Omukanda wo Tete wa Samuwele
26 Konyima ovanthu vo ko Sife+ avaende atee ku Saulu ko Simbeaa,+ avemupopila okuti: “Ndaviti waholama motyipunda tyo Hakilaa tyikala komutwe wo Sesimoo.”*+ 2 Saulu aende no moluhandya lwo Sife, nomafwalali okwapama vali 3.000 ova Isilayeli opo vakaovole Ndaviti moluhandya lwo Sife.+ 3 Saulu aongo onthanda motyipunda tyo Hakilaa, tyikala komutwe wo Sesimoo, popepi netapalo. Ndaviti ankho ukala moluhandya, etyiivi okuti Saulu weya moluhandya, umwovola. 4 Ndaviti atumu ovalavi vakatale ine tyili-tyili Saulu weya umwe. 5 Konyima, Ndaviti aende konthanda ya Saulu, amono apa Saulu na Ambinele+ omona wa Nele, onkhalamutwe yomafwalali, velangi. Saulu ankho ulangi monthanda ulele, pokati kovita viae velangi vemupaka pokati. 6 Ndaviti apulu Aimeleke omu Hete+ nomona wa Seluya+ Ambisai,+ velilandula na Sowambe okuti: “Olie matunyingila nae monthanda, atwende atee pu Saulu?” Ambisai akumbulula okuti: “Twende atuho.” 7 Ndaviti na Ambisai avanyingila monthanda yomafwalali kounthiki avavasi Saulu ulele, eonga liae liatomwa pohi pomitwe viae; Ambinele nomafwalali ankho velangi ponthele yae veliseta nae.
8 Ambisai apopila Ndaviti okuti: “Hono Huku wapakula ondyale yove pomavoko ove.+ Ndyeke ndyimutomene pohi neonga. Mandyimutomo vala like, kamatyisukisa tuvali.” 9 Ndaviti apopila Ambisai okuti: “Wehemulinge otyivi natyike, olie upondola okuyelula okuvoko kwae ayame komulembulwa wa Siovaa,+ ahavelwa onombei?”+ 10 Ndaviti ayawisa-ko okuti: “Na Siovaa umwe una omwenyo, mwene Siovaa oe memwipaa,+ ine makuya onthiki mwene+ mankhi, ine maende movilwa ngamo akankhila.+ 11 Mokonda yonthilo na Siovaa, ame hipondola okuyelula okuvoko kwange andyiyame komulembulwa wa Siovaa!+ Tutyinde-po vala eonga liae, nokanthenda komaande kekahi pomitwe viae, atwende.” 12 Ngootyo, Ndaviti apolo-po eonga, nokanthenda komaande pomitwe vya Saulu, avaende. Nawike wevemwene,+ nii okuveiva, nii okupinduka-po. Aveho ankho velele, mokonda Siovaa weveavela olumphoki olunene, avalala otyinkhankhula. 13 Ndaviti aende nthele-ina elola, atalama pokatanga-tanga komphunda, kokule navo.
14 Ndaviti alaveleya omafwalali na Ambinele+ omona wa Nele, ati: “Ambinele undyivite?” Ambinele akumbulula okuti: “Ove, ovelie ukahi nokuvielela ohamba?” 15 Ndaviti apopila Ambinele okuti: “Ove umulume umwe? Olie mo Isilayeli ukahi ngoove? Omokonda yatyi wahayungilile tatekulu yove, ohamba? Pena efwalali limwe lieile monthanda, opo liipae tatekulu, ohamba.+ 16 Etyi walinga katyaviukile. Na Siovaa umwe una omwenyo, ove wakamba okwipawa, mokonda kwayungile tatekulu, omulembulwa wa Siovaa.+ Pahe tala ponthele yenyi! Eonga liohamba,+ nokanthenda kae komaande ankho vikahi pomitwe viae vilipi?”
17 Saulu aimbuka ondaka ya Ndaviti, emupulu okuti: “Oyo ondaka yomona wange Ndaviti?”+ Ndaviti akumbulula okuti: “Yoo, ame yatyo, tatekulu yange, hamba.” 18 Ayawisa-ko okuti: “Omokonda yatyi tatekulu uyevela omuundapi wove?+ Oityi nalinga? Onkhali patyi nalinga?+ 19 Mbambavo tatekulu yange, hamba, tehelela onondaka mbomupika wove: Ine o Siovaa wekutahela kwaame, opo etavele* otyiawa tyange tyovilia. Mahi, ine ovanthu vekuhindila,+ vateyelwe onkhano na Siovaa, mokonda vanthaata, kavandyekele ndyikale pokati kovanthu* va Siovaa,+ vapopia okuti: ‘Enda kafende ono huku ononkhwavo!’ 20 Pahe wahayeke ndyiipaelwe kokule nekaka lya Siovaa, mokonda ohamba yo Isilayeli yatunda meumbo okwovola opulukwa,*+ ngatyina ikahi nokuyeva otyinthenthu* monomphunda.”
21 Saulu emupopila okuti: “Nalinga onkhali.+ Kondoka mona wange Ndaviti, himekulingi vali natyike otyivi, mokonda hono ove wakala nonthilo nomwenyo wange.*+ Ame tyili-tyili nalinga ngotyova, nalinga onkhali onene.” 22 Ndaviti ati: “Eonga liohamba olieli. Tuma umwe povakwa-vita vove eye okulipola. 23 Siovaa oe makondolela omunthu na munthu etyi tyatokala mouviuki wae,+ no moukwatyili wae, mokonda hono Siovaa ankho wekupakula pomavoko ange, mahi ame hayelulile okuvoko kwange opo ndyiyame komulembulwa wa Siovaa.+ 24 Ngeetyi hono nakala nonthilo nomwenyo wove,* na Siovaa akale nonthilo nomwenyo wange,* andyovole mononkhumbi ambuho.”+ 25 Saulu apopila Ndaviti okuti: “Huku ekuyambe mona wange Ndaviti. Ove molingi ovipuka ovinene, aviho ulinga maviende nawa.”+ Konyima Ndaviti aende, Saulu akondoka keumbo.+