Omukanda wo Tete wa Samuwele
12 Samuwele apopila ovanthu aveho ova Isilayeli okuti: “Nalinga* atyiho onwe mwandyita, naholovona ohamba opo imutumine.+ 2 Pahe ohamba maimuhongolela* oyei!+ Ame nakulupa-le, onohuki mbange pahe mbatwela, ovana vange muna-vo.+ Nemuhongolela okuhimbikila poututu wange atee hono.+ 3 Ame ndyili pano. Popiei etyi nalinga, Siovaa akale ombangi, nomulembulwa wae akale ombangi:+ Olie napola ongombe yae ine otyimbulu tyae?+ Olie napomba tyae ine namonesa ononkhumbi? Okuti netavelele okulipumwa-po* nomunthu umwe opo ndyiholeke etyi alinga?+ Netyilinga, tyipopiei umwe ndyityindole.”+ 4 Ngwe avati: “Ove kwetupombele, nii okutumonesa ononkhumbi, kwetavelele omunthu nawike ekufete otyipuka tyimwe.” 5 Evepopila okuti: “Siovaa ombangi yenyi omulembulwa wae nae ombangi yokuti kamupondola okunthendeleya natyike.”* Ngwe avati: “Yoo ombangi yetu.”
6 Samuwele apopila ovanthu okuti: “Siovaa wokwatumine Mwisesi na Alau, wokwapolele ovakwaukulu venyi kotyilongo tyo Isitu,+ akale ombangi. 7 Pahe kalei apa mukahi, ame mandyimukoyesa otyo Siovaa etyiete mokonda yovipuka aviho viaviuka Siovaa emulingila nevi alingila ovakwaukulu venyi.
8 “Etyi Sakoo anyingila mo Isitu+ ovakwaukulu venyi aveliyave ku Siovaa okwiita evekwateseko,+ Siovaa watumine Mwisesi+ na Alau vapole ovakwaukulu venyi mo Isitu aveveeta pomphangu ino.+ 9 Mahi, avalimbwa Siovaa Huku yavo ngwe eveyekela+ pomavoko a Sisela,+ omutumini womafwalali a Hasole, no pomavoko ova Filisitiya,+ no pomavoko ohamba yo Moambe,+ onohamba ombo ambuho ambuvelwisa. 10 Aveliyave ku Siovaa evekwateseko,+ avati: ‘Twalinga onkhali,+ twayeka-po Siovaa atufende ovika-huku ovi Mbaale+ novilolo vyo Asitolete;+ pahe mba, tuyovole-vo pomavoko onondyale mbetu tukuumbile.’ 11 Siovaa atumu Selumbaale,+ na Mbendaa na Sefetee+ na Samuwele,+ emuyovola pomavoko onondyale mbenyi mbeliseta noonwe opo mukale nepamo.+ 12 Etyi mwamona Naasi+ ohamba yova Amoo uya okumulwisa, onwe amutwalako okumphopila okuti: ‘Au, onthwe tuhanda umwe okukala nohamba maitutumina!’+ namphila Siovaa Huku yenyi Ohamba yenyi.+ 13 Pahe Ohamba mwahanda, ei mwaita oyei. Tala! Siovaa waholovona ohamba maimutumina.+ 14 Ine mulinga Siovaa+ onthilo amumulingila,+ amutavela ondaka yae,+ amuhaanye otyitumino tya Siovaa, tyilinge onwe tyilinge ohamba maimutumina amutavela Siovaa, Huku yenyi, otyo tyikahi nawa. 15 Mahi, ine kamutavela ondaka ya Siovaa, amwaanye otyitumino tya Siovaa, okuvoko kwa Siovaa makumutyitukilapo, noonwe no vo ho.+ 16 Pahe kalei apa mukahi, amutale otyipuka tyihuvisa Siovaa malingi otyo mutyeete. 17 Katukahi momuvo wokuteya otiliku? Mandyiiti ku Siovaa atume omititimo nombila; pahe onwe mamunoñgonoka amutale okuti mwalinga otyipuka tyimwe otyivi komaiho a Siovaa etyi mwaita ohamba maimutumina.”+
18 Pahe, Samuwele aiti ku Siovaa, Siovaa aeta omititimo nombila monthiki oyo, ovanthu aveho avakala unene nowoma na Siovaa na Samuwele. 19 Ovanthu aveho avapopila Samuwele okuti: “Lingila-vo elikwambelo ovaundapi vove ku Siovaa Huku yove,+ katuhande okunkhia; mokonda twayawisa kononkhali mbetu otyipuka otyivi, tyokwita ohamba.”
20 Ngootyo Samuwele apopila ovanthu okuti: “Muhakalei nowoma. Tyotyili mwalinga otyipuka otyivi unene. Mahi pahe muhayekei-po Siovaa,+ umbilei Siovaa nomutima wenyi auho.+ 21 Muhayapukei amulandula ovika-huku, vihaviukile,*+ vihapondola okuyovola+ omunthu mokonda kavisilivila.* 22 Mokonda yenyina liae enene,+ Siovaa kamayeke-po ovanthu vae,+ mokonda Siovaa watokola onwe mukale ovanthu vae.+ 23 Mahi ame, himalingi onkhali ku Siovaa andyiyeke-po okumulingila omalikwambelo. Ame mandyitwalako okumulongesa ondyila ongwa, yokwaviuka. 24 Ndyimwita vala okuti kalei nonthilo na Siovaa,+ amumuumbila amwehemuyeke-po,* nomutima wenyi auho; hinangelei ovipuka ovinene emulingila.+ 25 Mahi onwe okulingila wina otyivi,+ tyilinge onwe tyilinge ohamba yenyi mamwipawa-ko.”+