Omukanda wa Vali Ehipululo
12 Etyi Lombowau pahe atumina umwe otyilongo,+ wapama, ayeke-po Ovitumino vya Siovaa,+ no Isilayeli aiho ngatyo ilinga. 2 Menima lya tano Lombowau eli nokutumina, Sisake+ Ohamba yo ko Isitu, eya okulwisa o Selusalei, mokonda vayeka-po Siovaa. 3 Pokutunda ko Isitu weya nomatemba ovilwa ena 1.200, no vokweendela kononkhambe vena 60.000, nomaswalali omanyingi-nyingi, ova Limbia, nova Sukii, nova Etiopia.+ 4 Apolo-ko omapunda-umbo o Sundaa okwapama, atee ehika mo Selusalei.
5 Omuuli Semaiya+ aende ku Lombowau no kovatumini vo Sundaa veliongiya mo Selusalei, evepopila okuti: “Etyi otyo tyapopia Siovaa, wati: ‘Mokonda onwe mwandyeka-po, naame ndyimuyekela+ pomavoko a Sisake.’” 6 Mokonda yotyo, ovatumini vo Isilayeli, nohamba avelivele,*+ avati: “Siovaa uviukisa.” 7 Etyi Siovaa amona okuti velivela, Siovaa atumu Semaiya okuti: “Velivela, himevehanye-ko vali,+ apa katutu mandyiveyovola. Himatumu vali Sisake opo ndyiuyulile onyengo yange mo Selusalei. 8 Mahi mavakala ovaundapi vae, opo vanoñgonoke okuti okundingila tyelikalela nokulingila onohamba mbovilongo* ovikwavo.”
9 Sisake Ohamba yo ko Isitu, akatuka eya okulwisa o Selusalei. Atyindi-mo omalumono aeho o mondywo ya Siovaa+ nomalumono aeho o mondywo* yohamba. Atyindi umwe atyiho, nonondyakulilo ambuho mboolu Salomau alingile.+ 10 Ohamba Lombowau alingi onondyakulilo mbotyivela otyitasu mbupinge-po, embwaavela ononkhalamutwe mbovayungi* vayunga kombundi yeumbo liohamba. 11 Apeho tyina ohamba yenda mondywo ya Siovaa, ovayungi veya avatyindi-mo onondyakulilo, haa avembukondola vali mondywo yovayungi. 12 Mokonda ohamba yelivela, Siovaa ehemunumanena vali,+ ehevehanye-ko aveho.+ Ngwe tupu mo Sundaa nkhele mwali ovipuka oviwa.+
13 Ohamba Lombowau apameka outumini wae mo Selusalei, atwalako okutumina; Lombowau wali nomanima 41 etyi alinga ohamba, atumina omanima 17 mo Selusalei, epunda-umbo Siovaa aholovona pomapunda-umbo omihoko aviho vyo Isilayeli opo likale omphangu apaka enyina liae. Ina yohamba wali omu Amoo+ utiwa o Naamaa. 14 Mahi Lombowau walingile etyi tyapenga, mokonda ketyipakele momutima tyokwovola Siovaa.+
15 Ovipuka Lombowau alingile okuhimbikila konthyimbi atee konthyulilo, okuti kaviahonekelwe movihonekwa viomuuli Semaiya,+ nomutali Indu+ momikanda viomuhoko? Lombowau na Selombowau avakalela vala okulwa.+ 16 Pahe Lombowau akapululukwa nonombwale mbavo, akapakwa Mepunda-umbo lya Ndaviti;+ omona wae Ambiya+ emupingi kovipundi.