Omukanda wo Tete Onohamba

6 Etyi palamba omanima 480 apa ova Isilayeli* vatunda motyilongo tyo Isitu,+ menima lya kwana ohamba Salomau mo Isilayeli eli kovipundi, mohanyi ya Sive*+ (oyo, ohanyi ya vali) Salomau ahimbika okutunga ondywo ya Siovaa.*+ 2 Ondywo ohamba Salomau atungila Siovaa, ina onokovandu* 60 moule nonokovandu 20 mounthanda nonokovandu 30 motyitai.+ 3 Ondywo yokunyingilila+ yo komutwe wondywo ikola,* mounthanda ilifwe nondywo yatyo: ina onokovandu 20.* Ondywo yokunyingilila yayawiswa-ko, ina onokovandu 10.

4 Onombundi mbonondyanena mbondywo, embuhitisa nthele imwe.*+ 5 Tyihe-otyo vala, atungu ondywo onkhwavo, otyimato tyayo atyilipalakana* notyimato tyondywo onene, okulandulisapo ovimato viondywo — viondywo ya Huku* no viondywo yo mokati.+ Atungu onondywo mbo mononthele.+ 6 Ondywo yo mombwelo yokuna onondywo mononthele ina onokovandu ononthano mounthanda, ondywo yo pokati okwenda no peulu ina onokovandu epandu mounthanda, ondywo yo keulu ina onokovandu epandu-vali mounthanda, mokonda walingile oumato* kutenthama ovivai kononthele ambuho mbondywo, opo movimato viondywo mwahapakwe vali omitalekwa.+

7 Ondywo aitungwa nomamanya aviukiswa-le,+ pahe pokutunga kapeivala vali onohamala, nononkhava noviti ovikwavo viovivela. 8 Ombundi yokunyingilila mondywo yo mombwelo+ yokuna onondywo mononthele ikala kombwelo,* kuna ondondelo yeliponda-ponda yokulonda kosapalalo mondywo yo pokati, aitundu mondywo yo pokati atee mondywo yo keulu. 9 Atwalako okutunga ondywo atee yapwa;+ eipake omitalekwa viomusendulu, eiyambela nomavai omusendulu.+ 10 Atungu onondywo mbo mononthele mbokweliseta nondywo aiho,+ mbuna onokovandu ononthano motyitai, mbatopekenywa kondywo onene nomavai omusendulu.

11 Pononthiki mbatyo opo, Salomau atambula ondaka ku Siovaa yati: 12 “Mokonda yondywo ei ukahi nokutunga, weendela mwetyi ndyipopia, olandula ovitumino viange vionomphela, otavela ovitumino viange aviho,+ oendela-mo, ame mandyifwisapo etyi napopilile tate yove Ndaviti, konthele yove,+ 13 mandyikala pokati kova Isilayeli,+ himayeke-po ovanthu vange ova Isilayeli.”+

14 Salomau atwalako nokutunga opo ondywo ipwe. 15 Ahoto* ovimato viondywo, mokati amate-mo omavai omusendulu. Ovimato vyo mokati aviho evimate omavai, okuhimbikila pohi atee momitalekwa; pohi yatyo amate-po omavai omungalaviya.+ 16 Atungu onthele imwe ina onokovandu 20 okuhimbikila kotyimato tyo konyima yondywo; tyatungwa nomavai omusendulu, okupolelela pohi atee momitalekwa; pahe atungu-mo* ondywo yo mokati,+ omphangu Ikola Unene.+ 17 Ondywo ya Huku,*+ onthele yo komutwe, ina onokovandu 40 moule. 18 Omavai omusendulu omokati kondywo ayolwa ononthenda,+ nononthemo mbaikuka.+ Aviho vialingilwe nomusendulu, omamanya ankho kaamoneka.

19 Aviukisa nawa mondywo yo mokati+ opo apake-mo otyikasa tyomphango tya Siovaa.+ 20 Ondywo yo mokati ina onokovandu 20 moulaale, nonokovandu 20 mounthanda, nonokovandu 20 motyitai.+ Eipake oolu yatyo mwene, omutala wovilikutila+ eumate omavai omusendulu. 21 Ondywo Salomau eipake oolu yatyo mwene mokati,+ apake omalienge oolu komutwe wondywo yo mokati+ yapakwa oolu. 22 Ondywo eimate oolu aiho atee yapwa; tupu omutala wovilikutila+ ukala popepi nondywo yo mokati nao eumate oolu auho.

23 Mondywo yo mokati alingila-mo ono kelumbii onombali+ mbomavai omuti womulela, ike ina onokovandu 10 motyitai nonkhwavo onokovandu 10.+ 24 Evava like lyo kelumbii lina onokovandu ononthano, ekwavo nalio lina onokovandu ononthano. Okupolela kondungu yevava limwe atee kondungu yevava ekwavo pena onokovandu 10. 25 O kelumbii ya vali nayo ina onokovandu 10. Ono kelumbii onombali ambuho mbulifwe, mbatungwa otyipuka tyike. 26 O kelumbii ike ina onokovandu 10 motyitai, o kelumbii onkhwavo nayo opo ilifwe. 27 Pahe apake ono kelumbii+ ombo mondywo yo mokati.* Omavava ono kelumbii atandavela, evava lyo kelumbii imwe liayama moluhunyi, evava lyo kelumbii onkhwavo liayama moluhunyi olukwavo, omavava omakwavo atandavela okweenda no pokati kondywo, aeliyame. 28 Tupu ono kelumbii embumate oolu.

29 Movimato aviho viondywo, tyilinge moluhinyi lwondywo yo mokati tyilinge moluhinyi lwondywo yo kondye,* ayolo-mo ono kelumbii,+ nomindende,+ nononthemo mbaikuka.+ 30 Onthuntho yo mondywo weilinga nomavai apake-ko oolu, mondywo yo mokati no mondywo yo kondye. 31 Pombundi yokunyingila mondywo yo mokati, alingila-po omapito omavai omuti womulela, nonomphandyi mbepito, nomiti viokukwata omapito ondywo, onthele ya tano.* 32 Omapito evali alingwa nomavai omuti womulela, ayola-yola-ko ono kelumbii, nomindende, nononthemo mbaikuka, apake-ko oolu; amate oolu kono kelumbii no komindende eityopela-ko nohamala. 33 Pombundi yondywo ya Huku,* alingila-po omiti viokukwata omapito omavai omuti womulela otyipuka tyike, onthele ya kwana.* 34 Alingi omapito evali omavai omungalaviya. Epito limwe lina omavai evali ena ehingo omu akwatela, epito ekwavo nalio lina omavai evali ena ehingo omu akwatela.+ 35 Ayola-yola-mo ono kelumbii, nomindende nononthemo mbaikuka, kombanda yatyo pahe apake-ko oolu.

36 Atungu otyimato tyepata+ lyo mokati tyina omitete vitatu viomamanya okwaviukiswa nomutete wike womavai omusendulu.+

37 Menima lya kwana, liohanyi ya Sive* akutungwa omalisesu+ ondywo ya Siovaa; 38 menima lya 11 ya Mbule* (oyo, ohanyi ya tyinana), ondywo aipu, aiho aitungwa ngeetyi ina okukala.+ Veitungile omanima epandu-vali.