga ngootyo, etyi twahanda okwavela otyilikutila ku Siovaa Huku yetu, ova Isitu+ ngwe vetyiyele. Ine tulingila muno otyilikutila komaiho ova Isitu otyipuka veyele, kamavetutyopo nomamanya? 27 Matwende oungendi wononthiki ononthatu moluhandya tukalingile Siovaa Huku yetu ovilikutila, ngeetyi etutuma.”+
28 Falaoo eveti: “Mandyimuyeke mwende mukalingile Siovaa Huku yenyi ovilikutila moluhandya. Mwahayei vala kokule. Kandyitilei-ko ku Huku yenyi.”+ 29 Mwisesi ati: “Pahe mandyihondovoka ponthele yove ndyikaite ku Siovaa, muhuka ononyi mambuyeke-po ove Falaoo, novaundapi vove, novanthu vove. Mahi ove Falaoo wehetukembe vali,* oanye okuyeka ovanthu vakalingile Siovaa ovilikutila.”+ 30 Mwisesi ahondovoka ponthele ya Falaoo, akaita ku Siovaa.+ 31 Siovaa alingi ngeetyi Mwisesi aitile, ononyi ambuyeke Falaoo, novaundapi vae, novanthu vae. Amuhahupu onyi naike. 32 Falaoo ateneka vali omutima wae, ahayeke ovanthu vaye.